irqqasn 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

bṭrus d‑yuḥanna ġ‑lmḥkama

¹ sul a‑isawal bṭrus d‑yuḥanna i‑mddn‑an, s‑d‑uškan inmġurn n‑tgmmi n‑rbbi, imun‑d didsn lqbṭan n‑imh̬zniyn n‑tgmmi n‑rbbi ula kra n‑iṣadduqin.

² ṭiyyr‑asn bahra f‑irqqasn, ašku ar‑tbrraḥn i‑mddn ar‑asn‑ttinin is‑ẓḍarn ad‑d‑nkrn zġ‑lmut f‑ssibt n‑ma‑d‑inkr yasuɛ.

³ aškin‑d amẓn‑tn gn‑tn‑in ġ‑lḥbs a‑n‑ġin‑qaman ar ṣṣbaḥ ašku yaġ‑uzal.

⁴ imma ġwilli sflidnin i‑wawal n‑rbbi, iggut gisn ma‑yumnn ġ‑tasaɛt‑an. ar‑ttigatn imumnn aylliġ illa ma‑itggan smmus id‑walf (5000) n‑yan.

⁵ ndid azkka munn‑d imġarn l‑lmḥkama ġ‑urušalim, ntni d‑imġarn n‑tmazirt d‑imslmdn n‑ššrɛ.

⁶ yili‑didsn‑unmġur ihiyyan n‑tgmmi n‑rbbi ism‑ns ḥannan, yili qayafa d‑yuḥanna d‑iskandr d‑wiyyaḍ n‑ayt‑unmġur n‑tgmmi n‑rbbi.

⁷ awin‑d irqqasn ssbiddn‑tn ġ‑lgddam‑nsn sqsan‑tn: «man taḥkimt a‑s‑tskrm ġayad? s‑ism n‑mi a‑s‑ti‑tskrm?»

⁸ iɛmmr bṭrus s‑rruḥ lqudus yini‑asn: «wa‑imġarn l‑lmḥkama d‑imġarn n‑tmazirt,

⁹ iġ‑aġ‑tsqsam ġassad f‑ufulki lli‑ityawskarn i‑yan‑ukušam ula f‑mamnk a‑s‑ijji,

¹⁰ iqqan‑kʷn‑d a‑tissanm mayad kunni ula kullu ayt‑rbbi. ibidd‑urgaz‑ad ġ‑lgddam‑nnun ijji idus s‑tḥkimt lli‑illan s‑ism n‑yasuɛ lmasiḥ gu‑naṣira, a‑t‑igan d‑walli tnġam kunni f‑uggjdi, issnkr‑t‑id rbbi zġ‑lmut.

¹¹ nttan a‑f‑ityara ġ‑warra n‑rbbi: ‹aẓru lli‑n‑tluḥm kunni a‑ibnnayn, nttan a‑iwrrin iga ih̬f n‑uġẓu.›

¹² ur‑iẓḍar yan a‑injm zġ‑lhalak abla srs nttan, ašku ur‑illi ġ‑ddu ignwan kra n‑ism yaḍni ifka‑t rbbi ma‑s‑a‑itnjam bnadm.»

¹³ lliġ ẓran mamnk a‑izɛm bṭrus d‑yuḥanna iḍr‑asn lɛjb, ašku ssnn is‑gan ġir zund mddn yaḍni ur‑bahra‑ġrin. fhmn ġakudan is‑ttin‑kkan ar‑tmunun d‑yasuɛ.

¹⁴ walaynni ur‑darsn ma‑ttinin ašku ẓran argaz lli‑ijjin, ibidd didsn.

¹⁵ ssufġn‑tn ilmma zġ‑uḥanu l‑lmḥkama, ssmqsan i‑ngratsn:

¹⁶ «ma‑ra‑nskr i‑mddn‑ad? hati kullu imzdġn n‑urušalim ssnn is‑ttyawskar yat lmɛjizt imqqurn f‑ufus‑nsn. ur‑nẓḍar a‑nini ur‑tlli.

¹⁷ walaynni ih̬ṣṣa a‑ur‑izayd ġayad ġ‑dar mddn s‑uggʷar. ra‑tn‑nssiwd baš a‑ur‑sul‑sawaln i‑yan s‑ism n‑yasuɛ.»

¹⁸ ġrn‑asn ilmma s‑darsn inin‑asn: «a‑ur‑sul‑tsawalm ula‑da‑tsslmadm s‑ism n‑yasuɛ.»

¹⁹ irar‑asn bṭrus d‑yuḥanna: «iniyat kunni ma‑ifulkin ġ‑dar rbbi, izd a‑nskar s‑wawal‑nnun nġd s‑wawal n‑rbbi?

