luqa 16 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ah̬ddam lli‑iswingimn ġ‑ma‑ra‑iskr

¹ isawl‑daġ yasuɛ s‑imḥḍarn‑ns yini‑asn: «ha‑yan‑urgaz iṭṭafn ayda iggutn, ifl‑t ġ‑ufus n‑uh̬ddam‑ns a‑t‑igabl. isfld bu‑wayda f‑uh̬ddam‑an is‑a‑yas‑izzmzar ayda‑ns.

² iġr‑as s‑dars yini‑as: ‹ma‑iga ġayd mi fllak sflidġ? ašk‑id ġilad, nḥasab didi s‑ma‑tskrt s‑wayda‑nu, ašku ur‑sul‑riġ a‑dari‑th̬dmt.›

³ iswangm‑uh̬ddam, yini d‑ih̬f‑ns: ‹ma‑rad‑skrġ? ra‑yyi‑issufġ sidi. ur‑dusġ baš ad‑qqazġ akal, d‑ur‑rḍiġ a‑tḍalabġ mddn.

⁴ ssnġ ma‑rad‑skrġ baš a‑yyi‑n‑šškšamn mddn s‑darsn iġ‑iyi‑issufġ zġ‑twuri.›

⁵ yazn ilmma s‑kullu willi mi iḍfar sidis kra, isawl srsn yan s‑yan. isqsa amzwaru: ‹mnšk ad‑ak‑iḍfar sidi?›

⁶ yini‑as: ‹miyya n‑waṭṭaru n‑zzit.› yini‑as: ‹ha‑lḥsab‑nnk, skiws ġil ġil tarat gis smmus id‑mraw n‑waṭṭaru.›

⁷ isqsa wayyaḍ: ‹mnšk ad‑ak‑iḍfar?› yini‑as: ‹miyya n‑utllis n‑irdn.› yini‑as: ‹ha‑lḥsab‑nnk, ara gis tam id‑mraw n‑utllis.›

⁸ ġakudan yulġ bu‑wayda ah̬ddam‑ns‑lli yʷh̬šnn, ašku iswangm bahra ġ‑mayd iskr. ašku ar‑swingimn ayt‑ddunit‑ad ġ‑tġawsiwin‑nsn uggʷar n‑ayt‑tifawt.

⁹ rad‑awn‑iniġ, skarat‑awn imddukkʷal s‑wayda n‑ddunit‑ad, a‑kʷn‑in‑šškšmn s‑tgʷmma l‑lih̬rt ġakud nna‑itmma‑wayda.

awal f‑rbbi d‑wayda n‑ddunit

¹⁰ «yan iskarn lḥqq s‑tġawsiwin mẓẓinin ra‑t‑iskr ula s‑tġawsiwin mqqurnin. yan itffuġn zġ‑lḥqq s‑tġawsiwin mẓẓinin ra‑zgis‑iffuġ ula s‑tġawsiwin mqqurnin.

¹¹ iġ‑ur‑tskirm s‑nniyt s‑wayda n‑ddunit‑ad ma‑ra‑ifl ġ‑ufus‑nnun maylli ihiyyan s‑uggʷar?

¹² iġ‑ur‑tskirm s‑nniyt s‑ma‑igan win wiyyaḍ ma‑rad‑awn‑ifk ma‑igan winnun?

¹³ «ur‑ra‑yiẓḍar yan a‑iqasa sin id‑sidis. imma ra‑ikrhu yan yiri wayyaḍ, nġd ra‑ituqqar yan iḥgr wayyaḍ. ur‑ra‑tiẓḍarm a‑tgm ismgan n‑rbbi d‑win‑wayda.»

¹⁴ lliġ sfldn ifarisin i‑kullu mayd inna yasuɛ ar‑gis‑teṭnaẓn, ašku ntni ɛzzan darsn iqaridn.

