luqa 14 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ ijjujji amaḍun ġ‑wass n‑usunfu

¹ yan‑wass n‑usunfu idda yasuɛ a‑išš ġ‑tgmmi n‑yan zġ‑inmġurn n‑ifarisin. gabln‑t ad‑ẓrn ma‑ra‑iskr.

² yašk‑id dars yan‑urgaz yuḍn bzgn‑as iḍarn d‑ifassn.

³ isawl yasuɛ i‑imslmdn n‑ššrɛ d‑ifarisin isqsa‑tn: «ma‑ittini ššrɛ n‑musa? is‑iḥlla a‑njjujji ġ‑wass n‑usunfu nġd uhu?»

⁴ imma ntni fssan. inkr yasuɛ yawi‑d argaz‑lli ijjujji‑t yadj‑t a‑iddu.

⁵ yini‑asn: «ma‑ra‑tskrm iġ‑awn‑in‑iḍr iwitun nġd tamugayt‑nnun ġ‑wanu ġ‑wass n‑usunfu? is‑ur‑ra‑tazzlm a‑ti‑di‑tldim?»

⁶ ur‑ẓḍarn ad‑as‑d‑rarn s‑yat f‑wawal‑ad.

awal f‑uskiws n‑imnsiwn

⁷ iẓr yasuɛ inbgiwn‑an ar‑zzggurun ih̬f‑nsn s‑uskiws l‑lgddam. yut‑asn lmɛna‑yad yini‑asn:

⁸ «iġ‑ak‑iɛrḍ kra n‑yan s‑tmġra a‑ur‑tamẓt askiws l‑lgddam, a‑ur‑n‑ikšm kra n‑yan‑k‑yugʷrn

⁹ yašk‑id ġwalli‑awn‑iɛrḍn yini‑ak: ‹nkr a‑iskiws‑urgaz‑ad.› ġakudan ra‑tḥšmt d‑ih̬f‑nnk twrrit s‑tġurdin n‑kullu mddn‑an.

¹⁰ walaynni ġakud nna‑yak‑iɛrḍ kra n‑yan, skiws ġ‑tġurdin. iġ‑d‑yuška bu‑tgmmi yini‑ak ‹ašk‑id a‑gʷma s‑lgddam,› ra‑k‑kullu‑uqqrn inbgiwn.

¹¹ ašku wanna issimġurn ih̬f‑ns ra‑t‑iẓẓimẓay rbbi, imma wanna iẓẓimẓayn ih̬f‑ns ra‑t‑issimġur.»

lmɛna n‑imnsi imqqurn

¹² yini yasuɛ ilmma i‑walli‑as‑iɛrḍn: «iġ‑trit a‑tskrt kra n‑imkli nġd kra n‑imnsi ad‑ur‑tɛrḍt i‑imddukkʷal‑nnk nġd aytmak nġd ayt‑dark nġd adjarn‑nnk lli‑dar lh̬ir. ašku ula ntni rad‑ak‑ɛrḍn tigira, tamẓt zġ‑darsn mad‑asn‑tfkit.

¹³ walaynni iġ‑trit a‑tskrt kra n‑imnsi imqqurn, ɛrḍ i‑imẓlaḍ d‑ikušamn d‑ibiḍarn d‑ibukaḍn.

¹⁴ ra‑k‑ibark rbbi ašku ntni ur‑darsn ma‑s‑a‑yak‑traran lh̬ir. rbbi a‑rad‑ak‑t‑irar ġ‑wass lli‑ġ‑ra‑d‑nkrn ġwilli‑f‑irḍa.»

¹⁵ isawl‑d yan zġ‑inbgiwn‑lli lliġ isfld i‑mayd inna yasuɛ, yini‑as: «ambarki a‑iga wanna ra‑išš imnsi ġ‑tgldit n‑rbbi.»

¹⁶ isawl yasuɛ yini‑as: «ha‑yan‑urgaz iskr imnsi imqqurn, iɛrḍ i‑kigan d‑mddn.