²⁰ ašku ur‑nẓḍar a‑nfssa f‑ma‑nẓra ula ma‑mi‑nsfld.»

²¹ zaydn imġarn ar‑tn‑thddidn, rẓmn‑asn ilmma ašku ur‑ufin ma‑s‑a‑fllasn‑tḥkamn, d‑mddn kullutn ar‑talġn rbbi f‑ma‑ijran.

²² argaz lli‑ijjin s‑lmɛjizt‑ad, illa dars uggʷar n‑kkuẓ id‑mraw n‑usggʷas.

zzɛamt n‑imumnn

²³ lliġ‑asn‑rẓmn iwrri bṭrus d‑yuḥanna s‑dar mddn‑nsn, sawln‑asn f‑kullu mad‑asn‑nnan inmġurn n‑tgmmi n‑rbbi d‑imġarn n‑tmazirt.

²⁴ lliġ‑asn‑sfldn imumnn, mšaškan‑d kullutn alln awal‑nsn s‑rbbi inin: «wa‑sidi rbbi itjhhdn, tskrt ignwan d‑wakal d‑imdwan ula kullu ma‑gisn‑illan.

²⁵ tsawlt f‑imi n‑uh̬ddam‑nnk babatnnġ dawd s‑tḥkimt n‑rruḥ lqudus lliġ inna: ‹mah̬ aylliġ hajnt‑tmizar n‑ddunit? mah̬ aylliġ‑d‑mšaškan mddn ad‑skarn f‑ma‑mi‑ur‑ẓḍarn?

²⁶ uškan‑d igldan, munn‑d d‑inmġurn n‑ddunit, baš ad‑mmaġn d‑sidi rbbi ula lmasiḥ‑ns.›

²⁷ ġmkan a‑s‑d‑imun hirudus d‑bilaṭus gu‑bunṭus, ntni d‑ibrraniyn d‑ayt‑rbbi ġ‑tmdint‑ad, baš ad‑d‑mšaškan f‑uh̬ddam‑nnk amẓlay yasuɛ lli‑tgit d‑lmasiḥ.

²⁸ skrn kullu ma‑tqṣadt zġ‑isizwar s‑tḥkimt‑nnk itjhhdn.

²⁹ imma ġilad a‑siditnnġ, ẓr mamnk a‑ttirin ad‑aġ‑ssiwidn, tɛawnt‑aġ nkkʷni n‑ih̬ddamn‑nnk a‑nsawal s‑wawal‑nnk s‑zzɛamt.

³⁰ mdi‑d afus‑nnk a‑tjjujjit, ar‑tskart lmɛjizat d‑tmitar tjhhdnin s‑ism n‑uh̬ddam‑nnk amẓlay yasuɛ.»

³¹ lliġ kmmln taẓallit‑ad, tmmass‑tgmmi lli‑ġ‑llan, ɛmmrn kullutn s‑rruḥ lqudus ar‑sawaln s‑zzɛamt s‑wawal n‑rbbi.

lmɛawnt n‑imumnn

³² kullu imumnn, yan ad‑gan ġ‑mad‑swingimn ula ma‑s‑a‑ssḥssun. ur‑illi ma‑ittinin tiġawsiwin‑ns ġir tins ad‑gant, walaynni kud yan ar‑yaṭṭu aynna dars illan d‑wiyyaḍ.

³³ s‑tḥkimt iggutn a‑s‑akkan irqqasn tugga‑nsn f‑tnkra n‑siditnnġ yasuɛ, ɛmmrn kullutn s‑lbaraka n‑rbbi.

³⁴ ur‑illi yan ġ‑umnaggar n‑imumnn iḥtajja. ašku ġwilli ṭṭafnin igran nġd tigʷmma ar‑tn‑zznzan, ar‑di‑tawin ma‑gisn‑tamẓn

³⁵ ar‑t‑srasn ġ‑lgddam n‑irqqasn. ar‑t‑aṭṭun ntni f‑willi gisn ḥtajjanin, kud yan d‑unšk lli‑f‑ilkm.

³⁶ ġmkan a‑iskr yusf lli‑mi‑ttinin barnaba. lknit‑ad, fkan‑as‑tt irqqasn, tga lmɛna‑ns ‹wad izzɛamn›. iga ntta zġ‑tqbilt n‑lawi, ig gu‑qubrus.

³⁷ izznza yan‑igr‑ns, yawi‑d iqaridn lli‑gis‑yumẓ isrs‑tn ġ‑lgddam n‑irqqasn.