kulussi 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ s‑tnkra l‑lmasiḥ a‑s‑kʷn‑d‑issnkr rbbi zġ‑lmut. mayan a‑f‑kʷn‑d‑iqqan a‑bdda‑trarm lɛaql s‑ma‑igan win ignna, ašku ġin a‑ġ‑illa lmasiḥ, iskiws f‑ufasi n‑rbbi.

² swingimat‑bdda ġ‑tġawsiwin n‑ignna urd tiġawsiwin n‑ddunit‑ad.

³ ašku tmmutm f‑tudrt lli‑izrin, trgs tudrt‑nnun l‑ljdid ġ‑dar rbbi ġ‑illiġ irgs lmasiḥ.

⁴ lmasiḥ a‑igan tudrt‑nnun. ġakud lliġ ra‑d‑iwrri ra‑kʷn‑yawi a‑dids‑tilim ula kunni ġ‑lmjd‑ns.

ma‑yʷh̬šnn ula ma‑ifulkin

⁵ f‑mayan a‑f‑rad‑awn‑iniġ, skarat baš a‑gigun‑immt aynna igan win ddunit‑ad: lfsad ula ššhawa ula asmaqql s‑tiṭ yʷh̬šnn. a‑ur‑sul‑tswingimm ġ‑ma‑iɛibn ula‑da‑ttirim ma‑ur‑igin winnun, ašku yan ittirin win wiyyaḍ iga zund yan itɛbadn ilahat n‑ddunit‑ad.

⁶ f‑ssibt n‑kullu ġayan a‑f‑ra‑iḍr lġaḍab n‑rbbi f‑willi srs rurnin tiġurdin‑nsn.

⁷ ula kunni ġayd izrin tkkam‑ttin ar‑tskarm ġmkan, ar‑ttsalam tiġawsiwin‑an.

⁸ imma ġilad, illa fllawn a‑tkkism kullu ġayan. a‑ur‑ttẓim ula‑da‑ttuffm f‑yan. a‑ur‑ttnuwwašm ula‑da‑trggmm ġ‑yan. a‑ur‑tadjm kra n‑iwaliwn ʷh̬šnnin a‑tkkan infurn‑nnun,

⁹ ula‑da‑tsskirkism f‑ingratun. ašku ur‑sul‑tgim ġmklli tgam ġayd izrin, s‑iskkirn lli‑tmyarm ar‑tn‑tskarm.

¹⁰ hati twrrim tgam mddn l‑ljdid. rbbi lli‑kʷn‑ih̬lqn ar‑kʷn‑itbddal baš a‑twrrim tgm zund nttan, tissanm‑t ġmklli iga.

¹¹ mayan a‑f‑ur‑a‑nẓẓmẓlay gu‑yunan zġ‑gu‑yudaya, ula ġwalli dar taẓallit n‑ddat zġ‑walli ur‑dar‑tlli, ula gu‑tmazirt‑ad zġ‑gu‑tmazirt‑an, ula ismg zġ‑wad‑igan win ih̬f‑ns. ašku nga kullu win lmasiḥ, yili lmasiḥ ginnġ kullwaġ.

¹² kunni, imẓlayn n‑rbbi a‑tgam. ira‑kʷn iẓli‑kʷn a‑tgm wins. f‑mayan a‑f‑kʷn‑d‑iqqan a‑tɛmmrm s‑lḥnant, ar‑ttmɛawanm ar‑tẓẓimẓaym ih̬f‑nnun, ar‑ttrh̬um ar‑ttṣbarm i‑ngratun

¹³ bla‑da‑yawn‑teṭiyyar f‑ingratun. iġ‑illa yan dar ma‑s‑a‑itaštkka s‑wayyaḍ, illa fllas ad‑as‑iṣamḥ. ṣamḥat i‑ngratun ġmklli‑awn‑iṣamḥ siditun.

¹⁴ zaydat i‑kullu mayad a‑bahra‑ttirim i‑ngratun, ašku tayri a‑iẓḍarn a‑tssmun kullu ma‑illan s‑tamunt ikmmln.

¹⁵ adjat sslamt l‑lmasiḥ a‑tmala i‑uwlawn‑nnun kullu ma‑gigun‑ira. ašku iġra‑yawn‑d rbbi a‑kullu‑tgm yan ġ‑tamunt n‑sslamt‑ad. yili fllawn a‑bdda‑ttškarm rbbi.

¹⁶ adjat awal l‑lmasiḥ a‑iɛmmr ulawn‑nnun, ar‑tsslmadm ar‑ttnṣaḥm i‑ngratun s‑kullu ma‑igan taḥkimt, ar‑ttirirm i‑rbbi ar‑ttasim imurign d‑tahlilat d‑talġatin nna‑yawn‑imala rruḥ lqudus, ar‑ti‑ttškarm zġ‑uwlawn‑nnun.

¹⁷ kullu ma‑ttinim ula kullu ma‑tskarm, skarat‑t s‑ism n‑siditnnġ yasuɛ, ar‑ttškarm rbbi fllas.

ayt‑tgmmi ula ayt‑twuri

¹⁸ wa‑timġarin, illa f‑kraygatt yat a‑tsflid s‑urgaz‑ns ġmklli ira siditnnġ.

¹⁹ imma kunni a‑irgazn, illa f‑kraygatt yan a‑itḥnnu ġ‑tmġart‑ns bla‑da‑dids‑itšqu.

²⁰ wa‑tarwa mẓẓinin, skarat‑bdda s‑wawal n‑ayt‑darun, ašku irḍa rbbi s‑mayad.

²¹ imma kunni a‑id‑babatsn, a‑ur‑bdda‑ttẓim tarwa‑nnun, baš a‑ur‑ġuwḍn ġaln is‑ur‑gin yat.

²² wa‑ih̬ddamn, skarat‑bdda s‑wawal n‑id‑siditun n‑ddunit‑ad. a‑ur‑ttirim ġir a‑tn‑trḍum ġakud nna‑gigun‑tmnadn, walaynni h̬dmat s‑nniyt n‑uwl‑nnun s‑mklli ttirim a‑trḍum siditnnġ.

²³ aynna‑ġ‑a‑tth̬damm, h̬dmat gis s‑tiqqi‑nnun zund iġd siditnnġ a‑mi‑tth̬damm urd bnadm.

²⁴ ašku tssnm izd siditnnġ a‑rad‑awn‑ifk tiġrad‑nnun, išškšm‑kʷn s‑lwrt‑nnun ġ‑ignna. ašku siditnnġ lmasiḥ, nttan a‑mi‑tth̬damm.

²⁵ imma wanna iskarn ma‑yʷh̬šnn, rad‑as‑irar rbbi f‑lh̬ʷšant lli‑iskr. han rbbi ur‑a‑iskar s‑uwdmawn.