irqqasn 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

uguz n‑rruḥ lqudus

¹ zrin‑uwssan aylliġ‑d‑iruḥ lɛid n‑win smmus id‑mraw. munn kullutn ġ‑yat‑tgmmi.

² sfldn ilmma i‑yat tijjijt tuška‑d zġ‑ignwan tɛmmr tigmmi lli‑ġ‑gawrn zund aḍu itjhhdn.

³ ẓrn kra irwas timzliwin l‑lɛafit, bḍunt tettrs yat f‑kraygatt yan gisn.

⁴ ɛmmrn kullu s‑rruḥ lqudus, bdun ar‑sawaln s‑iwaliwn iġribn ġmklli‑asn‑tn‑ifka rruḥ lqudus.

⁵ ġ‑uwssan‑an llan ayt‑yudaya ġ‑urušalim, uškan‑d zġ‑kullu timizar n‑ddunit, ar‑bahra‑ttirin ad‑trḍun rbbi.

⁶ lliġ sfldn i‑taqqurt, munn f‑tgmmi aylliġ iggut ma‑ibiddn ġin. iḍr‑asn lɛjb ašku kraygatt yan ar‑isflid i‑wawal n‑dars.

⁷ ar‑bahra‑tɛjjabn ar‑ssmqsan i‑ngratsn: «ġwid kullu sawalnin, is‑urd ayt‑jalil ad‑gan?

⁸ mamnk a‑darsn‑nsflid kud yan i‑wawal n‑tmazirt lli‑ġ‑ilul?

⁹ hati kra ginnġ yuška‑d zġ‑fartiyya d‑kra zġ‑madiyya ula ilamiyya, aškin‑d wiyyaḍ zġ‑masubuṭamya ula yudaya ula kabadukiyya ula buntus ula asiyya.

¹⁰ aškin‑d wiyyaḍ yaḍni zġ‑frijiyya ula bamfiliyya ula miṣr ula tisgiw n‑libiyya ġ‑tama n‑kurini. kra ginnġ yuška‑d zġ‑tmdint n‑ruma, gn ayt‑yudaya ula ibrraniyn lli‑umẓnin aġaras n‑ayt‑rbbi.

¹¹ yašk‑id kra zġ‑igzir n‑krit ula zġ‑tmazirt n‑waɛrabn. walaynni ar‑kullu‑nsflid i‑wawal n‑darnnġ, ar‑aġ‑sawaln f‑iskkirn mqqurnin n‑rbbi.»

¹² ar‑tɛjjabn mddn‑an kullutn, gammin ad‑fhmn mayd illan, ar‑ssmqsan i‑ngratsn: «ma‑tga lmɛna n‑mayad?»

¹³ walaynni kra gisn ar‑teṭnaẓn ġ‑irqqasn ar‑ttinin: «han aman n‑waḍil iktin ayd swan mddn‑ad.»

tabrraḥt n‑bṭrus

¹⁴ inkr bṭrus ibidd ġ‑lgddam‑nsn ntta d‑wiyyaḍ s‑yan d‑mraw, yall awal‑ns yini‑asn: «wa‑irgazn ayt‑yudaya ula kullu imzdġn n‑urušalim, sfldat‑iyi ad‑awn‑iniġ ma‑iga mayad.

¹⁵ mddn‑ad ur‑swin aman n‑waḍil iktin ġmklli tġalm. hati bḥra‑di‑tlkm tasaɛt tis tẓa n‑ṣṣbaḥ.

¹⁶ walaynni mayd ijran ġ‑darnnġ iga maylli‑f‑isawl rbbi f‑imi n‑nnabi yuwwil inna:

¹⁷ ‹ġ‑uwssan ggʷranin ra‑n‑zzugzġ rruḥ‑inu f‑kullu mddn. rad‑sawaln tarwa‑nnun d‑istitun s‑iwaliwn lli‑rad‑asn‑akkaġ. rad‑tisfiwn iɛyyaln‑nnun mad‑asn‑malaġ. rad‑twargan ifqqirn‑nnun s‑mad‑asn‑ssbayyanġ.

¹⁸ hati ġ‑uwssan‑an ra‑n‑zzugzġ rruḥ‑inu f‑ih̬ddamn‑inu d‑th̬ddamin‑inu, rad‑sawaln s‑iwaliwn lli‑rad‑asn‑malaġ.

¹⁹ rad‑skarġ timitar ġ‑tattuyt n‑ignwan ula lmɛjizat f‑iggi n‑wakal. rad‑ilin idammn d‑lɛafit d‑imdla n‑waggu iggutn.

²⁰ ra‑tllas tafukt iẓggʷaġ‑wayyur zund idammn, iruḥ‑d‑ilmma‑wass ihiyyan lli‑ġ‑ra‑d‑yašk sidis n‑bnadm s‑lmjd iggutn.

²¹ d‑kullu wanna izawgn ġ‑ism‑ns, ra‑injm.›

²² «wa‑irgazn ayt‑rbbi, sfldat i‑ma‑rad‑awn‑iniġ. yasuɛ gu‑naṣira, tlla gis lbaraka n‑rbbi, iskr ġ‑darun lquwwat d‑lmɛjizat d‑tmitar tjhhdnin. kullu mayad, imla‑yawn‑t rbbi.

²³ imma kunni tnġam‑t lliġ‑ti‑tdḥim s‑gr ifassn n‑mddn ʷh̬šnnin a‑t‑agʷln f‑uggjdi. imma rbbi, issn mayad iqṣad‑t ur‑ta‑ijri,

²⁴ issnkr‑t‑id ilmma irẓm‑as zġ‑uẓbbar l‑lmut, ašku ur‑tẓḍar lmut a‑ti‑tamẓ.

