irqqasn 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

šawl iwrri yumn s‑lmasiḥ

¹ imma šawl ar‑sul‑iskar ma‑s‑a‑issiwid imḥḍarn n‑siditnnġ ar‑tn‑itnuwwa s‑lmut. iddu s‑dar‑unmġur ihiyyan n‑tgmmi n‑rbbi,

² iḍalb zġ‑gis tibratin i‑imġarn n‑tgʷmma n‑tẓallit ġ‑tmdint n‑dimašq, baš a‑iġwi wanna‑n‑yufa zġ‑ayt‑uġaras l‑lmasiḥ gn‑iyt irgazn nġd timġarin, yawi‑tn s‑urušalim.

³ issudu šawl aylliġ‑n‑yakmur s‑dimašq, s‑d‑fllas‑tsfaw yat tifawt itjhhdn zġ‑ignwan.

⁴ iḍr s‑wakal isfld i‑yan‑wawal inna‑yas: «šawl, šawl, mah̬ a‑yyi‑tssrfufunt?»

⁵ yini: «wa‑sidi, ma‑tgit kiyi?» yini‑as: «nkkin a‑igan yasuɛ lli‑tssrfufunt.

⁶ imma ġilad nkr tkšmt s‑tmdint. rad‑ak‑ityawnna ma‑k‑id‑iqqann a‑ti‑tskart.»

⁷ duhdun ġwilli dids ssudanin, biddn ġin fssan. sllan ntni i‑wawal‑an walaynni ur‑ẓrin yan.

⁸ inkr šawl zġ‑wakal walaynni lliġ irẓm alln‑ns ur‑isfaw yat. amẓn‑as afus awin‑t s‑dimašq.

⁹ ikka kraḍ‑uwssan ur‑isfaw, ur‑a‑ištta ula‑da‑issa.

¹⁰ illa yan‑umḥḍar l‑lmasiḥ ġ‑dimašq ism‑ns ḥananiyya, iban‑as‑d siditnnġ ġ‑twargit yini‑as: «wa‑ḥananiyya.» yini: «ha‑nkki a‑sidi.»

¹¹ yini‑as siditnnġ: «nkr tddut s‑tgmmi n‑yahuda ġ‑tsukt lli‑mi‑ttinin ‹tasukt inmn›, tsqsat ġ‑yan‑urgaz gu‑ṭarsus ism‑ns šawl. ašku ar‑itẓalla,

¹² iẓr ġ‑twargit yan‑urgaz ism‑ns ḥananiyya yuška‑d dars, isrs fllas ifassn‑ns baš a‑yisfiw.»

¹³ isawl ḥananiyya yini: «wa‑sidi, sfldġ i‑kullu ma‑ttinin mddn f‑urgaz‑an ula kullu ma‑iskar yʷh̬šn i‑imẓlayn‑nnk ġ‑urušalim.

¹⁴ hati ġilad yuška‑d s‑ġid, yawi‑d dids tibratin zġ‑inmġurn n‑tgmmi n‑rbbi baš a‑yamẓ kullu ġwid aqranin s‑ism‑nnk.»

¹⁵ yini‑as siditnnġ: «ddu s‑dars, ašku argaz‑an stiġ‑t a‑ig aruku lli‑ra‑yasi ism‑inu dar ayt‑tmizar aggugnin d‑igldan ula dar ayt‑rbbi.

¹⁶ rad‑as‑mlġ mnšk n‑trfufnt a‑t‑id‑iqqann a‑srs‑irfufn f‑ism‑inu.»

¹⁷ iddu ḥananiyya ikšm s‑tgmmi lli‑ġ‑illa šawl, isrs fllas ifassn‑ns yini‑as: «wa‑gʷma šawl, yuzn‑iyi‑d siditnnġ, a‑t‑igan d‑yasuɛ lli‑ak‑d‑ibann ġ‑uġaras ġakud lliġ‑di‑tssudit. yazn‑iyi‑d s‑dark baš a‑tisfiwt tɛmmrt s‑rruḥ lqudus.»

¹⁸ ġir inna mayad s‑d‑iḍr kra zġ‑walln n‑šawl irwas i‑ikrḍn n‑islman, iwrri isfaw. inkr ġakudan, issddm‑t ḥananiyya ġ‑waman.

¹⁹ išš ilmma s‑iwrri idus. igawr šawl d‑imḥḍarn l‑lmasiḥ ġ‑dimašq kra n‑uwssan.

²⁰ ibdu ar‑itbrraḥ ġ‑tgʷmma n‑tẓallit ar‑ittini: «yasuɛ iga yus n‑rbbi.»

²¹ ar‑tɛjjabn kullu willi‑as‑sflidnin ar‑ttinin i‑ngratsn: «is‑urd ġwad a‑ithlakn ġwilli aqranin s‑ism‑ad ġ‑urušalim? is‑ur‑d‑yuški s‑ġid baš a‑tn‑yamẓ yawi‑tn s‑dar inmġurn n‑tgmmi n‑rbbi?»

²² imma šawl ar‑itzayad ar‑isawal s‑tḥkimt itjhhdn ar‑imala is‑iga yasuɛ ġwalli‑d‑yuzn rbbi a‑ig lmasiḥ, aylliġ ur‑ufin ayt‑yudaya lli‑zdġnin ġ‑dimašq mamnk a‑fllas‑traran awal.

