kulussi 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ riġ a‑tissanm mnška n‑tkrrayt ad‑kkatġ f‑ssibt‑nnun ula f‑ssibt n‑aytmatn n‑lawdikiyya ula f‑kullu wiyyaḍ ur‑jju‑ẓrinin udm‑inu.

² walaynni ar‑skarġ kullu mayad baš ad‑zɛmn‑uwlawn‑nsn, gn kullu yan s‑tayri n‑ingratsn, tili‑asn lbaraka n‑twassna ikmmln f‑maylli intln ġayd izrin. ašku rbbi issbayyn‑aġ‑d lmasiḥ,

³ d‑nttan a‑ġ‑tlla‑kullu‑tḥkimt n‑rbbi ula tawassna‑ns ihiyyan.

⁴ nniġ‑awn mayad baš a‑kʷn‑ur‑ijlu yan s‑tkrkas.

⁵ wah̬h̬a‑d‑fllawn‑yaggug‑uwdm‑inu, illa‑n‑didun‑uwl‑inu. hati frḥġ ġilad ġ‑fllawn‑sfldġ is‑tzgam ġ‑tamunt n‑ingratun tamẓm kullu ġ‑lmasiḥ.

tamunt d‑lmasiḥ

⁶ ssnġ is‑tgam lmasiḥ yasuɛ d‑siditun. d‑mayan a‑f‑rad‑awn‑iniġ, skarat‑bdda ma‑ira.

⁷ zzugzat tadrut n‑llsas‑nnun ġ‑lmasiḥ ar‑fllas‑tbnnum, tamẓm gis ar‑ttdusm ġmklli tlmdm, ar‑bdda‑ttškarm rbbi.

⁸ awiyat‑stt ġ‑ih̬f‑nnun a‑kʷn‑ur‑iġwi yan s‑iswingimn n‑bnadm ula s‑tkrkas h̬wanin lli‑mi‑tsfldm zġ‑tasutin lli‑zrinin. han tinbaḍin n‑ddunit ad‑gant, urd tin lmasiḥ.

⁹ imma lmasiḥ, nttan a‑ġ‑illa‑kullu‑ufulki n‑rbbi ikmmln ġ‑ddat‑ns.

¹⁰ ula kunni, tlla‑yawn tudrt ikmmln f‑ssibt n‑ma‑tgam win lmasiḥ lli‑iḥkamn ġ‑kullu ssulṭat ula lquwwat n‑ignwan.

¹¹ nttan a‑kʷn‑issġusn, urd s‑tẓallit lli‑tbbin mddn ġ‑ddat‑nsn, walaynni issġus‑kʷn zġ‑ma‑issrkan ul n‑bnadm.

¹² ašku ġakud lliġ tddmm s‑udum n‑waman, ttyawmḍalm d‑lmasiḥ tnkrm‑d dids, ašku tumnm s‑tḥkimt itjhhdn n‑rbbi lli‑t‑id‑issnkrn zġ‑lmut.

¹³ ġayd izrin tgam zund iġ‑tmmutm i‑ma‑igan win rbbi f‑ssibt n‑ddnub‑nnun ula f‑ssibt ma‑ur‑jju‑tskirm s‑ššrɛ. imma ġilad issddr‑kʷn rbbi d‑lmasiḥ. iṣamḥ‑aġ f‑kullu ddnub lli‑nskr,

¹⁴ isfiḍ talluḥt l‑lḥsab lli‑fllannġ‑iḥkamn s‑luṣiyat lli‑s‑ur‑nskir. ikkis‑t‑in fllannġ, yut‑as tigusin f‑uggjdi.

¹⁵ f‑uggjdi a‑f‑inra lmasiḥ ssulṭat d‑lquwwat n‑ignwan, ikkis‑asnt imqlad‑nsnt, iml i‑kullu mddn is‑tnt‑inra.

¹⁶ f‑mayan a‑f‑rad‑awn‑iniġ, a‑ur‑tadjm yan ad‑awn‑in‑išškšm luṣiyat f‑ma‑ra‑tšttam ula ma‑ra‑tssam, ula f‑kra l‑lɛid ula talalit n‑wayyur ula kra n‑uwssan n‑usunfu.

¹⁷ ašku tiġawsiwin‑an gant ġir amalu n‑ma‑ra‑yili. imma lmasiḥ, nttan a‑iṣḥan.

¹⁸ a‑ur‑tadjm mddn‑an a‑fllawn‑tḥkamn. rad‑awn‑ttinin a‑bahra‑ttadrm i‑ih̬f‑nnun ar‑ttɛbadm lmalayka. ar‑bnnun ntni f‑mad‑ẓrran ġ‑twargiwin‑nsn, ar‑ssfurrugn s‑iswingimn l‑lɛaql‑nsn,

¹⁹ walaynni ur‑umẓn ġ‑lmasiḥ lli‑igan ih̬f n‑umnaggar, ar‑issdus ddat kullutt, ar‑issmyalla igzman‑ns d‑ih̬san‑ns baš a‑ttimġur ddat ġmklli ira rbbi.

tinbaḍin n‑tudrt l‑ljdid

²⁰ s‑lmut l‑lmasiḥ a‑s‑tmmutm kunni i‑tnbaḍin n‑ddunit‑ad. mayan a‑f‑ra‑kʷn‑sqsaġ, mah̬ aylliġ a‑sul‑tskarm zund iġ‑tgam win ddunit? mah̬ aylliġ a‑tskarm s‑luṣiyat n‑mddn? ar‑ttinin:

²¹ «a‑ur‑ttasim ġwan, a‑ur‑tmḍaym ġwad, a‑n‑ur‑ttggrm i‑ġwan.»

²² walaynni kullu tiġawsiwin‑an ar‑zraynt. iġ‑tnt‑nšša ur‑sul‑qamant. han luṣiyat‑an, ġir iwaliwn n‑bnadm d‑ulmmud n‑bnadm ad‑gant.

²³ kra n‑mddn ġaln is‑gant lmɛqul ašku ar‑trarant mddn ad‑bahra‑tɛbadn ar‑tadrn i‑ih̬f‑nsn ar‑ssrfufunn ddat‑nsn, walaynni ur‑ẓḍarnt luṣiyat‑an ad‑kkisnt ššhwat ʷh̬šnnin zġ‑bnadm.