irqqasn 23 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ issmaqql bulus ġ‑ayt‑lmḥkama yini‑asn: «way‑aytma, ha‑yyi kullu mad‑kkiġ sul s‑ġassad ar‑skarġ f‑ad‑trḍuġ rbbi s‑uwl iġusn.»

² inkr ġakudan ḥananiyya lli‑igan anmġur ihiyyan n‑tgmmi n‑rbbi, yamr ġwilli biddnin ġ‑tama n‑bulus a‑t‑utn f‑imi‑ns.

³ irar‑as bulus: «ra‑k‑id‑yut rbbi, ay‑aġʷrab ijiyyrn. hati tskiwst ġid a‑flla‑tḥkamt s‑ššrɛ, walaynni tffuġt zġ‑ššrɛ lliġ‑tn‑tumrt a‑yyi‑utn.»

⁴ inin‑as ġwilli biddnin ġ‑tama‑ns: «izd trgmt anmġur ihiyyan n‑rbbi?»

⁵ irar‑asn bulus: «way‑aytma, ur‑ssinġ ġwad izd anmġur ihiyyan a‑iga. ašku ityara ġ‑wawal n‑rbbi: ‹a‑ur‑trgmt yan igan anmġur n‑ayt‑tmazirt‑nnk.›»

⁶ issn bulus izd kra gisn iga zġ‑lmdhb n‑iṣadduqin d‑kra iga zġ‑lmdhb n‑ifarisin. yall awal‑ns ġ‑lmḥkama yini‑asn: «way‑aytma, nkki afarisi ad‑giġ, gġ yus n‑ifarisin. biddġ ġ‑ddu lḥukm ġassad f‑ssibt n‑rrja lli‑ġ‑n‑rjiġ, ašku umnġ is‑rad‑nkrn ġwilli mmutnin.»

⁷ ġir inna awal‑ad s‑nkrn ifarisin d‑iṣadduqin ar‑tẓin i‑ngratsn, bḍun ayt‑lmḥkama f‑sin.

⁸ ašku iṣadduqin ar‑ttinin ur‑rad‑nkrn mddn zġ‑lmut, ar‑ttinin ur‑llin kra l‑lmalayka nġd kra l‑larwaḥ. imma ifarisin ar‑ttinin kullu ġwid llan.

⁹ zaydn kullu ar‑tġuwwatn aylliġ nkrn kra n‑imslmdn n‑ššrɛ l‑lmdhb n‑ifarisin, bzgn bahra f‑wiyyaḍ inin‑asn: «ur‑akkʷ‑nufi kra yʷh̬šnn ġ‑urgaz‑ad. ur‑išqi a‑srs‑isawl kra n‑rruḥ nġd kra l‑lmalak.»

¹⁰ zaydn ġmkan aylliġ gis ruḥn timiġt. ar‑kullu‑lddin ġ‑bulus, aylliġ iksuḍ‑unmġur n‑iɛskrin a‑t‑gn d‑igzman. yamr iɛskrin ad‑gguzn ad‑asn‑t‑id‑kkisn s‑ifaddn awin‑t s‑lqṣr.

¹¹ ġ‑iḍ‑an a‑ibidd siditnnġ f‑bulus yini‑as: «zɛm d‑ih̬f‑nnk. ġmklli flla tfkit tugga‑nnk ġ‑urušalim, ġmkan a‑k‑id‑iqqann a‑tnt‑flla‑tfkt ula ġ‑ruma.»

skrn ayt‑yudaya f‑ad‑nġn bulus

¹² ndid azkka ġ‑ṣṣbaḥ mšawarn kra n‑ayt‑yudaya i‑ngratsn, ggalln ur‑šttan ula swan ard nġn bulus.

¹³ uggʷar n‑kkuẓ id‑mraw a‑iggullan f‑ġayan.

¹⁴ aškin‑d s‑dar inmġurn n‑tgmmi n‑rbbi d‑imġarn n‑tmazirt inin‑asn: «ha‑nkkʷni nmšaška‑d nggall tagallit imqqurn is‑ur‑ra‑nšš ard nnġ bulus.

¹⁵ nra gigun kunni ula ayt‑lmḥkama a‑taznm ġilad s‑unmġur n‑iɛskrin, tḍalbm‑t a‑d‑yawi bulus s‑lgddam‑nnun, tinim‑as is‑tram a‑ti‑tsqsam uggʷar f‑ma‑iskr. ha‑nkkʷni nujad a‑t‑nnġ ur‑ta‑d‑ilkim.»

