luqa 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

isawl lmasiḥ f‑ddnub ula lhalak

¹ sawln kra n‑mddn s‑yasuɛ ġakudan inin‑as f‑kra n‑ayt‑jalil, inġa‑tn lḥakm bilaṭus f‑iggi n‑tġrsiw lli‑n‑ssakmurn i‑rbbi.

² isawl yasuɛ yini‑asn: «ma‑tġalm f‑mddn‑an n‑ayt‑jalil? izd ntni a‑iskrn ddnub uggʷar n‑wiyyaḍ ġ‑jalil aylliġ rfufnn ġmkan?

³ uhu, walaynni rad‑awn‑iniġ, iġ‑ur‑tfilm ma‑tskarm yʷh̬šn rad‑kullu‑thlkm zund ntni.

⁴ ma‑tġalm f‑mddn lli‑f‑iḍr lbrj ġ‑silwam, inġ‑tn kullu s‑tam d‑mraw? izd ntni a‑yʷh̬šnn uggʷar n‑kullu wiyyaḍ ġ‑urušalim?

⁵ uhu, walaynni rad‑awn‑iniġ, iġ‑ur‑tfilm ma‑tskarm yʷh̬šnn, rad‑kullu‑thlkm zund ntni.»

lmɛna n‑tazart lli‑ur‑d‑yiwin lġllt

⁶ yut‑asn lmɛna‑yad yini‑asn: «ha‑yan‑urgaz, tlla dars yat tazart ttyawẓẓa ġ‑igr n‑waḍil. ar‑ittidu ar‑gis‑isiggil ikuzarn, ur‑a‑n‑gis‑itafa yat.

⁷ yini i‑uh̬ddam‑ns: ‹ẓr, kraḍ isggʷasn ayad siggilġ ikuzarn ġ‑tazart‑ad, ur‑jju‑gis‑ufiġ yat. zayd ġilad bbi‑tt a‑ur‑ġir‑tamẓ akal.›

⁸ isawl‑uh̬ddam yini‑as: ‹adj‑tt a‑sidi ġir ġasggʷasad, a‑stt‑nqšġ gġ‑as amazir.

⁹ iġ‑turu ġasggʷasad‑d‑yuškan, išwa. iġ‑ur‑turu, tbbit‑stt ilmma.›»

lmasiḥ ijjujji tuknit ġ‑wass n‑usunfu

¹⁰ illa yasuɛ ġ‑yat‑tgmmi n‑tẓallit ġ‑wass n‑usunfu ar‑isslmad.

¹¹ tili ġin yat‑tmġart, ikrf‑tt yal‑ljnn tam d‑mraw n‑usggʷas. tga tuknit, ur‑tẓḍar a‑tssnm tiddi‑ns.

¹² lliġ‑tt‑iẓra yasuɛ iġr‑as yini‑as: «wa‑tamġart, ha‑kmmi tfsit zġ‑uskrf‑nnm.»

¹³ isrs‑n fllas ifassn‑ns s‑tnm ġ‑tiddi‑ns ḥayna, ar‑ttalġ rbbi.

¹⁴ walaynni anmġur n‑tgmmi n‑tẓallit ṭiyyr‑as bahra f‑yasuɛ ašku ijjujji ġ‑wass n‑usunfu, inkr yini i‑mddn‑an: «sḍiṣ‑uwssan a‑illan a‑gisn‑tth̬damm. aškad‑d ġ‑uwssan‑an iġ‑tram a‑tjjim, walaynni urd ġ‑wass n‑usunfu.»

¹⁵ imma siditnnġ irur‑as: «wa‑id‑bu‑sin‑uwdmawn, manwa gigun ur‑ifssin i‑tmugayt‑ns nġd aġiyyul‑ns kraygatt ass n‑usunfu ar‑t‑itawi zġ‑rrwa s‑maniġ a‑issa?

¹⁶ ha‑tamġart‑ad tga illis n‑ibrahim, ikrf‑tt šiṭan tam d‑mraw n‑usggʷas ayad. is‑ur‑trim ad‑as‑fsiġ ġ‑wass n‑usunfu?»

¹⁷ lliġ‑as‑sfldn ġwilli‑t‑ẓinin, ḥšmn bahra zġ‑wawal‑ns, frḥn mddn kullutn s‑kullu lɛjayb lli‑iskar.

lmɛna n‑taqqayt imẓẓin ula tah̬mirt

¹⁸ yini‑asn yasuɛ: «mamnk a‑tga‑tgldit n‑rbbi? ma‑s‑rad‑awn‑tt‑ssrwasġ?

