kulussi 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus arqqas l‑lmasiḥ yasuɛ ġmklli ira rbbi, d‑zġ‑gʷmatnnġ timutaws.

² i‑aytmatnnġ ġ‑tmdint n‑kulussi, a‑tn‑igan d‑imẓlayn n‑rbbi lli‑zganin ġ‑uġaras l‑lmasiḥ. ad‑awn‑tili lbaraka d‑sslamt zġ‑rbbi babatnnġ.

lh̬bar ifulkin

³ ar‑bdda‑ntškar rbbi babas n‑siditnnġ yasuɛ lmasiḥ ġakud nna‑yas‑ntẓalla f‑ssibt‑nnun.

⁴ ašku nsfld f‑mamnk a‑tumnm s‑lmasiḥ yasuɛ, ɛzzan darun kullu imẓlayn n‑rbbi,

⁵ ašku illa darun rrja iṣḥan f‑maylli‑awn‑in‑iḥḍa rbbi ġ‑ignna. mayd‑ġ‑a‑ttrjum, tsfldm fllas ġakud lliġ‑kʷn‑in‑ilkm‑wawal l‑lḥqq lli‑igan lh̬bar ifulkin.

⁶ lh̬bar‑ad ar‑itkka ddunit kullutt, ar‑yakka ṣṣabt ġ‑kraygatt mani, ġmklli iskar ṣṣabt ġ‑darun zġ‑wass amzwaru lli‑ġ‑tsfldm f‑lbaraka n‑rbbi tissanm lḥqq ġmklli iga, sul s‑ġilad.

⁷ ilkm‑kʷn‑in f‑imi n‑abafras lli‑didnnġ‑itmɛawann, ig ah̬ddam iɛzzan ifulkin l‑lmasiḥ f‑ssibt‑nnun.

⁸ inna‑yaġ‑d is‑kʷn‑iɛmmr rruḥ lqudus s‑tayri n‑aytmatn.

⁹ f‑mayan a‑f‑a‑bdda‑ntẓalla ar‑ntḍalab rbbi f‑ssibt‑nnun, zġ‑wass lli‑ġ‑fllawn‑nsfld sul s‑ġassad. ar‑t‑ntḍalab ad‑awn‑issbayyn kullu ma‑gigun‑ittiri s‑twassna ula taḥkimt lli‑rad‑awn‑imala rruḥ lqudus.

¹⁰ ġmkan a‑s‑rad‑kullu‑tgm ġmklli‑d‑iqqann ġwilli ganin win siditnnġ, ar‑tskarm s‑ma‑t‑irḍan, tili gigun ṣṣabt n‑kullu ma‑igan afulki, tzaydm tissanm rbbi ġmklli iga.

¹¹ ar‑ntḍalab rbbi a‑kʷn‑issdus s‑tḥkimt‑ns itjhhdn baš a‑ttṣbarm bla‑da‑ttrmaym,

¹² ar‑ttfraḥm ar‑ttškarm rbbi babatnnġ lli‑awn‑ifkan taġamt ġ‑lwrt lli‑ra‑yili i‑imẓlayn‑ns ġ‑tgldit n‑tifawt.

¹³ ijjnjm‑aġ‑d kullu zġ‑tgldit n‑tillas, išškšm‑aġ‑d s‑tgldit n‑yus iɛzzan

¹⁴ lli‑aġ‑ifukkan issitti fllannġ ddnub‑nnġ.

lmasiḥ a‑izwarn kullu ma‑illan

¹⁵ iga lmasiḥ ṣṣurt n‑rbbi, iml‑aġ mamnk a‑iga ġwalli ur‑jju‑iẓri yan. ig ih̬fddi izwur kullu ma‑ih̬lq rbbi.

¹⁶ ašku srs a‑s‑ityawh̬laq kraygatt kra ġ‑ignwan ula ġ‑wakal, maylli ibann i‑walln n‑bnadm ula maylli ur‑asnt‑ibann, lmalayka ula larwaḥ ula ssulṭat ula lquwwat n‑ignwan. s‑lmasiḥ a‑s‑ityawh̬laq kullu ma‑illan, ig kullu wins.

