luqa 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ ggutn ġwilli granin a‑taran f‑tġawsiwin lli‑darnnġ‑jranin

² ġmklli‑aġ‑nnan ġwilli‑tnt‑ẓranin zġ‑isizwar, gn fllasnt inagan awin‑aġ‑d lh̬bar‑nsnt.

³ mayan a‑f‑nniġ ra‑ifulki ad‑ak‑ssngaddaġ yan‑warra izgan, a‑sidi iɛzzan tawfilus, ašku sigglġ bahra ġ‑tġawsiwin‑ad ġmklli gant zġ‑isizwar,

⁴ baš a‑tissant lḥqq kullut f‑maylli mi tsfldt.

isawl lmalak jibrayyil i‑zakariyya

⁵ ġ‑uwssan n‑hirudus agllid n‑tmazirt n‑yudaya, illa yan‑unmġur zġ‑inmġurn n‑tgmmi n‑rbbi, ism‑ns zakariyya. iga ntta zġ‑rrbɛt n‑abiyya, iṭṭaf tamġart zġ‑tasut n‑harun, ism‑ns aliṣabaṭ.

⁶ ntni fulkin s‑sin, irḍu fllasn sidi rbbi. ar‑bdda‑skarn s‑iwaliwn n‑rbbi ula luṣiyat‑ns, ur‑a‑zgisnti‑tffuġn s‑yat.

⁷ walaynni ur‑jju‑darsn kra n‑warraw, ašku ur‑tẓḍar aliṣabaṭ a‑trbbu, d‑ntni s‑sin uwssrn.

⁸ yan‑wass iskr zakariyya tawuri‑ns n‑inmġurn n‑tgmmi n‑rbbi ašku tlkm‑d‑twala n‑rrbɛt‑ns.

⁹ grn‑d inmġurn asġar ġmklli bdda skarn, baš ad‑bḍun tawuri i‑ngratsn. yašk‑id‑usġar ġ‑zakariyya a‑ikšm s‑tḥanut tamẓlayt a‑n‑gis‑ibh̬h̬r ġ‑lgddam n‑rbbi.

¹⁰ ikšm srs ġ‑tasaɛt l‑lbh̬ur, munn‑d mddn ggutnin ġ‑brra ar‑tẓallan.

¹¹ iban‑as ġakudan yal‑lmalak n‑sidi rbbi, ibidd ġ‑tsga tafasit l‑lmida lli‑f‑a‑tbh̬h̬arn.

¹² lliġ‑t‑iẓra zakariyya iġuwḍ yiksaḍ.

¹³ isawl lmalak yini‑as: «wa‑zakariyya, ad‑ur‑tiksaṭṭ. isfld rbbi i‑maylli‑as‑ttḍalabt. rad‑ak‑taru‑tmġart‑nnk aliṣabaṭ yan‑wazzan, tgt‑as ism ‹yuḥanna›.

¹⁴ rad‑ak‑yili lfrḥ ula taḍṣa, frḥn mddn ggutnin s‑tlalit‑ns.

¹⁵ ašku ra‑ig wad ihiyyan ġ‑iẓri n‑sidi rbbi. ur‑ra‑issa ma‑iktin ula ma‑issmllilin. ra‑iɛmmr s‑rruḥ lqudus ġ‑waḥlig n‑innas,

¹⁶ irar‑d kigan d‑mddn n‑ayt‑rbbi ad‑d‑wrrin s‑uġaras n‑rbbi‑nsn.

¹⁷ ra‑izwur siditnnġ s‑tḥkimt itjhhdn zund nnabi iliyya, irar‑d ulawn n‑mddn a‑tḥnnun ġ‑tarwa‑nsn, irar‑d ġwilli ffuġnin zġ‑wawal n‑rbbi ad‑d‑wrrin s‑uġaras n‑willi‑f‑irḍa, ijjujad i‑siditnnġ yat tasut a‑tg tins.»

¹⁸ yini zakariyya i‑lmalak: «mamnk a‑s‑rad‑issanġ is‑ra‑yili mayad? hati afqqir ayd‑giġ, ula tamġart‑inu tuwssr.»

¹⁹ yini‑as lmalak: «nkki giġ jibrayyil, ar‑tbddadġ ġ‑lgddam n‑rbbi. yuzn‑iyi‑d a‑srk‑sawlġ awiġ‑ak‑d lh̬bar‑ad ifulkin.

²⁰ walaynni ra‑tgt aẓnẓum, ur‑ra‑tsawlt ar ass nna‑ġ‑ijra mayd‑ak‑nniġ, ašku ur‑tumint awal‑inu lli‑ra‑yafu ġ‑uzmz‑ns.»

²¹ ar‑tqln mddn s‑zakariyya, ar‑ssmqsan i‑ngratsn: «mah̬ aylliġ‑n‑imaṭl ġ‑tḥanut tamẓlayt?»

²² lliġ‑d‑iffuġ ur‑iẓḍar a‑srsn‑isawl, issann is‑iẓra kra issbayyn‑as‑t‑id rbbi ġ‑tḥanut tamẓlayt. iml‑asn zakariyya s‑ifassn‑ns f‑mad‑as‑ijran, ašku ur‑iẓḍar a‑isawl.

