luqa 17 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

almmud l‑lmasiḥ

¹ isawl yasuɛ s‑imḥḍarn‑ns yini‑asn: «iqqan‑d ad‑ilint tabayḍḍrin ma‑issṭarn mddn, walaynni taguḍi a‑ra‑yili i‑wanna‑tnt‑in‑israsn.

² yuf‑as iġ‑as‑ityaggal‑uẓru n‑uzrg ġ‑umggrḍ‑ns ityawgar‑n ġ‑umda, ula issḍr yan zġ‑imẓẓiyn‑ad.

³ awiyat‑stt ġ‑ih̬f‑nnun. iġ‑iskr gʷmak kra yʷh̬šnn, sawl srs baš a‑ur‑t‑sul‑iskr. iġ‑tʷgraẓ gʷmak ifl lh̬ʷšant‑an, ṣamḥ‑as.

⁴ iġ‑a‑yak‑iskar lh̬ʷšant ssa n‑twal ġ‑yan‑wass ar‑d‑ittaški ssa n‑twal ar‑ak‑ittini: ‹tʷgraẓ‑iyi f‑mad‑skrġ, ur‑sul‑ra‑t‑skrġ,› illa fllak ad‑as‑ttṣamaḥt.»

⁵ inin‑as irqqasn‑ns: «ɛawn‑aġ a‑nzayd namn s‑uggʷar.»

⁶ irar‑asn siditnnġ: «mrad is‑gigun‑illa liman unšk n‑taqqayt imẓẓin l‑lh̬rdl, ra‑tinim i‑tsġart‑ad n‑imršiq ‹akuf ttyawẓẓat‑n ġ‑umda› ra‑tskr s‑mad‑as‑tnnam.

⁷ «ma‑ra‑tskrt iġ‑dark‑illa yan‑uh̬ddam ar‑ikkrz nġd ar‑ikssa ulli? iġ‑d‑iwrri zġ‑igran is‑rad‑as‑tinit: ‹ha‑imnsi‑nnk, gawr tsunfut ar‑tšttat›?

⁸ uhu, rad‑as‑tinit: ‹skr‑iyi imnsi‑nu, tbkist ar‑flla‑ttsh̬h̬art, ard ššġ suġ nkki ġakudan a‑ra‑tššt ula kiyi tsut.›

⁹ ur‑ra‑talġm ah̬ddam‑an f‑mayd iskr, ašku ur‑iskir abla tawuri lli‑f‑t‑yuṣṣa sidis.

¹⁰ ula kunni, ġakud lliġ tskrm kullu ma‑f‑kʷn‑yuṣṣa siditun iqqan‑kʷn‑d a‑tinim: ‹ih̬ddamn ka‑nga zund wiyyaḍ. ur‑nskir abla maylli fllannġ illan.›»

injdamn lli‑ijjujji lmasiḥ

¹¹ izayd yasuɛ ġ‑uġaras n‑urušalim, izri ġ‑gr‑tmizar n‑samira d‑jalil,

¹² ilkm yan‑uduwwar. mnaggarn‑t‑id mraw injdamn. biddn‑in ġ‑tuggugt,

¹³ alln awal‑nsn ar‑ttinin: «wa‑yasuɛ, wa‑sidi, ḥnnu ginnġ.»

¹⁴ lliġ‑tn‑iẓra yasuɛ yini‑asn: «ddwat tmlm ih̬fawn‑nnun i‑inmġurn n‑tgmmi n‑rbbi.» ġakudan, lliġ ftan ġusn.

¹⁵ yan gisn, lliġ iẓra ih̬f‑ns ijji, iwrri‑d yall awal‑ns ar‑italġ rbbi,

¹⁶ iḍr f‑uwdm‑ns ġ‑dar iḍarn n‑yasuɛ ar‑t‑itškar. iga ntta gu‑samira.

¹⁷ isawl yasuɛ yini: «is‑urd mraw a‑iġusn? manza tẓa yaḍni?

