irqqasn 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ḥananiyya d‑saffira

¹ illa yan‑urgaz ism‑ns ḥananiyya, ntta d‑tmġart‑ns saffira. izznza yan‑igr,

² iḥḍu i‑ih̬f‑ns kra zġ‑maylli gis yumẓ, isrs ma‑iqaman ġ‑lgddam n‑irqqasn. d‑tmġart‑ns, illa kullu mayan ġ‑ugayyu‑ns.

³ inkr bṭrus yini‑as: «wa‑ḥananiyya, mah̬ aylliġ tudjit šiṭan a‑ikšm s‑uwl‑nnk baš a‑tsskarkst f‑rruḥ lqudus tḥḍut kra zġ‑maylli tumẓt ġ‑igr‑nnk?

⁴ lliġ ur‑ta‑inzi winnk a‑iga, imma lliġ inza hati maylli gis tumẓt illa sul ġ‑ufus‑nnk a‑srs‑tskrt aynna trit. mah̬ aylliġ tqṣadt ġayad ġ‑uwl‑nnk? hati urd bnadm a‑f‑tsskarkst, walaynni tsskarkst f‑rbbi.»

⁵ ġir isfld ḥananiyya i‑mayad s‑iḍr s‑wakal immt. ġuwḍn kullu willi sfldnin i‑ma‑ijran.

⁶ nkrn ilmma iɛyyaln, lsn‑as lkfn asin‑t mḍln‑t‑in.

⁷ zrint kraṭṭ tasaɛin s‑di‑tkšm‑tmġart‑ns, ur‑tssin ma‑ijran.

⁸ isqsa‑tt bṭrus: «ini‑yyi, izd ġunškad a‑tumẓm ġ‑igr‑nnun?» tini‑as: «ġunškan a‑illan.»

⁹ izayd bṭrus yini‑as: «mah̬ aylliġ tswangmm a‑stti‑tzzrim f‑rruḥ n‑rbbi? hatnin ġ‑imi, ġwilli‑n‑mḍlnin argaz‑nnm. ra‑km‑asin ula kmmi.»

¹⁰ ġakudan a‑tḍr s‑wakal ġ‑lgddam‑ns tmmt. kšmn‑d iɛyyaln afn‑tt‑id tmmut, asin‑tt mḍln‑tt‑in ġ‑tama n‑urgaz‑ns.

¹¹ ġuwḍn kullu ayt‑umnaggar bahra, ntni ula kullu wiyyaḍ lli‑sfldnin f‑ma‑ijran.

lmɛjizat n‑irqqasn

¹² iskr rbbi lmɛjizat d‑tmitar ggutnin f‑ifassn n‑irqqasn ġ‑dar ayt‑tmdint‑an. ar‑n‑tmunun imumnn kullutn ġ‑udġar lli‑mi‑ttinin ‹alḥni n‑suliman›.

¹³ wah̬h̬a da‑tn‑talġn kullu mddn, ur‑izɛm yan ur‑igin amumn a‑didsn‑imun.

¹⁴ walaynni ar‑ttigatn ayt‑umnaggar, irgazn ula timġarin lli‑umnnin s‑siditnnġ.

¹⁵ lliġ ẓran ayt‑tmdint kullu mayad, ar‑d‑ssufuġn imuḍan‑nsn s‑tswak, ar‑tn‑srasn f‑ibrdan‑nsn ula imjdan‑nsn, ar‑trjun a‑izri bṭrus iḍr‑d‑umalu‑ns f‑kra gisn.

¹⁶ iggut ma‑d‑ittaškin zġ‑iduran n‑tsgiw n‑urušalim, ar‑di‑tawin imuḍan d‑imjnan, ar‑kullu‑tjjin.

bṭrus d‑yuḥanna ġ‑lḥbs

¹⁷ imma anmġur n‑tgmmi n‑rbbi d‑imddukkʷal‑ns kullutn l‑lmdhb n‑iṣadduqin, ṭiyyr‑asn bahra ašku frḥn mddn s‑irqqasn uggʷar‑nsn ntni.

¹⁸ amẓn‑tn ġakudan gn‑tn‑in ġ‑lḥbs ġ‑gr willi ffuġnin lqanun.

¹⁹ walaynni ġ‑iḍ‑an yuška‑d yal‑lmalak n‑sidi rbbi, irẓm tiflwin l‑lḥbs issufġ‑d irqqasn yini‑asn:

²⁰ «zaydat tbiddm ġ‑tgmmi n‑rbbi, tsawlm i‑mddn f‑kullu ma‑igan win‑uġaras n‑tudrt‑ad l‑ljdid.»

²¹ lliġ‑d‑iġli‑wass, skrn irqqasn s‑wawal‑ns, kšmn s‑tgmmi n‑rbbi ar‑sslmadn mddn. lliġ inkr‑unmġur n‑tgmmi n‑rbbi d‑imddukkʷal‑ns, ssmunn‑d imġarn l‑lmḥkama n‑ayt‑rbbi kullutn, aznn s‑lḥbs ad‑d‑awin irqqasn s‑darsn.