²³ izayd ilmma ikmml ussan n‑twuri‑ns, iwrri s‑tgmmi‑ns.

²⁴ zrin kra n‑uwssan s‑a‑trbbu‑tmġart‑ns aliṣabaṭ. tqama ġ‑tgmmi‑ns smmus‑iyrn.

²⁵ ar‑ttini: «hati ġilad ibark gigi sidi rbbi, isfiḍ lɛar‑inu ġ‑gr mddn.»

isawl lmalak jibrayyil i‑maryam

²⁶ zrin ilmma sḍiṣ‑iyrn, yazn rbbi lmalak jibrayyil s‑yat‑tmdint ġ‑tmazirt n‑jalil ism‑ns naṣira,

²⁷ s‑yat‑tɛyyalt iḍalb‑tt‑in yan‑urgaz ism‑ns yusf zġ‑tasut n‑ugllid dawd. ig ism n‑tɛyyalt maryam.

²⁸ ibidd srs lmalak yini‑as: «sslam fllam, a‑tambarkit. sidi rbbi illa didm.»

²⁹ tġuwḍ maryam f‑wawal‑ns, tsqsa ih̬f‑ns mah̬ aylliġ srs isawl ġmkan.

³⁰ imma lmalak isawl‑daġ yini‑as: «wa‑maryam, ad‑ur‑tiksaṭṭ, ašku rbbi irḍa fllam.

³¹ hati ra‑trbbut, tarut yan‑wazzan, tgt‑as ism ‹yasuɛ›.

³² ra‑ig wad bahra ihiyyan. rad‑as‑ttinin ‹yus n‑umattuy›. rad‑as‑ifk sidi rbbi lɛrš n‑jddis dawd,

³³ ig agllid f‑tarwa n‑yaɛqub kullu mayd‑d‑iftan. tagldit‑ns ur‑ra‑sar‑ttmmu.»

³⁴ tini‑as maryam i‑lmalak: «mamnk a‑ra‑yili mayad? ur‑jju‑ssinġ kra n‑urgaz.»

³⁵ yini‑as lmalak: «ra‑d‑fllam‑igguz rruḥ lqudus, tdl‑km‑tḥkimt n‑rbbi amattuy. mayan a‑f‑ra‑ttinin i‑wazzan amẓlay lli‑ra‑tarut ‹yus n‑rbbi›.

³⁶ han aliṣabaṭ lli‑igan zġ‑ayt‑darm, ula nttat ar‑trbbu s‑yan‑wazzan ġ‑tuwssrt‑ns. han h̬talli‑f‑a‑ttinin mddn ur‑tẓḍar a‑trbbu, wis sḍiṣ‑iyrn ayd‑dars‑illan.

³⁷ ašku ur‑illi kra mi ur‑iẓḍar rbbi a‑t‑iskr.»

³⁸ tsawl maryam tini: «ha‑yyi giġ tah̬ddamt n‑sidi rbbi. ad‑iyi‑yili mayd‑iyi‑tnnit.» ifl‑tt lmalak ġakudan.

amuddu n‑maryam s‑dar aliṣabaṭ

³⁹ ur‑tmaṭil maryam, tnkr ġ‑uwssan‑an tddu s‑yat‑tmdint ġ‑iwrar n‑yudaya,

⁴⁰ tlkm‑n tigmmi n‑zakariyya tġr s‑aliṣabaṭ.

⁴¹ lliġ tsfld aliṣabaṭ i‑wawal n‑maryam immass‑wazzan ġ‑waḥlig‑ns, tɛmmr s‑rruḥ lqudus,

⁴² tall awal‑ns tini: «tambarkit a‑tgit ġ‑tmġarin. ambarki a‑iga‑warraw n‑waḥlig‑nnm.

⁴³ mad‑giġ nkki aylliġ‑d‑dari‑tuška innas n‑sidi?

⁴⁴ ġir sfldġ i‑wawal‑nnm s‑immussa‑wazzan s‑lfrḥ ġ‑waḥlig‑inu.

⁴⁵ tambarkit a‑tgit ašku tumnt is‑rad‑am‑issafu sidi rbbi awal lli‑s‑am‑inna.»

talġat n‑maryam i‑rbbi

⁴⁶ tsawl maryam tini: «yulġ‑uwl‑inu sidi rbbi,

⁴⁷ tfrḥ rruḥ‑inu s‑rbbi anjjam‑inu,

⁴⁸ ašku iẓra‑d lḥalt n‑th̬ddamt‑ns imẓẓin. hati zġ‑ġilad kraygatt tasut rad‑iyi‑ttini ‹tambarkit›,

⁴⁹ ašku rbbi itjhhdn iskr gigi tiġawsiwin mqqurnin. illa luqr i‑ism‑ns,

⁵⁰ tili rrḥmt‑ns f‑kullu willi‑t‑uqqrnin zġ‑kraygatt tasut n‑tasutin.

