irqqasn 25 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

issġli bulus aṣraḍ‑ns s‑dar qayṣr

¹ iqama fastus kraḍ‑uwssan ġ‑qayṣriyya s‑iffuġ iddu s‑urušalim.

² ddun dars inmġurn n‑tgmmi n‑rbbi d‑imġarn n‑ayt‑yudaya, aštkkan‑daġ s‑bulus.

³ ḍalbn fastus a‑gisn‑iskr lh̬ir‑ad yawi‑asn‑d bulus s‑urušalim, ašku ntni skrn f‑ad‑as‑mdin ġ‑uġaras nġn‑t ur‑ta‑ilkim.

⁴ imma fastus irur‑asn: «han bulus illa ġ‑lḥbs ġ‑qayṣriyya. yan imikk rad‑wrriġ nkki s‑ġin.

⁵ aznat didi kra n‑imġarn‑nnun ad‑as‑n‑ṣrḍn ġin iġ‑iskr kra yʷh̬šnn.»

⁶ iqama fastus ġ‑urušalim ma‑itggan tẓa n‑uwssan, iddu ilmma s‑qayṣriyya. ndid azkka iskiws ġ‑lmḥkama yamr iɛskrin ad‑d‑awin bulus.

⁷ ikšm‑d bulus sutln‑as ayt‑yudaya lli‑d‑uškanin zġ‑urušalim, ar‑srs‑taštkkan s‑tġawsiwin mqqurnin walaynni ur‑ẓḍarn a‑tnt‑zzgan.

⁸ isawl bulus f‑ih̬f‑ns yini‑asn: «ur‑skirġ kra l‑lɛib la ġ‑ššrɛ n‑ayt‑yudaya ula ġ‑tgmmi n‑rbbi ula ġ‑qayṣr.»

⁹ walaynni fastus ira a‑irḍu ayt‑yudaya, isqsa bulus: «is‑trit a‑tddut s‑urušalim a‑tbiddt ġ‑lgddam‑inu ġin trart awal f‑iṣraḍ‑nsn?»

¹⁰ isawl bulus yini‑as: «ha‑yyi biddġ ġid ġ‑lmḥkama n‑qayṣr ġ‑illiġ‑iyi‑d‑iqqan ad‑biddġ. imma ayt‑yudaya, ur‑gisn‑skirġ kra l‑lɛib. kiyi tssnt mayad bahra.

¹¹ mrad is‑ffuġġ lqanun skrġ kra‑f‑a‑tmtatġ, ur‑rad‑iriġ ad‑anfġ i‑lmut. walaynni iġ‑ur‑illi ġ‑iṣraḍ‑nsn abla tikrkas, ur‑iẓḍar yan a‑yyi‑idḥi i‑mddn‑an. ha‑yyi ġilad usiġ aṣraḍ‑inu s‑gr ifassn n‑qayṣr.»

¹² išawr fastus d‑imɛawann‑ns, yini ilmma i‑bulus: «tssġlit aṣraḍ‑nnk s‑dar qayṣr. hati s‑dar qayṣr a‑s‑ra‑tddut.»

ibidd bulus ġ‑lgddam n‑ugllid agribbas

¹³ zrin kra n‑uwssan s‑d‑yuška‑ugllid agribbas d‑uwlltmas barniki s‑qayṣriyya. irin ad‑ssmrḥban s‑fastus ġ‑tmazirt‑nsn.

¹⁴ gawrn dars kra n‑uwssan aylliġ isawl fastus d‑ugllid f‑tġawsa n‑bulus yini‑as: «illa ġid yan‑urgaz, ifl‑t‑id filiks ġ‑lḥbs.

¹⁵ lliġ ddiġ s‑urušalim, ṣrḍn‑as inmġurn n‑tgmmi n‑rbbi d‑imġarn n‑ayt‑yudaya, ḍalbn‑iyi a‑fllas‑utġ lḥukm,

¹⁶ walaynni rurġ‑asn: ‹nkkʷni n‑ayt‑ruma ur‑a‑nskar ġmkan. ur‑a‑ntḥkam f‑yan s‑lmut iġ‑ur‑zwar‑ibidd ġ‑lgddam n‑willi‑as‑ṣrḍnin, isawl f‑ih̬f‑ns f‑ġaylli s‑a‑srs‑taštkkan.›

¹⁷ walaynni lliġ‑d‑didi‑munn s‑ġid ur‑ssmaṭlġ taġawsa‑yan. skiwsġ ndid azkka ġ‑lmḥkama, amrġ ad‑d‑ssḥaḍrn argaz‑an.

¹⁸ walaynni lliġ‑d‑nkrn imṣraḍn‑ns, ur‑srs‑aštkkan s‑kra n‑iskkirn ʷh̬šnnin ġmklli ġalġ nkki.

¹⁹ ur‑illi yat ġ‑gratsn abla kra n‑imjaḥadn f‑mamnk ad‑tɛbadn ilah‑nsn, ula f‑yan immut ism‑ns yasuɛ ar‑fllas‑ittini bulus is‑iddr.

²⁰ ur‑ssinġ ġakudan mamnk ad‑ssnfaṣalġ tiġawsiwin‑ad. sqsaġ bulus is‑ira a‑iddu s‑urušalim a‑n‑fllas‑ḥkamġ ġin,

²¹ walaynni inna‑yyi ira a‑iqama ġid ard iḥkam qayṣr f‑tġawsa‑ns. amrġ ġakudan a‑iqama ġ‑lḥbs ard‑t‑aznġ s‑dar qayṣr.»

²² isawl ilmma agribbas yini‑as i‑fastus: «ula nkki riġ ad‑sfldġ i‑urgaz‑ad.» yini‑as fastus: «ar ṣṣbaḥ rad‑as‑tsfldt.»

²³ ndid azkka yašk‑id agribbas d‑barniki s‑lhibt iggutn, kšmn s‑uḥanu imqqurn l‑lmḥkama, ntni d‑inmġurn n‑iɛskrin d‑imġarn n‑tmdint. inkr fastus yamr ad‑d‑šškšmn bulus.

²⁴ yini ilmma fastus: «way‑agllid agribbas ula kullu willi didnnġ llanin ġassad, ġwad a‑igan argaz lli‑mi‑d‑ṣrḍn kullu ayt‑yudaya s‑dari ġ‑urušalim ula ġid, ar‑srs‑tġuwwatn ar‑ttinin iqqan‑t‑id a‑immt.

²⁵ ur‑gis‑ufiġ nkki kra‑f‑isthlla lmut, walaynni lliġ issġli taġawsa‑ns s‑gr ifassn n‑qayṣr skrġ f‑a‑t‑aznġ s‑dars.

²⁶ imma nkki ur‑dari kra izgan ma‑s‑a‑fllas‑taraġ i‑qayṣr. hati ssḥaḍrġ‑awn‑t‑id ġilad, ssbiddġ‑t‑id ġ‑lgddam‑nnk ay‑agllid agribbas, baš a‑gis‑nsiggl naf ma‑s‑a‑fllas‑taraġ.

²⁷ ašku irwas‑iyi is‑ur‑išwi a‑nazn yan‑uḥbbas i‑qayṣr iġ‑ur‑fllas‑nmli maylli‑f‑a‑yas‑ṣraḍn mddn.»