luqa 12 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

iksaḍat rbbi urd bnadm

¹ munn‑d kigan d‑id‑walf n‑mddn ġ‑tasaɛt‑an, aylliġ a‑takʷln f‑ingratsn. igr yasuɛ ar‑isawal s‑imḥḍarn‑ns yini‑asn: «rarat lɛaql‑nnun zġ‑th̬mirt n‑ifarisin, ašku ntni sin‑uwdmawn ad‑skarn.

² kullu ma‑irgsn ra‑d‑ibayyn, d‑kullu ma‑intln ra‑ityawssan.

³ aynna tnnam ġ‑gratun rad‑as‑sfldn kullu mddn. aynna‑f‑tsawlm ġ‑tntla ġ‑ugʷns n‑tḥanut rad‑srs‑tbrraḥn f‑iggi n‑tgʷmma.

⁴ wa‑imddukkʷal‑inu rad‑awn‑iniġ, a‑ur‑tiksaḍm ġwilli nqqanin ddat walaynni tiġurdin n‑mayan ur‑sul‑ẓḍarn ad‑skrn yat.

⁵ rad‑awn‑mlġ manwa tiksaḍm. iksaḍat ġwalli iẓḍarn a‑inġ iluḥ‑n sul ġ‑jhnnama. rad‑awn‑iniġ, nttan a‑tiksaḍm.

⁶ is‑ur‑a‑nzzan smmus‑waȷ̈̇ȷ̈̇awȷ̈̇n s‑snat‑tqaridin? walaynni rbbi ur‑a‑gisn‑itettu yan.

⁷ imma kunni zġ‑inẓaḍn n‑ih̬f‑nnun iḥasb‑tn rbbi. a‑ur‑tiksaḍm, ašku tɛzzam dars uggʷar n‑waȷ̈̇ȷ̈̇awȷ̈̇n ggutnin.

⁸ «rad‑awn‑iniġ, wanna ittinin is‑iga winu ġ‑gr mddn, ula nkki lli‑igan yus n‑bnadm ra‑ttiniġ iga winu ġ‑dar lmalayka n‑rbbi.

⁹ imma wanna ittinin ur‑igi winu ġ‑gr mddn, ra‑ttiniġ ula nkki ur‑igi winu ġ‑dar lmalayka n‑rbbi.

¹⁰ wanna isawln ġ‑yus n‑bnadm, iẓḍar rbbi ad‑as‑iṣamḥ. walaynni yan irggmn rruḥ lqudus, ur‑rad‑as‑fllas‑iṣamḥ rbbi.

¹¹ iġ‑kʷn‑in‑ssbiddn ġ‑tgʷmma n‑tẓallit a‑fllawn‑ḥkamn, nġd ġ‑lgddam n‑inmġurn ula lḥukkam, ad‑ur‑tasim taġuft f‑ma‑ra‑tinim ula f‑ma‑s‑rad‑asn‑trarm,

¹² ašku rruḥ lqudus a‑rad‑awn‑iml ġ‑tasaɛt‑an maylli‑kʷn‑d‑iqqann ad‑asn‑ti‑tinim.»

lmɛna n‑bu‑wayda anafal

¹³ isawl‑d yan‑urgaz zġ‑gr mddn‑an yini‑as: «way‑amslmd, sawl s‑gʷma tinit‑as a‑didi‑ibḍu lwrt.»

¹⁴ irar‑as yasuɛ: «way‑argaz, ma‑yyi‑igan d‑lqaḍi fllawn baš ad‑awn‑aṭṭuġ ayda‑nnun?»

¹⁵ izayd yini‑asn: «rarat lɛaql a‑ur‑ttirim kra iggutn i‑ih̬f‑nnun, ašku tudrt n‑bnadm ur‑tlli s‑tuggt n‑wayda.»

¹⁶ yut‑asn lmɛna‑yad yini‑asn: «ha‑yan‑urgaz iggut‑dars‑wayda, yasi ṣṣabt iggutn zġ‑wakal‑ns.

¹⁷ iswangm d‑ih̬f‑ns ar‑ittini: ‹ma‑rad‑skrġ? ur‑dari maniġ a‑ssmunuġ kullu ṣṣabt‑ad.›

¹⁸ yini: ‹ġmkad a‑rad‑skrġ, rad‑h̬luġ iḥuna n‑imndi, bnuġ ma‑tn‑yugʷrn, ssmunġ‑n gisn imndi d‑lh̬ir‑inu kullut,

¹⁹ iniġ ilmma d‑ih̬f‑inu: iggut lh̬ir ma‑s‑a‑zrayġ kigan d‑isggʷasn. rad‑sunfuġ ar‑šttaġ ar‑ssaġ ar‑tfraḥġ.›

