irqqasn 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

astay n‑ssa n‑imɛawann

¹ ar‑ttigatn imḥḍarn ġ‑uwssan‑an. imma ġwilli sawalnin s‑wawal n‑ibrraniyn ar‑tngmugn f‑willi sawalnin s‑wawal n‑ayt‑yudaya ar‑ttinin: «ur‑a‑tamẓnt‑thjjalin‑nnġ taġamt lli‑tnd‑d‑yuškan ġ‑lmɛawnt n‑kraygatt ass.»

² nkrn irqqasn s‑sin d‑mraw, ġrn‑d i‑imḥḍarn kullutn s‑darsn inin‑asn: «ur‑ra‑ifulki a‑nfl tawuri n‑wawal n‑rbbi baš a‑naṭṭu f‑lmyadi.

³ ġir zaydat ay‑aytma, tstim zġ‑gigun ssa n‑mddn nna‑s‑tssnm is‑ɛmmrn s‑rruḥ lqudus ula taḥkimt. ra‑nfl tawuri‑ad ġ‑ufus‑nsn,

⁴ nlhu nkkʷni s‑tẓallit d‑ulmmud n‑wawal n‑rbbi.»

⁵ iɛjb‑tn kullutn mayd nnan irqqasn. stin ilmma stifanus (iga nttan argaz iɛmmrn s‑liman ula rruḥ lqudus). stin ula filibbus d‑bruh̬urus d‑nikanur d‑timun d‑barminas d‑niqulaws (iga nttan abrrani gu‑anṭakiyya yumẓ aġaras n‑ayt‑rbbi).

⁶ awin‑tn‑d s‑dar irqqasn. ẓẓalln ntni ḍalbn rbbi, srsn fllasn ifassn‑nsn a‑tn‑ẓlin i‑twuri‑an.

stifanus d‑ayt‑yudaya

⁷ iggut ma‑isflidn s‑wawal n‑rbbi ġ‑uwssan‑an, ar‑bahra‑ttigatn imḥḍarn ġ‑urušalim. kigan d‑inmġurn n‑tgmmi n‑rbbi a‑yumẓn aġaras l‑lmasiḥ ula ntni.

⁸ iɛmmr stifanus s‑lbaraka n‑rbbi d‑tḥkimt itjhhdn, ar‑iskar lmɛjizat d‑tmitar mqqurnin ġ‑dar ayt‑tmdint.

⁹ walaynni nkrn srs kra n‑mddn zġ‑tgmmi n‑tẓallit lli‑mi‑ttinin ‹tigmmi n‑ismgan lli‑tyawrẓamnin›, gn ayt‑yudaya zġ‑tmdinin n‑kurini d‑iskandariyya d‑wiyyaḍ zġ‑tmizar n‑kilikiyya d‑asiyya, ar‑tmjaḥadn d‑stifanus.

¹⁰ imma nttan ar‑didsn‑isawal s‑tḥkimt iggutn ġmklli‑as‑imala rruḥ lqudus, aylliġ ur‑ẓḍarn a‑t‑nrun s‑iwaliwn.

¹¹ ġakudan skrn d‑kra n‑irgazn ġ‑tntla ad‑d‑aškin inin «nsfld‑as ar‑irggm ġ‑ššrɛ n‑musa ula rbbi.»

¹² sshiyysn ayt‑tmdint d‑imġarn n‑tmazirt d‑imslmdn n‑ššrɛ, aylliġ umẓn stifanus awin‑t s‑lmḥkama.

¹³ šškšmn kra n‑mddn a‑fllas‑akkan tugga n‑tkrkas ar‑ttinin: «ġwad ar‑bdda‑irggm ġ‑tgmmi tamẓlayt n‑rbbi ula ššrɛ n‑musa.

¹⁴ nsfld‑as ibdr ġwalli mi ttinin yasuɛ gu‑naṣira, yini fllas ra‑ih̬lu tigmmi n‑rbbi issngara‑yaġ d‑iġarasn lli‑aġ‑d‑ifl musa.»

¹⁵ imma stifanus, ar‑gis‑ssmuqquln kullu willi gawrnin ġ‑uḥanu l‑lmḥkama, ẓrn udm‑ns irwas udm l‑lmalak.