²² walaynni lliġ kšmn imh̬zniyn s‑lḥbs ur‑tn‑in‑ufin, wrrin s‑lmḥkama inin‑asn:

²³ «nufa‑n lḥbs iqqn, rglnt‑tflwin‑ns, biddn ingabaln kullutn ġ‑tama n‑imawn, walaynni lliġ‑tn‑nrẓm ur‑n‑nufi yan ġ‑ugʷns.»

²⁴ lliġ sfldn inmġurn d‑lqbṭan n‑imh̬zniyn n‑tgmmi n‑rbbi i‑mad‑nnan, gammin ad‑fhmn ma‑ijran. ar‑ttinin i‑ngratsn: «ma‑ra‑d‑iggʷru i‑ġayad?»

²⁵ ġakudan ikšm darsn yan‑urgaz yini‑asn: «han ġwilli‑n‑tgam ġ‑lḥbs, biddn ġ‑tgmmi n‑rbbi ar‑sslmadn mddn.»

²⁶ iffuġ lqbṭan d‑imh̬zniyn‑ns ġakudan, awin‑d irqqasn s‑darsn, walaynni ur‑tn‑ssrfufnn ašku ksuḍn zġ‑ayt‑tmdint a‑gisn‑brrmn s‑iẓran.

irqqasn ġ‑lmḥkama

²⁷ šškšmn‑tn ssbiddn‑tn‑in ġ‑lgddam n‑ayt‑lmḥkama. inkr‑unmġur n‑tgmmi n‑rbbi ġakudan yini‑asn:

²⁸ «is‑ur‑kʷn‑numr a‑ur‑tsslmadm s‑ism‑an? imma kunni mayd tskrm ġilad? hati tɛmmrm urušalim s‑ulmmud‑nnun, tirim ad‑aġ‑tqlldm s‑idammn n‑urgaz‑an.»

²⁹ isawl bṭrus ula irqqasn inin: «iqqan‑aġ‑d a‑nskar s‑wawal n‑rbbi uggʷar n‑wawal n‑bnadm.

³⁰ ašku rbbi n‑imzwura‑nnġ issnkr‑d yasuɛ lli‑tnġam f‑uggjdi.

³¹ issattuy‑t s‑ufasiy‑ns baš a‑ig agllid d‑unjjam i‑ayt‑rbbi, iskr‑asn aġaras ma‑s‑a‑di‑twrrin zġ‑kullu ma‑yʷh̬šnn, issitti fllasn ddnub‑nsn.

³² kullu mayad, ar‑fllas‑nakka tugga‑nnġ nkkʷni ula rruḥ lqudus lli‑d‑yuzn rbbi i‑willi skarnin s‑wawal‑ns.»

³³ lliġ sfldn ayt‑lmḥkama i‑mayad, nkrn‑d gisn iriyn bahra, irin ad‑nġn irqqasn.

³⁴ walaynni inkr yan gisn ġ‑wammas l‑lmḥkama, ism‑ns gamalyal. iga zġ‑lmdhb n‑ifarisin, ig amslmd n‑ššrɛ, ar‑ti‑tuqqarn mddn kullutn. yini‑asn ad‑ssufġn irqqasn yan imikk.

³⁵ isawl ilmma d‑ayt‑lmḥkama yini‑asn: «wa‑irgazn ayt‑rbbi, swangmat bahra ur‑ta‑tskirm kra i‑mddn‑ad.

³⁶ a‑ur‑tettum tudas lli‑d‑yuškan isggʷasn‑ad zrinin, inna is‑iga kra ihiyyan. imun dids ma‑itggan kkuẓ id‑miyya (400) n‑urgaz. walaynni ityawnġa, akutn kullu willi dids llanin, ur‑iqama yat ġ‑ma‑inawl.

³⁷ tigira‑ns yuška‑d yahuda gu‑jalil ġ‑uzmz lli‑ġ‑ḥasbn kullu ayt‑tmazirt, yawi dids mddn ggutnin. ula nttan ityawnġa, akutn ġwilli dids munnin.

³⁸ f‑mayan a‑f‑rad‑awn‑iniġ, ad‑ur‑tẓim d‑mddn‑ad. adjat‑tn ad‑ddun. ašku mayd nawln ula mayd skarn, iġ‑iga win bnadm ra‑iḍr.

³⁹ walaynni iġ‑iga win rbbi, ur‑ra‑tiẓḍarm a‑tn‑tnrum. han a‑ur‑n‑tafm ih̬fawn‑nnun ġ‑isiggʷra is‑a‑ttẓim d‑rbbi.» skrn ilmma s‑mad‑asn‑inna gamalyal,

⁴⁰ ġrn‑d i‑irqqasn ssġuršn‑tn, amrn‑tn a‑ur‑daġ‑sawaln s‑ism n‑yasuɛ, rẓmn‑asn.

⁴¹ ffuġn irqqasn zġ‑lmḥkama, frḥn bahra ašku iga‑tn rbbi d‑wid‑f‑irḍa aylliġ rfufnn f‑ism n‑yasuɛ.

⁴² zaydn ilmma ass f‑wass ar‑sslmadn ġ‑tgmmi n‑rbbi ula ġ‑tgʷmma n‑mddn, ar‑tbrraḥn s‑lh̬bar ifulkin n‑yasuɛ, ar‑ttinin izd nttan a‑igan lmasiḥ n‑rbbi.