irqqasn 27 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

amuddu n‑bulus s‑ruma

¹ skrn ġakudan f‑ad‑aġ‑aznn ġ‑umda s‑tmazirt n‑iṭalya. fkn bulus d‑kra n‑iḥbbasn yaḍni ġ‑ufus n‑yal‑lqbṭan n‑iɛskrin ism‑ns yulyus, iga zġ‑‹rrbɛt n‑qayṣr›.

² nġli s‑yan‑wanaw ikka‑d tamdint n‑adramita, yiri lmrsat lli‑llanin ġ‑tsgiw n‑asiyya. imun didnnġ aristarh̬us, iga gu‑makiduniyya zġ‑tmdint n‑tasaluniki. nffuġ nssudu ġ‑umda.

³ ndid azkka nlkm lmrsa n‑ṣayda. yulyus iskr lh̬ir ġ‑bulus, yadj‑t a‑iddu s‑dar imddukkʷal‑ns ġ‑tmdint‑an baš ad‑as‑fkn ma‑t‑ih̬ṣṣan.

⁴ nzayd ilmma nffuġ ġ‑umda, nzri zġ‑tsga intln n‑igzir n‑qubrus ašku iḍaḍḍ‑aġ‑waḍu.

⁵ nbbi amda ġ‑tama n‑kilikiyya d‑bamfiliyya aylliġ nlkm lmrsa n‑mira ġ‑tmazirt n‑likiyya.

⁶ yaf ġin lqbṭan yan‑wanaw yaḍni, ikka‑d iskandariyya yiri tamazirt n‑iṭalya, issġli‑aġ srs.

⁷ kigan d‑uwssan ur‑a‑ntzayad ġir s‑imikk, aylliġ bḥra ur‑nlkim tama l‑lmrsa n‑knidus. ur‑aġ‑yudji‑waḍu a‑nkmml s‑tsga‑yan. nk ilmma tasga intln n‑igzir n‑krit, nzri zġ‑tama n‑ujarif n‑salmuni.

⁸ nzayd s‑tkrrayt, nḥada akal aylliġ nlkm yan‑mani lli‑mi‑ttinin ‹id‑untal šwanin›, yakmur s‑tmdint n‑lasayya.

⁹ nssn ġ‑uzmz‑an is‑ra‑išqu lḥal iġ‑nzuyd ġ‑umuddu‑nnġ, ašku nmaṭl bahra, izri fllannġ lɛid n‑uẓum. ġakudan a‑inkr bulus isawl s‑mddn s‑lmɛqul yini‑asn:

¹⁰ «wa‑irgazn, iban is‑ra‑išqu‑umuddu‑nnġ bahra ġilad. iggut ginnġ ma‑ra‑itthlk, urd ġir sslaɛt ula anaw walaynni ula tudrt‑nnġ nkkʷni.»

¹¹ imma lqbṭan n‑iɛskrin ur‑srs‑isfld. iskr s‑ma‑inna rrays n‑wanaw d‑bab‑ns. tmẓẓi lmrsa lli‑ġ‑nlla, ur‑tšwi a‑gis‑nqama ġ‑uzmz n‑tgrst.

¹² imšaška‑d ma‑iggutn ġ‑ayt‑wanaw a‑nssudu zġ‑ġin, narm is‑nẓḍar a‑nruḥ finiks a‑n‑gis‑nzzri tagrst. tga finiks yat lmrsa ġ‑igzir n‑krit, iḥkam‑tt‑uġrbi zġ‑ufasi ula aẓlmaḍ.

aḍu itjhhdn d‑umda iduyn

¹³ iṣuḍ‑d imikk n‑uzuzwu zġ‑ljanub, irwas‑asn is‑iwrri lḥal iga ġmklli ran. ssukfn ilmma aggus a‑nssudu. nzayd nḥada akal n‑krit, ur‑dids‑nmgallay yat.

¹⁴ imil inkr‑d‑waḍu lli‑mi‑ttinin ‹aẓlmaḍ i‑usġlay› ar‑d‑iṣwaḍ s‑jjhd zġ‑tsga n‑igzir.

¹⁵ ar‑ikkat anaw aylliġ ur‑sul‑nẓḍar a‑nzayd s‑tsga‑yan, nadj anaw a‑t‑idḥay‑waḍu.

¹⁶ lliġ nzri ġ‑untal n‑tgzirt n‑kuda, mmaġn ibaḥriyn ad‑qqnn tanawt lli‑izukur‑wanaw.

¹⁷ alln‑tt‑id s‑iggi n‑wanaw, sslullin ilmma izakarn i‑wallaġ n‑wanaw baš a‑t‑ssdusn. ksuḍn a‑yut iwrar n‑umlal lli‑llanin ġ‑ddu‑waman ġ‑tama n‑sirtis. adrn i‑lqluɛ, adjn anaw a‑t‑idḥay‑waḍu.

¹⁸ walaynni izuyd‑waḍu d‑umda s‑uggʷar aylliġ nkrn ibaḥriyn ġ‑wis sin‑uwssan ar‑n‑tluḥn sslaɛt ġ‑umda.

¹⁹ wis kraḍ‑uwssan asin ula imassn n‑wanaw luḥn‑tn‑in ġ‑umda.

²⁰ mnnaw‑uwssan ur‑a‑yaġ‑ttban tafukt ula itran, ar‑sul‑iṣwaḍ‑waḍu s‑jjhd aylliġ nenna ur‑nẓḍar a‑nnjm.