¹⁹ trwas yat taqqayt imẓẓin l‑lh̬rdl, yiwi‑tt yan‑urgaz iẓẓu‑tt ġ‑igr‑ns. tmġi‑d timġur twrri tga tasġart aylliġ a‑di‑ttaškin igḍaḍ n‑ignwan ar‑zddġn ġ‑gr ifrawn‑ns.»

²⁰ izayd yini‑asn: «ma‑s‑rad‑awn‑ssrwasġ tagldit n‑rbbi?

²¹ trwas tah̬mirt lli‑di‑tusi yat‑tmġart tg‑tt‑in ġ‑kraṭṭ lɛbrat mqqurnin n‑uggurn, tsskti lɛjin kullut.»

lmɛna n‑imi inukman

²² imun yasuɛ d‑uġaras n‑urušalim, ar‑itkka timdinin ula iduran ar‑gisn‑isslmad mddn.

²³ isqsa‑t yan yini‑as: «izd a‑sidi ġir kra idrusn a‑ra‑injm?» isawl yasuɛ yini‑asn:

²⁴ «gat‑n tiqqi‑nnun a‑tkšmm ġ‑imi inukman. ašku rad‑awn‑iniġ, iggut ma‑ra‑isiggil a‑n‑kšmn walaynni ur‑rad‑iẓḍarn.

²⁵ ašku ġakud nna‑ġ‑inkr bu‑tgmmi iqqn imi, ra‑tbiddm ġ‑brra ar‑n‑srs‑tssḍuqqurm ar‑ttinim: ‹rẓm‑aġ a‑sidi.› imma ntta rad‑awn‑yini: ‹ur‑ssinġ mani‑di‑tkkam kunni.›

²⁶ rad‑as‑ttinim: ‹ha‑nkkʷni nšša dik nsu dik, tsslmdt ġ‑tmdint‑nnġ.›

²⁷ imma ntta rad‑awn‑yini: ‹ur‑ssinġ mani‑di‑tkkam. ittiyat‑n zġ‑gigi kunni lli‑iskarn lh̬ʷšant.›

²⁸ mnšk a‑s‑ra‑tallam ar‑ttgẓaẓm uh̬san‑nnun ġakud nna‑tẓram ibrahim d‑isḥaq d‑yaɛqub d‑lanbiya kullutn ġ‑tgldit n‑rbbi, imma kunni iluḥ‑kʷn‑in s‑brra.

²⁹ rad‑d‑aškin ibrraniyn zġ‑ššrq ula lġrb ula ššamal ula ljanub, munn‑d f‑imnsi imqqurn ġ‑tgldit n‑rbbi.

³⁰ s‑ṣṣaḥt llan kra n‑imggura lli‑ra‑izwur, ula kra n‑imzwura lli‑ra‑iggʷru.»

isawl lmasiḥ f‑urušalim

³¹ aškin‑d kra n‑ifarisin ġ‑tasaɛt‑an, inin‑as: «han agllid hirudus ira a‑k‑inġ. yuf a‑n‑tittit zġ‑ġid tftut s‑kra n‑mani yaḍni.»

³² imma yasuɛ irur‑asn: «zaydat tinim i‑uwššn‑an: ‹ha‑yyi ar‑ssufuġġ ljnun ar‑jjujjiġ mddn ġassad d‑uzkka ar wis kraḍ‑uwssan rad‑kmmlġ.

³³ walaynni iqqan‑iyi‑d ad‑munġ d‑uġaras‑inu ġassad d‑uzkka d‑naf‑uzkka, ašku ur‑iẓḍar yan igan nnabi a‑immt abla ġ‑urušalim.›

³⁴ wa‑urušalim, wa‑urušalim, wa‑talli inqqan lanbiya n‑rbbi ar‑tkkatt s‑iẓran ġwilli‑d‑srm‑yuzn. mnnawt‑twal ad‑riġ ad‑d‑ssmunġ tarwa‑nnm ġmklli‑di‑tssmunu‑tfullust ikiyyawn ġ‑ddu ifrawn‑ns, imma kunni ur‑trim.

³⁵ han tigmmi n‑rbbi ġ‑wammas‑nnun ra‑th̬lu. rad‑awn‑iniġ, ur‑ra‑yyi‑tẓrm‑daġ ard tinim: ‹ambarki a‑iga ġwad‑d‑yuškan s‑ism n‑sidi rbbi.›»