²⁵ ġmklli fllas inna dawd: ‹ar‑bdda‑tmnadġ sidi ġ‑lgddam‑inu, yili‑bdda didi, ur‑sar‑asusġ.

²⁶ ifrḥ‑uwl‑inu, ar‑t‑italġ ils‑inu. wah̬h̬a tḍɛf ddat‑inu, giġ‑n rrja‑nu ġ‑rbbi.

²⁷ ur‑ra‑yyi‑tflt ġ‑udġar n‑willi mmutnin, ula ra‑tadjt amẓlay‑nnk a‑irkm ġ‑umḍḍal.

²⁸ tmlit‑iyi‑d aġaras n‑tudrt. ġ‑dark a‑ġ‑ra‑yyi‑tɛmmrt s‑lfrḥ.›

²⁹ «way‑aytma, ẓḍarġ ad‑awn‑sawlġ s‑zzɛamt f‑babatnnġ dawd ašku tssnm is‑immut ityawmḍal, yili‑umḍḍal‑ns ġ‑darnnġ sul s‑ġassad.

³⁰ imma nttan, nnabi a‑iga. yissan is‑as‑inna rbbi s‑wawal izgan: ‹yan zġ‑tarwa n‑tarwa‑nnk a‑rad‑gġ d‑ugllid zund kiyi.›

³¹ issn dawd ma‑ra‑yili, isawl f‑tnkra l‑lmasiḥ yini is‑ur‑ra‑t‑ifl rbbi ġ‑udġar n‑willi mmutnin, ula ra‑trkm ddat‑ns ġ‑umḍḍal.

³² «hati yasuɛ a‑d‑issnkr rbbi zġ‑gr willi mmutnin. nga nkkʷni kullwaġ inagan f‑mayan, nẓra‑t.

³³ ityalal ilmma s‑ufasi n‑rbbi babatnnġ, yamẓ zġ‑dars rruḥ lqudus lli‑f‑inna rad‑aġ‑t‑ifk. izzugz‑t‑id fllannġ ġilad ġmkad tẓram ar‑as‑tsflidm.

³⁴ ašku dawd, urd nttan a‑ityalaln s‑ignna, walaynni isawl f‑wayyaḍ inna: ‹ha‑sidi rbbi inna i‑sidi, skiws f‑ufasiy‑inu

³⁵ ard gġ inuwwašn‑nnk ġ‑ddu iḍarn‑nnk.›

³⁶ way‑ayt‑rbbi kullukn, iqqan‑kʷn‑d a‑tissanm mayad. yasuɛ lli‑tnġam f‑uggjdi, iga‑t rbbi d‑sidis n‑bnadm ig‑t d‑lmasiḥ‑nnġ.»

³⁷ lliġ sfldn mddn i‑mayad, ibbi ġ‑tasa‑nsn. inin i‑bṭrus d‑irqqasn yaḍni: «way‑aytma, ma‑ra‑nskr?»

³⁸ isawl bṭrus yini‑asn: «flat kullu ma‑tskarm yʷh̬šn, iddm kud yan gigun ġ‑waman s‑ism n‑yasuɛ lmasiḥ, ad‑awn‑iṣamḥ rbbi f‑ddnub‑nnun ifk‑awn lbaraka n‑rruḥ lqudus.

³⁹ ašku maylli inna rbbi f‑ma‑ra‑iskr ifulki, inna‑yawn‑t kunni ula tarwa‑nnun ula kullu wiyyaḍ aggugnin, yini‑t i‑kullu ma‑mi‑d‑iġra rbbi siditnnġ s‑dars.»

⁴⁰ izayd bṭrus ifk tugga‑ns izzɛam‑tn s‑iwaliwn ggutnin yini‑asn: «skrat kullu f‑a‑tnjmm zġ‑lɛqubit lli‑ra‑d‑iḍr f‑tasut‑ad yʷh̬šnn.»

tamunt n‑imumnn

⁴¹ ssddmn ilmma kullu willi umnnin iwaliwn‑ns. ġassan ad‑asn‑izuyd rbbi ma‑itggan kraḍ id‑walf (3000) n‑yan.

⁴² ar‑kullu‑tlhun s‑ulmmud n‑irqqasn ula tamunt n‑ingratsn ar‑tbbin aġrum ar‑tẓallan i‑rbbi.

⁴³ ar‑tġuwḍn mddn kullutn, ašku ggutnt lmɛjizat d‑tmitar tjhhdnin lli‑iskar rbbi f‑ifassn n‑irqqasn.

⁴⁴ imma ġwilli umnnin s‑yasuɛ ar‑kullu‑tmunun ar‑akkan i‑ngratsn.

⁴⁵ ar‑zznzan ayda‑nsn d‑tġawsiwin lli‑ṭṭafn, ar‑t‑aṭṭun f‑willi gisn ḥtajjanin, kud yan d‑unšk lli‑f‑ilkm.

⁴⁶ ass f‑wass ar‑tmunun kullutn ġ‑tgmmi n‑rbbi, ar‑tbbin aġrum ġ‑tgʷmma‑nsn ar‑šttan i‑ngratsn s‑nniyt d‑lfrḥ iggutn,

⁴⁷ ar‑talġn rbbi. imma ayt‑tmdint ar‑kullu‑fllasn‑ttinin is‑bahra‑fulkin. kraygatt ass ar‑asn‑itzayad siditnnġ ġwilli njmnin.