¹⁷ lliġ‑di‑tlkm tasaɛt n‑imnsi, yazn ah̬ddam‑ns a‑n‑yini i‑willi tyawɛraḍnin: ‹aškad‑d, ha‑kullu yujad.›

¹⁸ walaynni ar‑ssɛdarn ntni kullutn. yini‑as‑umzwaru: ‹a‑uddi, sġiġ yan‑igr, iqqan‑iyi‑d ad‑dduġ a‑t‑ẓrġ. ḍalbġ‑ak ad‑iyi‑tṣamḥt.›

¹⁹ yini wayyaḍ: ‹a‑uddi, sġiġ smmust‑tiygiw n‑izgarn. rad‑dduġ ġilad a‑tnt‑in‑armġ. ḍalbġ‑ak ad‑iyi‑tṣamḥt.›

²⁰ yini wayyaḍ yaḍni: ‹a‑uddi, bḥra‑d‑iwiġ tamġart, ur‑ẓḍarġ a‑n‑aškġ.›

²¹ iwrri‑d‑uh̬ddam yini iwaliwn‑ad i‑sidis. ṭiyyr‑as i‑bu‑tgmmi bahra, yini ġakudan i‑uh̬ddam‑ns: ‹ffuġ tazzlt ġ‑iswak ula tiswak n‑tmdint, tawid‑d imẓlaḍ d‑ikušamn d‑ibukaḍn d‑ibiḍarn.›

²² yan imikk iwrri‑d‑uh̬ddam yini‑as: ‹skrġ ma‑tnnit a‑sidi, walaynni sul iqama mani ih̬wan ġ‑uḥanu n‑imnsi.›

²³ yini bu‑tgmmi i‑uh̬ddam‑ns: ‹ffuġ‑daġ s‑iġarasn d‑tġarasin, tamrt mddn ad‑d‑kšmn ard tɛmmr‑tgmmi‑nu.

²⁴ ašku rad‑awn‑iniġ, ġwilli mi ɛrḍġ ġ‑isizwar, ur‑illi yan zġ‑gisn ra‑imḍi imnsi‑nu.›»

ma‑iẓḍarn a‑ig amḥḍar i‑lmasiḥ?

²⁵ munn‑d mddn ggutnin f‑yasuɛ ġ‑uġaras, igrawl gisn yini‑asn:

²⁶ «wanna‑d‑sri‑yuškan, ur‑iẓḍar a‑ig amḥḍar‑inu iġ‑ur‑a‑yyi‑ittiri uggʷar n‑babas d‑innas d‑tmġart‑ns d‑tarwa‑ns d‑aytmas d‑istmas, d‑ih̬f‑ns ula ntta.

²⁷ wanna ur‑yusin aggjdi‑ns imun didi, ur‑iẓḍar a‑ig amḥḍar‑inu.

²⁸ ma‑ra‑iskr wanna gigun iran a‑ibnu yal‑lbrj? is‑ur‑ra‑iskiws iskr lḥsab‑ns a‑iẓr is‑dars iqaridn ma‑s‑a‑t‑itkmmal?

²⁹ a‑ur‑izzugz llsas yaf‑n is‑ur‑iẓḍar a‑t‑ikmml. ġakudan ra‑gis‑ḍṣṣan kullu winna‑t‑ẓranin

³⁰ ar‑ttinin: ‹ġwad igra a‑ibnu walaynni ur‑iẓḍar a‑ikmml.›

³¹ ma‑ra‑iskr‑ugllid nna‑iran a‑iffuġ a‑immaġ d‑ugllid yaḍni? is‑ur‑ra‑iskiws a‑imšawar d‑imddukkʷal‑ns a‑iẓr is‑iẓḍar a‑inru s‑mraw id‑walf ġwalli‑t‑id‑imnaggarn s‑sin id‑mraw‑walf?

³² iġ‑as‑ur‑iẓḍar, rad‑as‑yazn arqqas sul‑n‑yaggug baš a‑d‑dids‑imšaška tili sslamt i‑ngratsn.

³³ ġmkad a‑s‑awn‑nniġ, wanna gigun ur‑ifiln kullu ma‑dars‑illan, ur‑ra‑yiẓḍar a‑ig amḥḍar‑inu.

³⁴ «tfulki tisnt walaynni iġ‑tlmus tisnt ma‑s‑ra‑stti‑tssmarġm?

³⁵ ur‑sul‑tgi i‑wakal ula tga i‑ugudi n‑umazir. ra‑stt‑awin mddn luḥn‑tt‑in s‑brra. wanna dar imzgan a‑srsn‑isflid, illa fllas a‑isfld.»