irqqasn 24 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

aṣraḍ n‑ayt‑yudaya i‑bulus

¹ zrin smmus‑uwssan, s‑d‑yuška ḥananiyya lli‑igan anmġur ihiyyan n‑tgmmi n‑rbbi s‑qayṣriyya, ntta d‑kra n‑imġarn n‑tmazirt. awin‑d didsn yal‑lmuḥami ism‑ns tartullus. kšmn s‑dar filiks inin‑as f‑ġaylli‑f‑ṣrḍn i‑bulus.

² išškšm‑n bulus ġakudan s‑darsn, ibdu tartullus ar‑srs‑itaštkka yini: «wa‑lḥakm iɛzzan sidi filiks, mnnaw isggʷasn ayad thnna‑tmazirt‑nnġ f‑ufus‑nnk. tgrit ġ‑kullu ma‑ih̬ṣṣan baš ad‑aġ‑yigat lh̬ir.

³ nfrḥ s‑kullu mad‑aġ‑tskart, ar‑k‑ntškar ġ‑kraygatt mani d‑kraygatt luqt.

⁴ imma ġilad ur‑riġ a‑k‑ssmaṭlġ. ra‑k‑nḍalb ad‑aġ‑tskrt afulki‑ad, tsfldt i‑kra n‑iwaliwn drusnin f‑maylli darnnġ ijran.

⁵ ašku nufa‑n argaz‑ad iga bu‑irwwayn, ar‑issnkar uduy ġ‑gr ayt‑yudaya ġ‑ddunit kullutt. iga zġ‑inmġurn n‑willi mi ttinin ‹ayt‑naṣira›.

^6-7 ġmkan a‑iskar aylliġ ira a‑issḥrm tigmmi n‑rbbi, namẓ‑t nkkʷni ġakudan.

⁸ iġ‑ti‑tsqsat ra‑tissant kullu ġaylli‑s‑a‑srs‑ntaštkka.»

⁹ nkrn ilmma wiyyaḍ zġ‑ayt‑yudaya inin: «s‑ṣṣaḥt ġmkan a‑illan.»

awal n‑bulus ġ‑lgddam n‑filiks

¹⁰ inɛt‑n lḥakm i‑bulus s‑ufus baš a‑isawl. yini: «wa‑sidi, ssnġ izd isggʷasn ggutnin ayd tḥkamt ġ‑tmazirt‑ad. mayad a‑f‑frḥġ s‑uggʷar ad‑rarġ awal f‑mddn‑ad ġ‑lgddam‑nnk.

¹¹ iġ‑tn‑tsqsat ra‑tissant izd ġir sin d‑mraw n‑wass ayd‑n‑kšmġ s‑urušalim a‑gis‑tɛbadġ rbbi.

¹² imma ntni, hatni ur‑iyi‑n‑ufin ar‑tmjaḥadġ d‑kra n‑yan ġ‑tgmmi n‑rbbi, ula ufan‑iyi‑n ar‑sshiyyasġ mddn la ġ‑tgʷmma n‑tẓallit ula ġ‑tmdint.

¹³ ġaylli‑s‑a‑sri‑taštkkan, ur‑ẓḍarn a‑t‑zzgan.

¹⁴ walaynni yat‑tġawsa rad‑ak‑tt‑iniġ: aġaras lli‑s‑a‑ttinin ġwid ijla, nttan a‑ġ‑a‑tɛbadġ rbbi n‑imzwura‑nnġ. ha‑yyi umnġ s‑kullu ma‑ityaran ġ‑ššrɛ n‑musa ula arratn l‑lanbiya.

¹⁵ giġ rrja‑nu ġ‑rbbi ġmklli‑n‑gis‑rjan ntni, amnġ is‑rad‑nkrn kullu mddn zġ‑lmut, ma‑ifulkin ula ma‑yʷh̬šnn.

¹⁶ mayan a‑f‑a‑n‑tggaġ tiqqi‑nu baš a‑bdda‑iġus‑uwl‑inu zġ‑kullu ma‑igan lɛib ġ‑iẓri n‑rbbi ula win bnadm.

¹⁷ «zrin yan‑mnnaw n‑isggʷasn ur‑ddiġ s‑urušalim, aylliġ‑n‑iwiġ kra l‑lmɛawnt i‑imẓlaḍ n‑ayt‑tmazirt‑inu ssakmurġ‑n tiwafkiw i‑rbbi.

¹⁸ ġmkan ad‑skrġ s‑iyi‑n‑ufan ġ‑tgmmi n‑rbbi, d‑nkki ġusġ s‑isird n‑ayt‑yudaya. ur‑a‑sawalġ s‑mddn ula‑da‑tẓiġ d‑yan.

¹⁹ walaynni llan ġin kra n‑ayt‑yudaya zġ‑tmazirt n‑asiyya. ntni iġ‑darsn kra flla, illa fllasn ula ntni ad‑d‑aškin ṣrḍn‑iyi ġ‑lgddam‑nnk.

²⁰ nġd adj ġwid ad‑flla‑inin is‑gigi‑ufan kra l‑lɛib ġakud lliġ biddġ ġ‑lmḥkama‑nsn.

²¹ ur‑skirġ yat, abla awal‑ad ad‑nniġ s‑jjhd lliġ biddġ ġ‑lgddam‑nsn, nniġ‑asn: ‹ha‑yyi biddġ ġ‑ddu lḥukm‑nnun ġassad f‑ssibt n‑mad‑umnġ s‑tnkra n‑willi mmutnin.›»

²² imma lḥakm filiks issn ma‑iggutn f‑uġaras l‑lmasiḥ, yini‑asn: «ġassad yuwda ġunškad, ard‑d‑yašk‑unmġur lisyas rad‑daġ‑ġrġ s‑tġawsa‑yad‑nnun.»

²³ izayd yuṣṣa lqbṭan a‑igabl bulus, yini‑as a‑t‑ur‑ikrs, yadj imddukkʷal‑ns ad‑as‑di‑tawin aynna‑t‑ih̬ṣṣan.

²⁴ zrin kra n‑uwssan, s‑d‑yuška filiks d‑drusila tamġart‑ns. tga nttat ullt‑yudaya. yazn ġakudan ad‑d‑awin bulus. isfld‑as ar‑isawal f‑ma‑ra‑yili i‑yan yumnn s‑lmasiḥ yasuɛ.

²⁵ walaynni lliġ izuyd bulus ar‑isawal f‑ufulki lli‑s‑irḍa rbbi, ula mamnk a‑ra‑yiẓḍar yan a‑iḥkam ġ‑ih̬f‑ns, ula lɛqubit lli‑ra‑ittut f‑ddunit, yiksaḍ filiks yini‑as: «ddu ġilad, ra‑n‑srk‑aznġ akud nna‑yyi‑teṭlq luqt.»

²⁶ iġal is‑rad‑as‑ifk bulus iqaridn. kigan d‑twal ar‑srs‑itazn ar‑dids‑isawal.

²⁷ ġmkan aylliġ zrin sin isggʷasn, iddu filiks tigira. yašk‑id yal‑lḥakm yaḍni, ig ism‑ns burkyus‑fastus. imma filiks ira a‑irḍu ayt‑yudaya, ifl bulus ġ‑lḥbs.