¹⁷ illa ntta ur‑ta‑illi kra yaḍni, d‑nttan a‑izzgan kraygatt kra ġ‑illiġ‑t‑id‑iqqan a‑yili.

¹⁸ iga lmasiḥ ih̬f n‑ddat lli‑igan amnaggar n‑mddn‑ns. nttan a‑igan amzwaru, ig ih̬fddi n‑willi‑d‑nkrnin zġ‑lmut, baš a‑ig nttan anmġur n‑kullu ma‑illan.

¹⁹ ašku iqṣad rbbi a‑gis‑yili‑ufulki‑ns ikmmln.

²⁰ f‑uwdm‑ns a‑f‑iqṣad rbbi a‑irar i‑ih̬f‑ns kullu ma‑illan ġ‑wakal ula ġ‑ignwan, iskr sslamt ġ‑gras d‑mddn f‑ssibt n‑idammn l‑lmasiḥ lli‑ffinin lliġ immut f‑uggjdi.

²¹ imma kunni tkkam‑ttin taggugm‑n zġ‑rbbi, tgm inuwwašn‑ns f‑ssibt n‑iswingimn‑nnun d‑iskkirn‑nnun lli‑ʷh̬šnnin.

²² imma ġilad iskr sslamt ġ‑gratun dids f‑ssibt l‑lmut l‑lmasiḥ ġakud lliġ iṭṭaf ddat n‑bnadm. ra‑kʷn‑išškšm s‑lgddam‑ns tġusm tfulkim bla‑gigun‑illa kra l‑lɛib.

²³ ġmkad a‑ra‑iskr iġ‑tzuydm tzgam ġ‑lmasiḥ tamẓm‑bdda gis bla tflm rrja iṣḥan lli‑f‑tsfldm ġ‑wawal l‑lh̬bar ifulkin. lh̬bar‑ad a‑mi‑ttkka‑tbrraḥt‑ns kullu ddunit, wrriġ gġ ah̬ddam‑ns ula nkki bulus.

tawuri n‑bulus ula tarfufnt‑ns

²⁴ frḥġ ġilad s‑trfufnt‑ad ġ‑a‑zrayġ f‑ssibt‑nnun. ašku ar‑tkmmalġ s‑ddat‑inu ma‑iqaman ġ‑trfufnt l‑lmasiḥ f‑ssibt n‑ddat‑ns lli‑igan amnaggar n‑mddn‑ns.

²⁵ wrriġ giġ ah̬ddam i‑umnaggar‑ad lliġ‑iyi‑iẓli rbbi ad‑skarġ tawuri‑ad, sslkmġ‑awn‑in kullu iwaliwn‑ns.

²⁶ ašku maylli intln kullu ġayd izrin, ur‑t‑ssinn mddn n‑tasutin lli‑zrinin, hati issbayyn‑t‑id rbbi ġilad i‑imẓlayn‑ns.

²⁷ iqṣad ad‑aġ‑d‑iml taġawsa‑yad bahra ifulkin ihiyyan lli‑s‑ra‑ibark kullu timizar n‑ddunit. ġmkad a‑tga: illa lmasiḥ ġ‑uwl‑nnun ad‑awn‑ifk rrja iṣḥan n‑is‑ra‑n‑tkšmm s‑lmjd‑ns.

²⁸ hati lmasiḥ a‑f‑a‑ntbrraḥ i‑kullu mddn, ar‑ntnṣaḥ kud yan, ar‑nsslmad kud yan s‑kullu ma‑igan taḥkimt, baš a‑n‑nšškšm kud yan s‑lgddam n‑rbbi imqqur ġ‑lmasiḥ.

²⁹ f‑ġmkan a‑f‑a‑tnhatafġ ar‑kkatġ takrrayt s‑kullu jjhd l‑lmasiḥ lli‑yyi‑issdusn s‑tḥkimt‑ns iggutn.