⁵¹ hati imdi‑d afus‑ns itjhhdn, izzmzr udmawn mqqurnin f‑iswingimn l‑lɛaql‑nsn.

⁵² iluḥ‑n igldan zġ‑lɛrš‑nsn, yall‑d ayt‑iyzdar s‑uflla.

⁵³ iššbaɛ s‑tmih̬ar ġwilli inġa laẓ, irar ayt‑wayda bla yat.

⁵⁴ irḥm‑aġ s‑rrḥmt‑ns idumn, ibidd d‑ayt‑yaɛqub lli‑igan ih̬ddamn‑ns.

⁵⁵ issafu awal lli‑s‑inna i‑imzwura‑nnġ, ur‑jju‑ittu ibrahim ula tarwa‑ns.»

talalit n‑yuḥanna amsddam

⁵⁶ tgawr maryam ġ‑dar aliṣabaṭ ma‑itggan kraḍ‑iyrn, twrri s‑tgmmi‑ns.

⁵⁷ imma aliṣabaṭ, ġakud lliġ‑tt‑ilkm‑uzmz taru yan‑wazzan.

⁵⁸ frḥn‑dids‑wadjarn‑ns ula ayt‑dars lliġ sfldn f‑mamnk ad‑bahra‑gis‑ibark rbbi.

⁵⁹ aškin‑d ilmma ġ‑wis tam‑uwssan ad‑ẓẓalln i‑wazzan. irin ad‑as‑gn ism ‹zakariyya› ašku iga ism n‑babas.

⁶⁰ tsawl‑d innas tini: «uhu, rad‑as‑ng ism ‹yuḥanna›.»

⁶¹ inin‑as: «walaynni ur‑illi yan ġ‑ayt‑darm iṭṭafn ism‑ad.»

⁶² sillfn i‑babas a‑t‑sqsan man ism ira ad‑as‑ig.

⁶³ isillf‑asn zakariyya baš ad‑as‑d‑awin yat talluḥt, yara gis: «ism‑ns yuḥanna.» tɛjjbn kullutn.

⁶⁴ s‑ifsi ils n‑zakariyya ġakudan, ar‑isawal ar‑italġ rbbi.

⁶⁵ ggʷdn ġwilli zdġnin ġin, awin lh̬bar f‑kullu mayd ijran ġ‑tmazirt‑an n‑iwrar n‑yudaya kullutt.

⁶⁶ ġwilli fllas sfldnin ar‑bahra‑swingimn ar‑ttinin i‑ngratsn: «ma‑ra‑ig‑wazzan‑ad?» ašku illa‑dids‑ufus n‑rbbi.

maylli imla rruḥ lqudus i‑zakariyya

⁶⁷ iɛmmr zakariyya babas s‑rruḥ lqudus, isawl s‑mad‑as‑imla rbbi yini:

⁶⁸ «ad‑bahra‑nalġ sidi rbbi n‑ayt‑darnnġ, ašku yakmur‑d s‑mddn‑ns ad‑aġ‑ifukku.

⁶⁹ issmġi‑d ġ‑gr tasutin n‑uh̬ddam‑ns dawd yan igan anjjam itjhhdn,

⁷⁰ ġmklli inna f‑imi l‑lanbiya‑ns imẓlayn ġayd izrin,

⁷¹ baš ad‑aġ‑ijjnjm zġ‑inuwwašn‑nnġ ula kullu willi‑aġ‑kurhanin.

⁷² hati irḥm‑aġ ġmklli inna i‑imzwura‑nnġ, issafu lɛhd‑ns ihiyyan,

⁷³ ġmklli inna i‑babatnnġ ibrahim s‑wawal izgan.

⁷⁴ rad‑aġ‑ifukku zġ‑gr ifassn n‑inuwwašn‑nnġ, baš a‑ntɛbad bla nksuḍ yat,

⁷⁵ ar‑nskar ma‑ifulkin ula ma‑t‑irḍan kullu ussan n‑tudrt‑nnġ.

⁷⁶ imma kiyi a‑iwi, rad‑ak‑ttinin ‹nnabi n‑rbbi amattuy›. ra‑tzwurt siditnnġ ad‑as‑tjjujadt aġaras.

⁷⁷ ra‑tmalat i‑mddn‑ns mamnk a‑s‑ra‑tn‑ijjnjm, iṣamḥ‑asn f‑kullu mad‑skrn yʷh̬šn.

⁷⁸ ašku irḥm‑aġ rbbi‑nnġ, iḥnnu ginnġ. hati zund tafukt a‑ra‑t‑id‑fllannġ‑issġli,

⁷⁹ yisfiw f‑willi zdġnin ġ‑tillas d‑umalu l‑lmut, isslkm iḍarn‑nnġ s‑uġaras n‑sslamt.»

⁸⁰ izayd‑uḥšmi yuḥanna ar‑itimġur ar‑itdus ġ‑rruḥ‑ns. iqama ġ‑lh̬la ar ass lli‑ġ‑igra ġ‑twuri‑ns ġ‑wammas n‑ayt‑rbbi.