²¹ ntni ur‑sul‑a‑šttan yat ġ‑uwssan‑an, inkr bulus ibidd ġ‑wammas‑nsn yini: «wa‑irgazn, mrad is‑sri‑tsfldm, ikun ur‑d‑nffuġ krit ula trfufnm ġmkad ula tssh̬srm kullu mayad.

²² imma ġilad rad‑awn‑iniġ, thnnayat. hati ur‑ra‑immt yan gigun. ġir anaw a‑ra‑itthlk.

²³ ašku ġ‑iḍ‑ad ibidd‑d sri yal‑lmalak n‑rbbi lli‑mi‑giġ wins ar‑ti‑tɛbadġ,

²⁴ yini‑yyi: ‹wa‑bulus, ad‑ur‑tiksaṭṭ. hati iqqan‑k‑id a‑tbiddt ġ‑lgddam n‑qayṣr. ifka‑yak rbbi a‑ur‑immt yan zġ‑ġwilli didk muddanin.›

²⁵ thnnayat ġilad a‑irgazn, ašku umnġ rbbi is‑ra‑yili ġmklli‑s‑iyi‑d‑inna.

²⁶ walaynni iqqan‑d a‑n‑nḍr ġ‑kra n‑igzir.»

²⁷ wis kkuẓ d‑mraw n‑wass, sul ukan a‑yaġ‑idḥay‑waḍu ġ‑wammas n‑umda n‑adriyya. ġ‑ṭuẓẓunt n‑iḍ‑an irwas i‑ibaḥriyn is‑nakmur s‑kra n‑wakal.

²⁸ irin ad‑issann tadrut n‑umda ġin. grn‑in izikr, yili ġ‑ih̬f‑ns kra n‑uwzzal, afn‑in gis kkuẓ id‑mraw n‑mitru. imikk grn‑t‑in‑daġ, afn‑in gis kraḍ id‑mraw n‑mitru.

²⁹ ksuḍn a‑yut‑wanaw kra n‑ujarif, luḥn‑in kkuẓ iggusn zġ‑tġurdin‑ns, ar‑n‑trjun a‑di‑takmur‑twaġla n‑tafukt.

³⁰ skrn ilmma ibaḥriyn f‑ad‑rwln zġ‑wanaw. zzugzn tanawt s‑waman zund iġ‑ran a‑n‑luḥn kra n‑iggusn zġ‑lgddam n‑wanaw.

³¹ walaynni isawl bulus s‑lqbṭan d‑iɛskrin yini‑asn: «iġ‑ur‑didun‑qaman ibaḥriyn ġ‑wanaw ur‑ra‑tiẓḍarm a‑tnjmm.»

³² nkrn iɛskrin ġakudan, bbin izakarn n‑tanawt, adjn‑tt‑in ġ‑umda.

³³ lliġ‑d‑yakmur a‑ifaw‑wass isawl srsn bulus kullutn iḍalb‑tn ad‑ššn yini‑asn: «hati kkuẓ d‑mraw n‑wass ayad tusim taġuft bahra ur‑tššim yat.

³⁴ ḍalbġ‑kʷn ġilad a‑tamẓm imikk n‑umššu. ih̬ṣṣa‑kʷn a‑tssdusm ih̬fawn‑nnun, ašku ur‑akkʷ‑ra‑itthlk yan‑unẓaḍ n‑iguyya‑nnun.»

³⁵ lliġ‑asn‑inna mayad, yasi aġrum, iškr rbbi ġ‑lgddam‑nsn ibbi‑t ar‑ištta.

³⁶ zɛmn ula ntni ġakudan, bdun ar‑šttan.

³⁷ nga nkkʷni sin id‑miyya d‑ssa n‑id‑mraw d‑sḍiṣ (276) ġ‑wanaw.

³⁸ lliġ šbɛan kullutn, luḥn‑in irdn lli‑qamanin baš ad‑ssifsusn f‑wanaw.

ġmklli lkmn akal

³⁹ lliġ‑d‑iġli‑wass ur‑ssinn ibaḥriyn man akal ad‑lkmn, walaynni ẓran yat‑tdġart yastwan n‑umlal ġ‑gr ijarifn. swangmn a‑srs‑awin anaw iġ‑ẓḍarn.

⁴⁰ bbin izakarn n‑iggusn fln‑tn ġ‑umda, rẓmn i‑izakarn n‑tflwin lli‑s‑a‑tguwwadn anaw. alln lqlɛ imẓẓin ġ‑lgddam n‑wanaw baš a‑t‑idḥi‑waḍu s‑lgddam. nakmur s‑wakal,

⁴¹ walaynni izri‑wanaw f‑yan‑mani ġ‑ur‑drin‑waman. yut amlal itġz zġ‑lgddam‑ns, ur‑iẓḍar a‑sul‑immass. ar‑tt‑kkatnt taḍangiwin aylliġ a‑ifssi zġ‑tġurdin‑ns.

⁴² mšawarn iɛskrin i‑ngratsn, irin ad‑nġn iḥbbasn a‑ur‑gisn‑iɛum kra n‑yan ard ilkm akal irwl.

⁴³ imma lqbṭan ira a‑iḥṣar f‑bulus ġ‑laman, ur‑tn‑yudji ad‑skrn ġmkan. yamr‑tn wanna issnn a‑iɛum a‑n‑iḍr ġ‑waman izwur s‑wakal.

⁴⁴ yini i‑wiyyaḍ kud yan a‑iġwi ġ‑kra n‑ifrš n‑wanaw nġd kra n‑ukššuḍ. ġmkan a‑s‑kullu‑nruḥ akal s‑laman.