irqqasn 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tarfufnt lli‑izrin f‑imumnn

¹ zġ‑wass‑an a‑tzray‑trfufnt išqan f‑umnaggar n‑aytmatn ġ‑urušalim, akutn kullu ġ‑tsgiw n‑yudaya ula samira. ġir irqqasn a‑iqaman.

² imma stifanus, mḍln‑t kra n‑mddn lli‑tuqqarnin rbbi, taġ‑tn‑tguḍi‑ns bahra.

³ imma šawl iga‑n tiqqi‑ns a‑ihlk amnaggar kullut. ar‑ikššm s‑tgʷmma yat s‑yat, ar‑d‑izukur irgazn ula timġarin ar‑tn‑in‑itluḥ ġ‑lḥbs.

filibbus ġ‑samira

⁴ imma ġwilli akutnin, ar‑tkkan kraygatt mani ar‑tbrraḥn s‑wawal n‑rbbi.

⁵ iddu filibbus s‑yat‑tmdint ġ‑samira, ar‑itbrraḥ f‑lmasiḥ.

⁶ ggutn mddn n‑ġin, lliġ sfldn i‑ma‑ittini filibbus ẓrn timitar tjhhdnin lli‑iskar, awin‑tt kullu ġ‑wawal‑ns.

⁷ mddn ggutnin, ffuġn zgisn ljnun ʷh̬šnnin s‑tġuyya tjhhdnin, jjin kigan d‑ikušamn d‑ibiḍarn.

⁸ frḥn ayt‑tmdint‑an bahra.

⁹ yili yan‑urgaz ġ‑tmdint‑an ism‑ns simɛun, ar‑iskar ssiḥr ar‑gis‑tɛjjabn ayt‑samira. ar‑asn‑ittini izd wad imqqurn a‑iga.

¹⁰ ar‑tt‑gis‑tawin mddn kullutn, udmawn mqqurnin ula wiyyaḍ, ar‑ttinin: «argaz‑ad tlla‑gis‑tḥkimt n‑rbbi lli‑mi ism‑ns ‹amqqur›.»

¹¹ ar‑srs‑sflidn ašku kigan ad‑zzrin ar‑tɛjjabn ġ‑ssiḥr lli‑iskar.

¹² walaynni lliġ sfldn i‑ma‑inna filibbus f‑lh̬bar ifulkin n‑tgldit n‑rbbi ula f‑ism n‑yasuɛ lmasiḥ, amnn awal‑ns. issddm‑tn ġ‑waman, irgazn ula timġarin.

¹³ yamn simɛun ula nttan, issddm‑t filibbus ġ‑waman. izayd ar‑itmunu d‑filibbus, ar‑itɛjjab ġ‑lquwwat d‑tmitar mqqurnin lli‑dars‑iẓrra.

uguz n‑rruḥ lqudus f‑ayt‑samira

¹⁴ sfldn irqqasn ġ‑urušalim f‑ayt‑samira is‑qbln awal n‑rbbi, aznn bṭrus d‑yuḥanna s‑darsn.

¹⁵ lliġ‑n‑lkmn, ẓẓalln ḍalbn zġ‑rbbi a‑d‑ifk rruḥ lqudus i‑willi umnnin.

¹⁶ ašku ġakudan ur‑ta‑d‑fllasn‑igguz rruḥ lqudus. ġir ddmn ntni ġ‑waman s‑ism n‑siditnnġ yasuɛ.

¹⁷ srsn fllasn irqqasn ifassn‑nsn s‑tn‑ikšm rruḥ lqudus.

¹⁸ ġir iẓra simɛun is‑d‑yuška rruḥ lqudus lliġ fllasn srsn irqqasn ifassn‑nsn, yawi‑d iqaridn

¹⁹ yini‑asn: «fkat‑iyi ula nkki taẓḍḍart‑ad, baš a‑ikšm rruḥ lqudus s‑wanna‑f‑srsġ ifassn‑inu.»

²⁰ irar‑as bṭrus: «a‑tthlkt kiyi ula nnuqrt‑nnk, ašku tġalt izd s‑iqaridn a‑s‑tlla‑twafka n‑rbbi.

²¹ ur‑dark taġamt ġ‑twuri‑ad ula ra‑gis‑tkšmt, ašku ur‑iġus‑uwl‑nnk ġ‑iẓri n‑rbbi.

²² fl lh̬ʷšant‑an tnawlt, tḍalbt rbbi ad‑ak‑iṣamḥ f‑ġayn tnuwwat ġ‑uwl‑nnk.

