kulussi 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ imma kunni a‑id‑siditsn, skarat d‑ih̬ddamn‑nnun s‑lḥqq, ar‑asn‑takkam ma‑tn‑d‑yuškan. a‑ur‑tettum izd ula kunni illa‑yawn yan igan siditun ġ‑ignna.

luṣit i‑aytmatn

² zaydat ar‑bdda‑ttẓallam ar‑tḍalabm rbbi, trarm lɛaql s‑mad‑as‑ttinim ar‑ti‑ttškarm bahra.

³ ḍalbat‑t ula f‑ssibt‑nnġ nkkʷni, baš a‑irẓm ġ‑lgddam‑nnġ yan‑imi a‑ntbrraḥ i‑mddn s‑wawal‑ns, nml‑asn maylli mi ur‑jju‑sfldn f‑lmasiḥ. f‑ssibt n‑wawal‑ad a‑f‑lliġ nkki ġ‑lḥbs,

⁴ walaynni ḍalbat rbbi a‑yyi‑iɛawn ad‑tafaġ iwaliwn ma‑s‑a‑ssfhamġ mddn ġmklli‑yyi‑d‑iqqan.

⁵ skarat s‑tḥkimt d‑kullu willi ur‑ginin win rbbi, ar‑tskarm afulki nna‑mi‑tufam kraygatt tasaɛt.

⁶ sawalat s‑iwaliwn šwanin mimnin, tissanm mamnk a‑ttraram i‑kraygatt yan awal nna‑t‑ih̬ṣṣan.

tugga f‑aytmatn

⁷ rad‑awn‑yini tih̬ikus f‑kullu ma‑igan lh̬bar‑inu. iga gʷmatnnġ iɛzzan, ig ah̬ddam ifulkin, ar‑didnnġ‑itmɛawan ġ‑twuri n‑siditnnġ.

⁸ mayad a‑f‑awn‑t‑in‑uznġ, baš a‑tissanm mamnk a‑nga izzɛam ulawn‑nnun.

⁹ aznġ‑n dids gʷmatnnġ ifulkin iɛzzan unisimus lli‑igan yan zġ‑gigun. ntni a‑rad‑awn‑yini f‑kullu ma‑darnnġ‑ijran ġid.

¹⁰ ar‑n‑fllawn‑itsllam aristarh̬us, illa didi ġ‑lḥbs. ar‑n‑fllawn‑itsllam marqus yus n‑uwlltmas n‑barnaba. nniġ‑awn‑yad fllas a‑t‑in‑tšškšmm s‑darun, tgm‑t d‑unbgi‑nnun iġ‑n‑darun‑yuška.

¹¹ ar‑n‑fllawn‑itsllam ula yašuɛ lli‑mi‑ttinin yusṭus. ġir kraḍ‑ad a‑igan ayt‑yudaya ġ‑ġwilli didi itmɛawann ġ‑twuri n‑tgldit n‑rbbi, ar‑iyi‑ssfjjijn ul‑inu bahra.

¹² ar‑n‑fllawn‑itsllam abafras. iga zġ‑gigun ula ntta, ig ah̬ddam l‑lmasiḥ yasuɛ. s‑nniyt‑ns a‑s‑a‑itẓalla bahra f‑ssibt‑nnun, baš a‑tdusm tzgam ġ‑uġaras n‑rbbi ar‑tskarm kullu ma‑gigun‑ira rbbi.

¹³ hati giġ fllas inigi n‑mnšk a‑ith̬dam bahra f‑ssibt‑nnun ula f‑ssibt n‑ayt‑lawdikiyya ula ayt‑hirabulis.

¹⁴ ar‑n‑fllawn‑itsllam‑uṭbib iɛzzan luqa, nttan ula ḍimaṣ.

¹⁵ ar‑n‑tsllamġ f‑aytmatn n‑lawdikiyya ula f‑nimfa d‑umnaggar lli‑itmunun ġ‑tgmmi‑ns.

¹⁶ tiġurdin n‑ma‑tġram tabrat‑ad ġ‑darun, riġ a‑stti‑taznm i‑umnaggar ġ‑lawdikiyya baš a‑stt‑ġrn ula ntni. iriġ a‑tġrm ula kunni tabrat lli‑darsn‑illan ġ‑lawdikiyya.

¹⁷ iniyat i‑arh̬ibbus a‑itlhu s‑twuri lli‑f‑t‑yuṣṣa siditnnġ, baš a‑stt‑ikmml.

¹⁸ s‑ufus‑inu a‑s‑awn‑in‑uriġ awal‑ad: nkki bulus ar‑n‑fllawn‑tsllamġ. a‑ur‑tettum iskraf‑ad ġ‑lliġ. ad‑awn‑tili lbaraka n‑rbbi.