irqqasn 28 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

bulus d‑ayt‑maliṭa

¹ lliġ nnjm zġ‑umda, naf‑n igzir‑an iga ġwalli mi ttinin maliṭa.

² aškin‑d imzdġn‑ns skrn ginnġ afulki, ssrġn lɛafit ssmrḥban srnnġ kullwaġ ašku illa‑unẓar d‑usmmiḍ.

³ bulus issmun‑d yat taggʷat n‑ikššuḍn, yiri a‑tn‑in‑isrs f‑iggi l‑lɛafit. iffuġ‑d zgisn yan‑ulgmmaḍ f‑ssibt n‑trġi, ilbi ġ‑ufus n‑bulus.

⁴ ayt‑igzir, lliġ ẓran algmmaḍ yugʷl ġ‑ufus n‑bulus inin i‑ngratsn: «argaz‑ad, irwas is‑inġa kra n‑ruḥ. hati, wah̬h̬a injm zġ‑umda ur‑t‑ifil lḥqq a‑isul.»

⁵ walaynni bulus issus‑n algmmaḍ ġ‑lɛafit, ur‑t‑yaġ yat.

⁶ ar‑tqln mddn‑an ad‑ẓrn is‑ra‑yuff bulus nġd a‑iḍr s‑wakal immt. walaynni lliġ qln yan kra ẓrn ur‑as‑ijri yat, wrrin ar‑ttinin: «kra n‑ilah ayad.»

⁷ ilin kra n‑igran ġ‑tsga lli‑ġ‑nlla, gan win lḥakm n‑igzir‑an ism‑ns bublyus. išškšm‑aġ s‑tgmmi‑ns ig‑aġ d‑inbgiwn‑ns kraḍ‑uwssan.

⁸ yili dars babas tssgn‑t tawla, iḍr‑gis‑udis bahra. ikšm bulus s‑tḥanut lli‑ġ‑illa, iẓẓall iḍalb rbbi isrs‑n fllas ifassn‑ns, ijjujji‑t.

⁹ lliġ sfldn mddn i‑mayad ar‑d‑dars‑ttaškin kullu winna uḍnnin ġ‑igzir‑an, jjin.

¹⁰ ar‑aġ‑tuqqarn mddn‑an s‑twafkiw ggutnin, ar ass lli‑ġ‑ra‑nffuġ zġ‑darsn, awin‑aġ‑d kullu ma‑rad‑aġ‑ih̬ṣṣa i‑umuddu‑nnġ.

ġmklli ilkm bulus s‑ruma

¹¹ ġmkan a‑darsn‑ngawr kraḍ‑iyrn, nkšm ilmma s‑yan‑wanaw, ityawssan darsn s‑yat lɛlama n‑‹sin ilahat ikniwn›. ikka‑d iskandariyya, iqama ula ntta ġ‑igzir ġ‑uzmz‑an n‑tgrst.

¹² nssudu gis aylliġ nlkm tamdint n‑sirakusa, nqama ġin kraḍ‑uwssan.

¹³ nzayd ilmma zġ‑ġin s‑lmrsa n‑rigyun. ndid azkka iṣuḍ‑d‑waḍu išwan zġ‑ljanub. ndid azkka nlkm lmrsa n‑buṭyuli.

¹⁴ naf‑n ġin kra n‑aytmatn, ḍalbn‑aġ ad‑darsn‑ngguz ssa n‑uwssan. ġmkan a‑s‑nakmur s‑ruma.

¹⁵ lliġ sfldn aytmatn ġ‑ruma is‑n‑nuška, ffuġn‑d ar ‹ssuq n‑abbyus› ula aduwwar n‑‹kraḍ lfnadq› baš ad‑aġ‑d‑mnaggarn. lliġ‑tn‑iẓra bulus, iškr rbbi izɛm.

bulus d‑ayt‑yudaya ġ‑ruma

¹⁶ lliġ‑n‑nkšm s‑tmdint n‑ruma, lqbṭan yudja bulus a‑izdġ waḥdut, ig fllas yan‑uɛskri igabl‑t.