¹⁵ imma ntta irur‑asn: «ha‑kunni ar‑tmalam ih̬fawn‑nnun ġ‑lgddam n‑mddn baš a‑fllawn‑ttinin tfulkim, walaynni rbbi issn ma‑illan ġ‑uwlawn‑nnun. ašku ġaylli iɛzzan dar mddn, tajlh̬it a‑iga dar rbbi.

awal l‑lmasiḥ f‑ššrɛ d‑ṭṭlaq

¹⁶ «ikka‑ttin ššrɛ n‑musa ula lanbiya ar‑malan i‑mddn ma‑ira rbbi aylliġ‑d‑yuška yuḥanna amsddam. imma ġilad ġ‑a‑tbrraḥġ s‑lh̬bar ifulkin n‑tgldit n‑rbbi, mmaġn kullu mddn a‑srs‑kšmn.

¹⁷ walaynni ra‑irh̬u ad‑ittin ignwan d‑wakal ula titti yat‑tnqiṭṭ zġ‑ššrɛ.

¹⁸ wanna ifran i‑tmġart‑ns itahl yat yaḍni, hati izna. d‑wanna itahln tanna ifran, ula nttan zzna ayan iskr.

lmɛna n‑umẓluḍ d‑bu‑wayda

¹⁹ «ha‑yan‑urgaz iṭṭafn ayda iggutn, ar‑ilssa aslham aẓggʷaġ d‑tmlsa šwanin, ar‑ištta ar‑issa ifrḥ d‑ih̬f‑ns kraygatt ass.

²⁰ yili‑daġ yan‑umẓluḍ ism‑ns liɛazr, ar‑d‑ittrus ġ‑imi n‑tgmmi n‑urgaz‑an. yuḍn s‑iḥbba ggutnin,

²¹ iẓuẓḍ a‑išš aynna‑d‑iṭṭarn zġ‑lmida n‑bu‑wayda. ula iḍan ar‑srs‑ttidun ar‑tllḥn iḥbba‑ns.

²² immt‑ilmma‑umẓluḍ‑lli, asin‑t lmalayka s‑tama n‑ibrahim. immt bu‑wayda ityawmḍal,

²³ irfufn bahra ġ‑udġar n‑willi mmutnin. yall alln‑ns iẓr‑n ibrahim ġ‑tuggugt iẓr‑n liɛazr ġ‑tama‑ns,

²⁴ iġr‑as: ‹wa‑baba ibrahim, ḥnnu gigi. ha‑yyi ġ‑lɛafit‑ad ar‑bahra‑trfufunġ. azn liɛazr a‑d‑issayk aḍaḍ‑ns aman, issilwiġ ils‑inu.›

²⁵ irar‑as ibrahim: ‹kti‑d a‑iwi is‑tumẓt timih̬ar‑nnk ġ‑ddunit, yamẓ liɛazr tarfufnt. imma ġilad ifrḥ liɛazr ġid, trfufnt kiyi.

²⁶ rad‑ak‑iniġ, tlla yat talat idran ġ‑gratnnġ didun. ttyawskar i‑ġmkad, a‑n‑ur‑bbin ġwid ranin a‑n‑bbin zġ‑darnnġ s‑darun, ula iẓḍar yan a‑d‑ibbi zġ‑darun s‑darnnġ.›

²⁷ yini‑as bu‑wayda: ‹wa‑baba ibrahim, walaynni ḍalbġ zġ‑gik a‑taznt liɛazr s‑tgmmi n‑baba,

²⁸ ašku llan sul ġin smmus aytma, ad‑asn‑yini a‑ur‑skarn zund nkki, a‑ur‑d‑kšmn ula ntni s‑udġar‑ad n‑urfufn iggutn.›

²⁹ irar‑as ibrahim: ‹aytmak, llan‑darsn‑warratn n‑musa ula win lanbiya. illa fllasn ad‑sflidn i‑ma‑ttinin ntni.›

³⁰ yini‑as bu‑wayda: ‹uhu a‑baba ibrahim, walaynni iġ‑n‑darsn‑yuška kra n‑yan zġ‑gr ġwilli mmutnin rad‑fln ddnub‑nsn wrrin s‑uġaras n‑rbbi.›

³¹ irar‑as ibrahim: ‹iġ‑ur‑a‑sflidn i‑musa ula lanbiya ur‑rad‑wrrin, wah̬h̬a‑d‑akkʷ‑inkr kra n‑yan zġ‑lmut.›»