²⁰ walaynni argaz‑an, inna‑yas rbbi: ‹way‑anafal, ġ‑iḍ‑ad a‑ra‑k‑kkisġ zġ‑tudrt. win mi a‑ra‑ig kullu mayad‑di‑tssmunt?›»

²¹ izayd yasuɛ yini‑asn: «ġmkan a‑iga kullu wanna issmunun i‑ih̬f‑ns bla‑yas‑illa yat ġ‑dar rbbi.»

a‑ur‑tasim taġuft

²² isawl yasuɛ s‑imḥḍarn‑ns yini‑asn: «mayad a‑f‑rad‑awn‑iniġ, a‑ur‑tasim taġuft i‑tudrt‑nnun f‑ma‑ra‑tššm, ula i‑ddat‑nnun f‑ma‑rad‑as‑tlsm.

²³ ašku tudrt tuf amššu, ula ddat tuf timlsit.

²⁴ ẓrat ihaqqayn, ur‑a‑kkrzn ula‑da‑mggrn, ur‑darsn iḥuna nġd lbruj ma‑ġ‑a‑ssmunun, walaynni ar‑asn‑yakka rbbi amššu lli‑ḥtajjan. imma kunni, uggʷar n‑igḍaḍ a‑tɛzzam dar rbbi.

²⁵ ma‑iẓḍarn a‑izayd yat tasaɛt i‑tudrt‑ns s‑taġuft lli‑yusi?

²⁶ iġ‑ur‑tẓḍarm a‑tskrm mayd idrusn ma‑f‑a‑ttasim taġuft f‑tġawsiwin‑an yaḍni?

²⁷ ẓrat ijddign n‑tagant, mamnk a‑di‑tmġayn. ur‑a‑tllmn ula‑da‑ẓṭṭan walaynni rad‑awn‑iniġ, suliman s‑lhibt n‑tgldit‑ns ur‑jju‑ilsi zund yan zġ‑ijddign‑ad.

²⁸ iġ‑a‑isslsa rbbi tuga lli‑itmġayn ġassad ġ‑tagant ttyawgar‑n azkka ġ‑takat, is‑ur‑ra‑kʷn‑issls ula kunni s‑uggʷar? is‑ur‑tuminm s‑rbbi?

²⁹ a‑ur‑tlhum s‑ma‑tšttam ula ma‑tssam, ula‑da‑tssiḥilm ih̬f‑nnun s‑yat.

³⁰ ẓrat ayt‑ddunit‑ad kullutn, tiġawsiwin‑ad a‑s‑a‑tlhun. ula kunni, babatun issn is‑tnti‑tḥtajjam.

³¹ walaynni lhwat zwar s‑tgldit n‑rbbi s‑awn‑izuyd kullu tiġawsiwin‑an yaḍni.

ayda n‑ignna

³² «a‑ur‑tiksaṭṭ a‑tawrut imẓẓin. ifrḥ rbbi babatun ad‑awn‑ifk tagldit‑ns.

³³ zznzat ma‑teṭṭafm tbḍum‑t i‑imẓlaḍ. skarat i‑ih̬f‑nnun iqrban lli‑ur‑ra‑imdu, yili‑awn‑wayda ġ‑ignna illiġ ur‑ra‑zgis‑ityattay yat, ula iruḥ‑t‑umh̬h̬ar, ula tšša‑t‑twukka.

³⁴ ašku innaġ illa‑wayda‑nnun a‑ġ‑ra‑yili‑uwl‑nnun.

lmɛna n‑ih̬ddamn ḍufnin

³⁵ «bkisat tssrġm tifawin‑nnun

³⁶ a‑bdda‑tujadm, zund ih̬ddamn lli‑tqlnin s‑siditsn ard‑d‑iwrri zġ‑dar‑tmġra, irin ad‑as‑rẓmn imi ġakud nna‑d‑issḍuqqr.

³⁷ mnšk a‑s‑ra‑ifulki i‑ih̬ddamn‑an iġ‑d‑yuška siditsn yaf‑tn‑d ḍufn. rad‑awn‑iniġ, ra‑ibkis ntta yini‑asn ad‑skiwsn yawi‑asn‑d mad‑šttan.

³⁸ mnšk a‑s‑ra‑ifulki iġ‑tn‑d‑yufa ujadn, wah̬h̬a‑d‑yuška ġ‑ṭuẓẓunt n‑iyḍ nġd zikk zikk ṣbaḥ.

³⁹ walaynni rad‑awn‑iniġ, mrad is‑issn bu‑tgmmi managu a‑ra‑d‑yašk‑umh̬h̬ar, ur‑ra‑t‑yadj a‑inqb tigmmi‑ns.

⁴⁰ ula kunni illa fllawn a‑bdda‑tujadm, ašku rad‑d‑aškġ nkki lli‑igan yus n‑bnadm ġ‑kra n‑tasaɛt lli‑ur‑tġalm.»