²³ ašku ẓriġ is‑tɛmmrt s‑wasmmum, tyassast s‑iskraf n‑ddnub.»

²⁴ yini‑asn simɛun: «ḍalbat rbbi f‑ssibt‑inu, a‑ur‑iyi‑yili kra ġ‑ġayd flla tnnam.»

²⁵ izayd bṭrus d‑yuḥanna fkn tugga‑nsn sawln i‑mddn‑an s‑wawal n‑siditnnġ. wrrin ilmma s‑urušalim. lliġ ftan ġ‑uġaras ar‑tbrraḥn s‑lh̬bar ifulkin ġ‑iduran ggutnin n‑samira.

filibbus d‑lwazir n‑ḥabaš

²⁶ imma filibbus, inna‑yas‑d yal‑lmalak n‑sidi rbbi: «nkr tddut s‑tsga l‑ljanub s‑uġaras lli‑itawin zġ‑urušalim s‑tmdint n‑ġazza.» aġaras‑an illa ġ‑lh̬la.

²⁷ inkr filibbus iddu. imnaggar yan‑urgaz, iga gu‑ḥabaš ig lwazir n‑ṣṣnduq ġ‑dar kandaka tagllitt n‑ḥabaš. yuška‑d ġ‑uwssan‑an s‑urušalim a‑gis‑itɛbad rbbi, yamẓ aġaras‑an ilmma baš a‑iwrri s‑tmazirt‑ns.

²⁸ ġassan issuda ġ‑lkurriṣa‑ns ar‑yaqra ġ‑warra n‑nnabi išaɛya.

²⁹ ġakudan filibbus, inna‑yas rruḥ lqudus: «ftu‑n dar bu‑lkurriṣa‑yan, tmunt dids.»

³⁰ yazzl filibbus s‑dars, isfld‑as ar‑yaqra ġ‑warra n‑nnabi išaɛya. isqsa‑t filibbus: «is‑tssnt lmɛna n‑mayd taqrat?»

³¹ yini‑as lwazir: «mamnk a‑s‑rad‑issanġ lmɛna‑ns iġ‑ur‑dari mad‑iyi‑stt‑imalan?» iḍalb‑t ilmma a‑iġli issudu dids ġ‑lkurriṣa.

³² agzzum lli‑yaqra ġ‑warra n‑rbbi iga ġmkad: «zund izimmr lli‑ldin ad‑as‑ġrsn, nġd zund alqqaġ lli‑ifssan ġ‑gr ifassn n‑willi ra‑t‑ilass, ur‑irẓim imi‑ns.

³³ rgmn‑t ssḍrn fllas lbaḍl. ma‑ra‑yaddr tarwa‑ns? ašku bbin‑t zġ‑tudrt n‑ddunit‑ad.»

³⁴ isawl‑daġ lwazir isqsa filibbus: «ini‑yyi, ma‑f‑isawl nnabi lliġ inna mayad? izd f‑ih̬f‑ns nġd kra n‑yan yaḍni?»

³⁵ ibdu filibbus ġakudan zġ‑warra‑yan, ar‑as‑imala lh̬bar ifulkin f‑yasuɛ.

³⁶ zaydn ssudun ġ‑uġaras aylliġ lkmn yan‑udġar gis aman, yini lwazir i‑filibbus: «hay‑aman. is‑illa ma‑rad‑iyi‑ikkis a‑yyi‑tssddmt?»

³⁷ yini‑as filibbus: «ur‑illi ma‑rad‑ak‑t‑ikkis iġ‑tumnt s‑nniyt n‑uwl‑nnk.» yini‑as: «ha‑yyi umnġ is‑iga yasuɛ lmasiḥ yus n‑rbbi.»

³⁸ yini lwazir i‑uh̬ddam‑ns a‑issbidd lkurriṣa, igguz s‑waman ntta d‑filibbus, issddm‑t.

³⁹ imma filibbus, ġir ġlin‑d zġ‑waman s‑t‑issitti rruḥ n‑siditnnġ, ur‑sul‑t‑iẓri lwazir. izayd ntta f‑uġaras‑ns s‑lfrḥ iggutn.

⁴⁰ imma filibbus yufa‑n ih̬f‑ns ġ‑tmdint n‑ašdud, izayd ar‑itkka kullu timdinin ar‑gisnt‑itbrraḥ s‑lh̬bar ifulkin aylliġ iruḥ qayṣriyya.