¹⁷ zrin kraḍ‑uwssan yazn bulus s‑imġarn n‑ayt‑yudaya, iḍalb zġ‑gisn ad‑d‑dars‑aškin. lliġ‑d‑munn ntni yini‑asn: «way‑aytma, ur‑jjud nkkin a‑irgmn ġ‑ayt‑tmazirt‑nnġ ula lɛadat n‑imzwura‑nnġ, walaynni umẓn‑iyi kra n‑ayt‑yudaya ġ‑urušalim dḥin‑iyi s‑gr ifassn l‑lḥukkam n‑rruman.

¹⁸ lliġ‑iyi‑sqsan rruman f‑mad‑skrġ, ur‑gigi‑ufin kra‑s‑a‑flla‑tḥkamn s‑lmut, irin ad‑iyi‑rẓmn.

¹⁹ walaynni mddn‑an n‑ayt‑yudaya ur‑qbiln mayan, aylliġ‑iyi‑ih̬ṣṣa ad‑ssġliġ taġawsa‑nu s‑dar qayṣr wah̬h̬a ur‑dari kra‑s‑a‑taštkkaġ s‑ayt‑tmazirt‑inu.

²⁰ mayan a‑f‑ḍalbġ a‑kʷn‑ẓrġ sawlġ didun. ašku tyawkrrafġ ġilad s‑ssnasl f‑ssibt n‑rrja lli‑ġ‑n‑rjan ayt‑rbbi.»

²¹ inin‑as ġakudan: «ur‑aġ‑d‑fllak‑lkimnt kra n‑tbratin zġ‑yudaya, ula nnan fllak aytmatn lli‑d‑uškanin zġ‑ġin kra l‑lh̬bar nġd awal yʷh̬šnn.

²² walaynni nra ad‑aġ‑tmlt iswingimn‑nnk, ašku nsfld is‑a‑ttinin mddn ġ‑kraygatt mani ur‑išwi‑uġaras‑an.»

²³ izzga didsn ass yaḍni baš ad‑d‑dars‑daġ‑munn. lliġ ilkm‑wass‑an, iggut ma‑d‑yuškan s‑illiġ izdġ bulus. ar‑asn‑isawal s‑lmɛqul zġ‑zikk ṣbaḥ ar iḍ f‑mamnk a‑tga‑tgldit n‑rbbi. ar‑fllasn‑yaqra zġ‑ššrɛ n‑musa d‑warratn l‑lanbiya baš ad‑asn‑iml is‑yʷġẓan ma‑ittini f‑yasuɛ.

²⁴ iwrri kra gisn yumn awal‑ns, imma wiyyaḍ agʷin ad‑amnn.

²⁵ ur‑d‑mšaškan i‑ngratsn, ffuġn ilmma zġ‑dars lliġ‑asn‑inna awal‑ad: «s‑lḥqq a‑s‑isawl rruḥ lqudus lliġ inna i‑imzwura‑nnun f‑imi n‑nnabi išaɛya:

²⁶ ‹ddu s‑mddn‑an tinit‑asn, rad‑bahra‑tsflidm walaynni ur‑ra‑tfhmm ma‑mi‑tsfldm. rad‑bahra‑ttmnadm walaynni ur‑ra‑tissanm ma‑tmnadm.

²⁷ wrrin mddn‑an iqqur ih̬f‑nsn, ẓẓayn imzgan‑nsn, qqnnt‑walln‑nsn. ur‑rint ad‑ẓrnt‑walln‑nsn ula sfldn imzgan‑nsn ula fhmn ġ‑iguyya‑nsn. ur‑rin ad‑d‑sri‑wrrin a‑tn‑jjujjiġ.›

^28-29 f‑mayan a‑f‑rad‑awn‑iniġ, ajnjm‑ad ifka‑t rbbi ġilad i‑ayt‑tmizar yaḍni. ntni a‑ra‑srs‑isfld.»

³⁰ iqama bulus ġin sin isggʷasn, izdġ ġ‑tgmmi lli‑ikʷra, ar‑issmrḥba s‑kullu wanna‑n‑dars‑yuškan.

³¹ ar‑asn‑isawal s‑zzɛamt f‑tgldit n‑rbbi, ar‑tn‑isslmad f‑siditnnġ yasuɛ lmasiḥ, ur‑t‑iḥṣar yan.