⁴¹ isqsa‑t bṭrus yini‑as: «wa‑sidi, izd fllannġ a‑f‑tutt lmɛna‑yad nġd kullu mddn?»

⁴² isawl siditnnġ yini: «manwa igan ah̬ddam ifulkin bab l‑lɛaql? nttan a‑mi‑ra‑ifl sidis tigmmi‑ns baš a‑yaṭṭu f‑ih̬ddamn yaḍni ad‑šttan, kraygatt yan ġ‑tasaɛt‑ns.

⁴³ ambarki a‑iga‑uh̬ddam nna‑mi‑d‑iwrri sidis yaf‑t‑id ar‑iskar mayan.

⁴⁴ lḥqq a‑rad‑awn‑iniġ, rad‑as‑ifl sidis ayda‑ns kullut ġ‑ddu‑ufus‑ns.

⁴⁵ walaynni iġ‑idda‑uh̬ddam‑an yini d‑ih̬f‑ns: ‹imaṭl‑n sidi› ar‑ikkat ih̬ddamn d‑th̬ddamin ar‑ištta ar‑issa ar‑issnuful ih̬f‑ns s‑tissi,

⁴⁶ han ra‑d‑iwrri sidis ġ‑yan‑wass lli‑f‑ur‑iskir ula yat tasaɛt lli‑ur‑iġal. ġakudan ra‑t‑ibri sidis ig‑t‑in d‑inuwwašn n‑rbbi.

⁴⁷ ah̬ddam nna‑issnn ma‑zgis‑ira sidis walaynni ur‑t‑inawl ula iskr‑t, ra‑t‑issġurš sidis bahra.

⁴⁸ imma ah̬ddam nna‑iskrn ma‑f‑t‑id‑iqqan‑ukuray bla issn ma‑zgis‑ira sidis, ra‑t‑issġurš ġir imikk. ašku wanna mi ifka sidis ma‑iggutn, ra‑zgis‑iḍalb ma‑iggutn, d‑wanna mi ifka uggʷar ra‑zgis‑iḍalb uggʷar.

tibḍit f‑ssibt l‑lmasiḥ

⁴⁹ «uškiġ‑d nkki ad‑luḥġ lɛafit ġ‑ddunit. amar yufan a‑tznd ġilad.

⁵⁰ rad‑sul‑ddmġ s‑yan‑udum išqan. mnšk a‑s‑flla‑iẓẓay ard ikmml.

⁵¹ is‑tġalm is‑d‑uškiġ ad‑skrġ lhna ġ‑ddunit? uhu, rad‑awn‑iniġ urd lhna walaynni tibḍit.

⁵² ġilad s‑uflla iġ‑llan smmus ġ‑yat‑tgmmi rad‑bḍun kraḍ d‑sin ula sin d‑kraḍ.

⁵³ ra‑ibḍu‑urgaz d‑yus, ibḍu‑ufruh̬ d‑babas. ra‑tbḍu‑tmġart d‑illis, tbḍu‑tfruh̬t d‑innas. ra‑tbḍu‑tḍggʷalt d‑tmġart n‑yus, tbḍu‑tslit d‑innas n‑urgaz‑ns.»

ur‑tssinm lmɛna n‑uwssan‑ad

⁵⁴ ġakudan isawl‑daġ yasuɛ s‑mddn‑an ggutnin yini‑asn: «ġakud nna‑tẓram amdlu iġli‑d zġ‑lġrb ar‑ttinim: ‹ra‑yili‑unẓar,› s‑nnit‑illa.

⁵⁵ ġakud nna‑tẓram aḍu ikka‑d ljanub ar‑ttinim: ‹ra‑irġ lḥal,› s‑nnit‑irġa.

⁵⁶ wa‑id‑bu‑sin‑uwdmawn, kunni tssnm lmɛni n‑ikalln d‑ignwan. mah̬ ur‑tẓḍarm a‑tissanm lmɛna n‑kullu mayad darun ijrrun ġ‑uwssan‑ad?

⁵⁷ mah̬ aylliġ ur‑a‑tswingimm d‑ih̬f‑nnun ġ‑ma‑kʷn‑d‑iqqann a‑tskarm?

⁵⁸ iġ‑ak‑iṣrḍ kra n‑yan s‑lmḥkama, g‑n tiqqi‑nnk a‑d‑dids‑tmšaškat ġ‑uġaras, a‑k‑ur‑izukr s‑dar lqaḍi, idḥi‑k lqaḍi i‑umh̬zni, iluḥ‑k‑in‑umh̬zni ġ‑lḥbs.

⁵⁹ rad‑ak‑iniġ, ur‑ra‑tffuġt zġ‑ġin ard tfrut taqaritt iggʷran.»