luqa 10 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ yuzn ssa n‑id‑mraw d‑sin n‑umḥḍar

¹ tiġurdin n‑mayan isti siditnnġ ssa n‑id‑mraw d‑sin (72) n‑umḥḍar yaḍni, yazn‑tn sin s‑sin a‑t‑zwurn s‑kraygatt tamdint ula kraygatt mani lli‑zġ‑ra‑izri ntta.

² yini‑asn: «tggut‑tmgra walaynni drusn ih̬ddamn. ḍalbat bu‑tmgra a‑yazn ih̬ddamn ad‑ssmunn tamgra‑ns.

³ zaydat, uznġ‑kʷn ġilad zund ilqqaġn ġ‑gr‑uwššann.

⁴ a‑ur‑tasim awmmis ula aqʷrab ula turẓiyin. a‑ur‑tbiddm ar‑tnsallamm d‑yan ġ‑uġaras.

⁵ tigmmi nna‑s‑tkšmm, tinim‑asn: ‹ad‑awn‑tili sslamt.›

⁶ iġ‑gis‑illa yan ittirin sslamt, rad‑as‑tili sslamt lli‑s‑tnnam. iġ‑ur‑illi, ur‑ra‑gis‑tqama sslamt‑nnun.

⁷ qamayat ġ‑tgmmi nna‑s‑tkšmm ar‑tšttam ar‑tssam aynna‑yawn‑d‑fkan, ašku ah̬ddam isthlla tiġrad‑ns. a‑ur‑ttidum zġ‑tgmmi s‑tgmmi.

⁸ tamdint nna‑kʷn‑iran iġ‑n‑srs‑tkšmm, šttayat aynna‑yawn‑d‑srsn imzdġn‑ns

⁹ ar‑tjjujjim imuḍan‑nsn ar‑asn‑ttinim: ‹ha‑tagldit n‑rbbi takmur‑awn‑d.›

¹⁰ walaynni tamdint nna‑ur‑kʷn‑irin iġ‑n‑srs‑tkšmm, zriyat ġ‑tswak‑ns ar‑ttinim:

¹¹ ‹ula agdrur n‑tmdint‑nnun lli‑usin iḍarn‑nnġ, ar‑t‑nssusus. walaynni swangmat tissanm is‑di‑takmur‑tgldit n‑rbbi.›

¹² rad‑awn‑iniġ, ra‑išqu‑wass l‑lḥsab f‑ayt‑tmdint‑an uggʷar n‑ayt‑sadum.

¹³ «taguḍi a‑rad‑awn‑yili ay‑ayt‑kurazin. taguḍi a‑rad‑awn‑yili ay‑ayt‑bitṣayda. han lmɛjizat lli‑skrġ ġ‑darun, mrad is‑tnt‑skrġ ġ‑tmdinin n‑ṣur d‑ṣayda ikun knan imzdġn‑nsnt s‑wakal ġakudan, lsn lh̬iš gn iġd f‑ih̬fawn‑nsn, fln kullu mad‑skarn yʷh̬šn.

¹⁴ ra‑fllawn‑išqu‑wass l‑lḥsab uggʷar n‑ayt‑ṣur d‑ayt‑ṣayda.

¹⁵ imma kunni ay‑ayt‑kafrnaḥum, is‑tram a‑tlkmm ignwan? han ra‑kʷn‑in‑iluḥ rbbi ġ‑tdrut n‑wakal.»

¹⁶ yini ilmma yasuɛ i‑imḥḍarn‑ns: «wanna isflidn s‑wawal‑nnun, isfld sri. wanna‑kʷn‑ur‑irin, ur‑iyi‑iri ula nkki. d‑wanna‑yyi‑ur‑irin, ur‑iri ġwalli‑yyi‑d‑yuznn.»

¹⁷ wrrin‑d ssa n‑id‑mraw d‑sin n‑umḥḍar, frḥn bahra ar‑ttinin: «wa‑sidi, ula ljnun ar‑tn‑ntamr s‑ism‑nnk ar‑skarn s‑wawal‑nnġ.»

¹⁸ yini‑asn yasuɛ: «ẓriġ šiṭan iḍr‑d zġ‑ignwan zund usmann.

¹⁹ hati fkiġ‑awn taẓḍḍart a‑takʷlm f‑ilgmmaḍn d‑iġrdmiwn, tnrum kullu taḥkimt n‑unuwwaš, ur‑ra‑kʷn‑isshrš yat.

²⁰ walaynni rad‑awn‑iniġ, a‑ur‑tfrḥm f‑ssibt l‑ljnun ar‑skarn s‑wawal‑nnun, walaynni frḥat f‑ssibt n‑ma‑tyaran ismawn‑nnun ġ‑ignna.»

ifrḥ lmasiḥ bahra

²¹ ifrḥ yasuɛ bahra ġ‑tasaɛt‑an s‑lfrḥ n‑rruḥ lqudus, iẓẓall yini: «wa‑baba, sidis n‑ignna d‑wakal, ulġġ‑k ašku tssntlt tiġawsiwin‑ad f‑ayt‑lɛaql d‑lfhmt, tssmlt‑tnt i‑ibujadiyn. ašku ġmkad a‑s‑trḍit a‑baba.»