²³ zrin‑uwssan ggutnin s‑fllas‑mšawarn kra n‑ayt‑yudaya, irin a‑t‑nġn.

²⁴ gabln imawn n‑tmdint ġ‑iyḍ ula azal baš a‑t‑hlkn. imma šawl isfld i‑ġaylli fllas nuwwan.

²⁵ awin‑t imḥḍarn‑ns ġ‑iyḍ s‑yan‑warryaḥ illa ġ‑uġʷrab, zzugzn‑t ġ‑yan‑uryal s‑brra n‑tmdint.

zzɛamt n‑šawl ġ‑urušalim

²⁶ iddu šawl s‑urušalim, yiri a‑iẓr imḥḍarn n‑siditnnġ. imma ntni ksuḍn zġ‑gis kullutn, ašku ur‑t‑uminn is‑iwrri iga amḥḍar l‑lmasiḥ.

²⁷ yašk‑id barnaba yawi šawl s‑dar irqqasn, yini‑asn f‑mamnk ad‑as‑d‑iban siditnnġ ġ‑uġaras isawl srs, ula mamnk a‑izɛm šawl ar‑isawal s‑ism n‑yasuɛ ġ‑dimašq.

²⁸ iqama didsn šawl, ar‑itkka kullu tamdint n‑urušalim ar‑isawal s‑ism n‑siditnnġ s‑zzɛamt.

²⁹ ar‑issmqsa ar‑itmjaḥad d‑ayt‑yudaya lli‑d‑kkanin timizar yaḍni, imma ntni skrn f‑a‑t‑nġn.

³⁰ lliġ sfldn aytmatn f‑maylli nuwwan, awin‑t s‑lmrsa n‑qayṣriyya, azn‑t ilmma s‑tmdint‑ns n‑ṭarsus.

³¹ ġ‑uwssan‑an ihnna lḥal dar kullu ayt‑umnaggar ġ‑tmizar n‑yudaya ula jalil ula samira. ar‑ttigatn ar‑tdusn, ar‑tn‑izzɛam rruḥ lqudus. ar‑skarn kullu f‑ad‑rḍun siditnnġ.

ajjujji d‑tnkra f‑ufus n‑bṭrus

³² ġ‑uwssan‑an ar‑itkka bṭrus kraygatt mani, yašk‑id s‑dar imẓlayn n‑rbbi ġ‑uduwwar n‑ludda.

³³ yaf‑n ġin yan‑urgaz ikušmn, ism‑ns ɛinyas. tam isggʷasn ur‑iẓḍar a‑inkr zġ‑tisi‑ns.

³⁴ yini‑as bṭrus: «wa‑ɛinyas, hati ijjujji‑k yasuɛ lmasiḥ. nkr tssmunt asddul‑nnk.» inkr ġakudan, ibidd f‑iḍarn‑ns.

³⁵ ẓrn‑t kullu ayt‑ludda ula ġwilli zdġnin ġ‑uzaġar n‑sarun, wrrin amnn ula ntni s‑siditnnġ.

³⁶ tlla yat‑tmḥḍart l‑lmasiḥ ġ‑tmdint n‑yaffa, ism‑ns ṭabita. tga lmɛna n‑ism‑ns ‹taẓnkṭṭ›. nttat ar‑bdda‑tskar afulki ġ‑mddn ar‑ttɛawan imẓlaḍ.

³⁷ tuḍn ġ‑uwssan‑an tmmt. sirdnt‑stt srsnt‑stt‑in ġ‑yan‑uḥanu n‑uflla.

³⁸ tamdint n‑yaffa ur‑bahra‑taggug f‑uduwwar n‑ludda. lliġ sfldn imḥḍarn is‑illa bṭrus ġ‑ludda, aznn sin irgazn s‑dars ḍalbn‑t: «ašk‑id ġil ġil.»

³⁹ inkr bṭrus imun didsn. lliġ iruḥ tigmmi ssġlin‑t s‑uḥanu. aškind‑d‑thjjalin kullutnt lullint i‑bṭrus ar‑allant ar‑as‑malant iqšban d‑islhamn lli‑tskr ṭabita lliġ sul didsnti tlla.

⁴⁰ imma bṭrus issufġ‑tnt kullutnt zġ‑uḥanu, yutš f‑ifaddn‑ns iẓẓall iḍalb rbbi. igrawl ilmma ġ‑talli immutn yini‑as: «wa‑ṭabita, nkr,» s‑di‑trẓm alln‑ns tẓr bṭrus, tnkr ġ‑tisi‑ns.

⁴¹ imdi‑as‑n bṭrus afus‑ns issbidd‑stt f‑iḍarn‑ns. iġr s‑imẓlayn n‑rbbi d‑thjjalin, ifk‑asn‑tt‑id tddr.

⁴² ar‑sflidn kullu ayt‑yaffa f‑ma‑ijran, aylliġ iggut ma‑iwrrin yumn s‑siditnnġ.

⁴³ igawr bṭrus ġ‑yaffa yan‑mnnaw‑uwssan ġ‑dar yan‑udbbaġ ism‑ns simɛan.