¹⁸ is‑ur‑illi ma‑d‑iwrrin a‑iškr rbbi abla abrrani‑ad?»

¹⁹ yini‑as ilmma: «nkr, mun d‑uġaras‑nnk. ha‑kiyi tumnt, mayan a‑f‑tġust.»

asqsi f‑tgldit n‑rbbi

²⁰ aškin‑d kra n‑ifarisin sqsan yasuɛ: «managu a‑ra‑di‑tašk‑tgldit n‑rbbi?» yini‑asn: «tagldit n‑rbbi, ur‑ra‑di‑tban i‑iẓri n‑mddn a‑stt‑ssmaqqln.

²¹ ur‑ra‑yiẓḍar yan a‑yini ‹hatti› nġd ‹hattin› ašku tagldit n‑rbbi, ammas‑nnun a‑ġ‑tlla.»

²² yini ilmma i‑imḥḍarn‑ns: «ra‑d‑yašk‑uzmz lli‑ġ‑ra‑tẓuẓḍm bahra a‑tẓrm yan‑wass ġ‑uwssan n‑yus n‑bnadm, ur‑ra‑ti‑tẓrm.

²³ rad‑nkrn mddn inin‑awn ‹hatin› nġd ‹hati›. walaynni rad‑awn‑iniġ, a‑ur‑darsn‑tddum ula tḍfurm‑tn.

²⁴ ašku ġmklli kkatn‑uwsmann zġ‑yat‑tsga n‑ignwan isfiwn‑in i‑tsga yaḍni, ġmkan a‑rad‑d‑aškġ nkki lli‑igan yus n‑bnadm ġ‑wass‑inu.

²⁵ walaynni iqqan‑iyi‑d zwar a‑bahra‑rfufnġ, luḥn‑iyi‑n mddn n‑tasut‑ad.

²⁶ zund ġaylli illan ġ‑uwssan n‑nuḥ a‑ra‑yili ġ‑uwssan‑an ġ‑ra‑d‑yašk yus n‑bnadm.

²⁷ ar‑šttan mddn ar‑ssan ar‑ttahaln ar‑ttahalnt ar ass lli‑ġ‑ikšm nuḥ s‑wanaw ġlin‑d‑srsn‑waman ggutnin tyawhlakn kullutn.

²⁸ rad‑daġ‑yili ġmklli illan ġ‑uwssan n‑luṭ. ar‑šttan ar‑ssan ar‑saġn ar‑zznzan ar‑tẓẓun ar‑bnnun,

²⁹ walaynni ġ‑wass lli‑ġ‑iffuġ luṭ tamdint n‑sadum tḍr‑d lɛafit d‑lkbrit zġ‑ignwan tyawhlakn kullutn.

³⁰ ġmkan a‑ra‑d‑daġ‑yili ġ‑wass lli‑ġ‑ra‑d‑iban yus n‑bnadm.

³¹ «imma ġassan, rad‑awn‑fllas‑iniġ: wanna illan ġ‑iggi n‑tgmmi, iqqan‑t‑id a‑ur‑igguz a‑d‑yasi tiġawsiwin‑ns zġ‑tgmmi. ula wanna‑n‑illan ġ‑igran, a‑ur‑iwrri a‑d‑yawi kra.

³² swangmad‑d ma‑ijran i‑tmġart n‑luṭ.

³³ wanna isiggiln a‑ijjnjm tudrt‑ns ra‑stt‑ijlu. d‑wanna ijlan tudrt‑ns ra‑stt‑ijjnjm.

³⁴ rad‑awn‑iniġ, ġ‑iḍ‑an rad‑ilin sin mddn ġ‑tisi, ra‑yitti yan iqama yan.

^35-36 rad‑ilint snat‑tmġarin ar‑ẓẓaḍnt, ra‑titti yat tqama yat.»

³⁷ sqsan‑t imḥḍarn‑ns: «wa‑sidi, maniġ a‑ra‑yili mayad?» yini‑asn: «innaġ illa miḍrus a‑ġ‑a‑n‑tmunun igadrn.»