²² yini ilmma i‑mddn‑an: «ġ‑ddu‑ufus‑inu a‑ġ‑iga baba kullu ma‑illan. ur‑illi ma‑issnn yus n‑rbbi abla babas, ula illa ma‑issnn baba abla nkki lli‑igan yus d‑willi qṣadġ ad‑asn‑t‑mlġ.»

²³ igrawl‑d yasuɛ s‑dar imḥḍarn‑ns yini‑asn waḥdutn: «timbarkiyin ad‑gant‑walln‑ad ẓranin mayd tẓram kunni.

²⁴ rad‑awn‑iniġ, ggutn lanbiya d‑igldan ẓuẓḍn ad‑ẓrn mayd tẓrram walaynni ur‑t‑ẓrin, ẓuẓḍn ad‑sfldn i‑mayd mi tsflidm walaynni ur‑as‑sfldn.»

gu‑samira ifulkin

²⁵ yašk‑id yan‑umslmd n‑ššrɛ yiri a‑yarm yasuɛ ġ‑wawal‑ns, yini‑as: «way‑amslmd, ma‑rad‑skrġ baš ad‑ṭṭafġ tudrt l‑lih̬rt?»

²⁶ irar‑as yasuɛ: «ma‑ityaran ġ‑ššrɛ? ma‑gis‑tġrit?»

²⁷ yini‑as: «‹a‑ttirit rbbi sidik zġ‑ttmi n‑ih̬f‑nnk d‑ttmi n‑uwl‑nnk d‑ttmi n‑tẓḍḍart‑nnk d‑ttmi l‑lɛaql‑nnk,› ‹tirit adjar‑nnk zund ih̬f‑nnk.›»

²⁸ isawl yasuɛ yini‑as: «tʷġẓant. skar mayad tddrt.»

²⁹ walaynni amslmd‑lli n‑ššrɛ ira a‑issbayyn ih̬f‑ns, isqsa‑t: «ma‑igan adjar‑inu?»

³⁰ isawl yasuɛ yini‑as: «ha‑yan‑urgaz imudda ar‑ittidu ġ‑uġaras zġ‑urušalim s‑tmdint n‑ariḥa. amẓn‑t imh̬h̬arn kkisn‑as kullu ma‑dars‑illan, ssyaggasn‑t fln‑t‑in ġ‑gr lmut d‑tudrt.

³¹ ha‑yan zġ‑inmġurn n‑tgmmi n‑rbbi ikka‑d aġaras‑an. lliġ‑t‑in‑iẓra yanf‑as imun d‑tsga yaḍni.

³² ha‑yan yaḍni zġ‑ih̬ddamn n‑tgmmi n‑rbbi, imun‑d d‑uġaras, iddu aylliġ‑n‑srs‑yuggʷa, izri ula ntta zġ‑tsga yaḍni.

³³ walaynni ha‑yan‑ubrrani gu‑samira imudda ula ntta, iruḥ‑d argaz‑an. lliġ‑t‑iẓra iqama gis bahra.

³⁴ iddu s‑dars ig zzit d‑waman n‑waḍil iktin i‑tiggas‑ns yass‑as‑tnt. issni‑t f‑lbhimt isslkm‑t s‑yal‑lfndq igabl‑t gis.

³⁵ ndid azkka ildi‑d sin iqaridn n‑nnuqrt ifk‑tn i‑bu‑lfndq yini‑as: ‹thalla gis. iġ‑fllas‑tssh̬srt uggʷar n‑mayd‑ak‑fkiġ, rad‑ak‑t‑zaydġ ġakud nna‑d‑wrriġ ġ‑uġaras‑ad.›»

³⁶ isqsa‑t yasuɛ: «manwa tnnit ġ‑kraḍ‑ad a‑iwrrin iga adjar i‑walli iḍrn ġ‑ifassn n‑imh̬h̬arn?»

³⁷ yini‑as: «ġwalli gis iḥnnan.» yini‑as yasuɛ: «zayd ula kiyi ar‑tskart zund mayan.»

igawr lmasiḥ dar marta d‑maryam

³⁸ munn‑daġ d‑uġaras aylliġ lkmn yan‑uduwwar lli‑ġ‑tzdġ yat‑tmġart ism‑ns marta. tšškšm yasuɛ s‑tgmmi‑ns.

³⁹ tili‑dars‑uwlltmas ism‑ns maryam, tskiws nttat ġ‑dar iḍarn n‑siditnnġ ar‑tsflid i‑ma‑ittini.

⁴⁰ imma marta tlha bahra s‑asi‑srs, tašk‑id s‑yasuɛ tini‑as: «wa‑sidi, is‑ur‑tnnit yat i‑uwlltma‑yad f‑twuri‑ad ġ‑iyi‑n‑tfl waḥduyyi? ini‑as a‑tnkr a‑yyi‑tɛawn.»

⁴¹ isawl srs siditnnġ yini‑as: «marta, marta, ha‑kmmi tuḥlt bahra, thuwwlt ih̬f‑nnm s‑kigan d‑tġawsiwin.

⁴² ġir yat‑tġawsa a‑d‑iqqann. hatti maryam th̬tar taġamt lli‑ifulkin. ur‑illi ma‑rad‑as‑tt‑ikkis.»