¹⁶ walaynni ġaylli‑f‑d‑mšaškan, isfld fllas yus n‑uwlltmas n‑bulus. iddu s‑lqṣr ikšm s‑dar bulus yini‑as‑t.

¹⁷ iġr bulus ġakudan i‑yan zġ‑lqbṭanat n‑iɛskrin yini‑as: «awi aɛyyal‑ad i‑unmġur‑nnun, ašku ira ad‑as‑yini kra.»

¹⁸ yawi‑t lqbṭan išškšm‑t s‑dar‑unmġur yini‑as: «iġra‑yyi‑uḥbbas bulus iḍalb‑iyi ad‑ak‑d‑awiġ aɛyyal‑ad, ašku ira ad‑ak‑yini kra.»

¹⁹ yamẓ‑unmġur ġ‑ufus n‑uɛyyal, yawi‑t waḥdut isqsa‑t: «ma‑rad‑iyi‑tinit?»

²⁰ yini‑as: «mšaškan‑d inmġurn n‑ayt‑yudaya a‑zgik‑ḍalbn ad‑asn‑in‑tawit bulus azkka s‑lmḥkama. rad‑ak‑inin ran a‑t‑sqsan uggʷar f‑ma‑iskr.

²¹ walaynni a‑tn‑ur‑tamnt ašku llan uggʷar n‑kkuẓ id‑mraw n‑urgaz, rgsn ar‑srs‑tqln. ggalln ur‑šttan ula swan ard‑t‑nġn. ujadn ġilad, ar‑ġir‑tqln s‑wawal‑nnk.»

²² yini‑as‑unmġur i‑uɛyyal: «ad‑ur‑tinit i‑yan is‑iyi‑di‑tiwit lh̬bar‑ad.» yadj‑t ilmma iddu.

ityazan bulus s‑dar lḥakm filiks

²³ iġr‑unmġur n‑iɛskrin i‑sin zġ‑lqbṭanat‑ns yuṣṣa‑tn yini‑asn: «ssmunad‑d sin id‑miyya (200) n‑uɛskri d‑ssa n‑id‑mraw (70) n‑umnnay d‑sin id‑miyya (200) n‑willi ṭṭafnin aḥriš, ad‑ujadn ad‑ddun s‑qayṣriyya ġ‑iḍ‑ad ġ‑tasaɛt tis tẓa.

²⁴ tzaydm kra n‑wagmarn ma‑ġ‑a‑issudu bulus, baš a‑ti‑tsslkmm ġ‑laman i‑lḥakm filiks.»

²⁵ yara ilmma yat‑tbrat yini:

²⁶ «zġ‑kludyus‑lisyas, i‑sidi lḥakm iɛzzan filiks, ad‑ak‑tili sslamt.

²⁷ argaz‑ad, ġwin‑t ayt‑yudaya, irin ntni a‑t‑nġn. afġ‑t‑in is‑iga yan iṭṭafn taġamt ġ‑ayt‑ruma, nlkm‑n nkki d‑iɛskrin‑inu nkkis‑asn‑t‑id.

²⁸ ssḥaḍrġ‑asn‑t‑in ġ‑lmḥkama‑nsn baš ad‑issanġ ma‑s‑a‑srs‑taštkkan.

²⁹ afġ‑t‑in is‑ur‑iskir ma‑f‑a‑itmtat nġd ma‑f‑a‑ittili ġ‑lḥbs. ur‑a‑srs‑taštkkan abla s‑kra igan win ššrɛ‑nsn.

³⁰ walaynni lliġ‑iyi‑d‑ilkm lh̬bar n‑izd kra gisn mšawarn fllas a‑t‑nġn, aznġ‑ak‑t‑in. iniġ i‑willi srs taštkkanin ad‑as‑ṣrḍn s‑lgddam‑nnk.»

³¹ skrn ilmma iɛskrin ġmklli‑tn‑yuṣṣa‑unmġur‑nsn, awin bulus ġ‑iyḍ aylliġ lkmn tamdint n‑antibatris.

³² ndid azkka wrrin ntni s‑lqṣr, fln imnnayn a‑t‑awin zġ‑ġin.

³³ lliġ ruḥn qayṣriyya, fkn tabrat i‑lḥakm, šškšmn bulus s‑dars.

³⁴ lliġ iġra lḥakm tabrat, isqsa bulus gu‑man tamazirt a‑iga.

³⁵ lliġ issn is‑iga gu‑kilikiyya yini‑as: «rad‑ak‑sfldġ ġakud nna‑d‑uškan ġwilli‑ak‑ṣrḍnin.» yuṣṣa‑tn ilmma a‑t‑gabln ġ‑lqṣr n‑hirudus.