irqqasn 19 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

amuddu wis kraḍ n‑bulus i‑tbrraḥt

¹ ġakud lliġ illa abullus ġ‑kurintus, izri bulus zġ‑ṭuẓẓunt n‑tmazirt‑an, ilkm tamdint n‑afsus. yaf‑n ġin kra n‑imḥḍarn,

² isqsa‑tn: «is‑awn‑d‑ityawfka rruḥ lqudus lliġ tumnm?» inin‑as: «ur‑jju‑nsfld is‑illa kra n‑rruḥ lqudus.»

³ isqsa‑tn ilmma: «ma‑iga‑udum lli‑s‑tddmm?» inin‑as: «udum lli‑s‑a‑issddam yuḥanna.»

⁴ yini‑asn bulus: «ikka‑ttin yuḥanna ar‑issddam ġwilli ranin ad‑fln ddnub‑nsn wrrin s‑rbbi, walaynni isawl‑asn f‑walli ra‑d‑yašk tigira‑ns, a‑t‑igan d‑yasuɛ. yuṣṣa‑tn ad‑srs‑amnn.»

⁵ lliġ sfldn imḥḍarn‑an i‑mayd‑asn‑inna bulus, issddm‑tn ġ‑waman s‑ism n‑siditnnġ yasuɛ.

⁶ isrs fllasn ifassn‑ns, s‑d‑fllasn‑igguz rruḥ lqudus, ar‑sawaln s‑iwaliwn iġribn ar‑tbrraḥn s‑mad‑asn‑imala rbbi.

⁷ ma‑itggan sin d‑mraw n‑urgaz ad‑gan.

tabrraḥt n‑bulus ġ‑afsus

⁸ kraḍ‑iyrn a‑ikššm bulus s‑tgmmi n‑tẓallit ar‑isawal d‑mddn s‑zzɛamt, ig‑n tiqqi‑ns ad‑asn‑iml is‑yʷġẓan maylli‑asn‑ittini f‑tgldit n‑rbbi.

⁹ walaynni kra gisn wrrin ssiqarn ih̬f‑nsn, ur‑rin ad‑amnn. ar‑rggmn ġ‑uġaras l‑lmasiḥ ġ‑lgddam n‑kullu wiyyaḍ. ġakudan a‑iffuġ bulus zġ‑darsn, yawi dids imḥḍarn, iwrri s‑lmdrst n‑tirannus ar‑ġin‑isawal d‑mddn ass f‑wass.

¹⁰ ġmkan a‑izzri sin isggʷasn, aylliġ sfldn kullu imzdġn n‑asiyya i‑wawal n‑siditnnġ, ayt‑yudaya ula ibrraniyn.

ġaylli ijran i‑tarwa n‑skawa

¹¹ ar‑iskar rbbi lmɛjizat f‑ufus n‑bulus, ur‑jju‑ẓrin mddn zund ntnti.

¹² ar‑ttawin išrwiḍn ula tibannkiw zġ‑ufus‑ns i‑imuḍan‑nsn, ar‑tjjin ar‑zgisn‑tffuġn ljnun ʷh̬šnnin.

¹³ ilin ġin kra n‑ayt‑yudaya ar‑tlullin ar‑ssufuġn ljnun. ġaln is‑ẓḍarn ad‑ssufuġn ljnun s‑ism n‑siditnnġ yasuɛ, ar‑tn‑tamrn: «ffuġat s‑ism n‑yasuɛ lli‑s‑a‑itbrraḥ bulus.»

¹⁴ ġmkan ad‑skarn ssa n‑aytmatn, tarwa n‑yan‑unmġur n‑tgmmi n‑rbbi ism‑ns skawa.

¹⁵ walaynni irur‑asn ljnn‑an: «yasuɛ ssnġ‑t, ula bulus ssnġ ma‑iga, walaynni ma‑tgam kunni?»

¹⁶ yakʷi‑n‑fllasn‑umjnun ar‑gisn‑ikkat inru‑tn kullutn. rwln zġ‑tgmmi, tyaggasn bbint‑tmlsa‑nsn.

isḥḥarn lli‑umnnin

¹⁷ sfldn kullu imzdġn n‑afsus f‑ma‑ijran, ayt‑yudaya ula ibrraniyn. wrrin iksaḍn kullutn, uqqrn ism n‑siditnnġ yasuɛ bahra.

¹⁸ imma ġwilli umnnin, iggut gisn ma‑d‑yuškan ar‑tqrran s‑iskkirn ʷh̬šnnin lli‑sttin‑kkan ar‑tn‑skarn.

¹⁹ kigan d‑isḥḥarn a‑d‑issmunn arratn‑nsn jdrn‑tn ġ‑lgddam n‑mddn. lliġ ḥasbn atig n‑warratn‑an, afn‑in smmus id‑mraw n‑id‑walf (50.000) n‑uqarid n‑nnuqrt.

²⁰ ġmkan a‑s‑a‑itzayad‑wawal n‑siditnnġ s‑jjhd, iwrri ityawssan ġ‑kraygatt mani.

uduy n‑isiyyah̬n ġ‑afsus

²¹ tigira n‑mayan iswangm bulus, iml‑as rruḥ lqudus is‑t‑id‑iqqan a‑izri zġ‑makiduniyya d‑ah̬aya s‑urušalim. inna: «tigira n‑mad‑kkiġ ġin, iqqan‑iyi‑d ad‑ẓrġ ula tamdint n‑ruma.»

²² yazn ilmma sin imɛawann‑ns timutaws d‑arastus a‑t‑zwurn s‑makiduniyya, imma ntta sul‑n‑iqama yan kra ġ‑asiyya.

²³ walaynni ġ‑uwssan‑an tnkr lfrtunt iggutn f‑ssibt n‑uġaras l‑lmasiḥ.

²⁴ illa ġin yan‑usiyyah̬ ism‑ns dimitryus ar‑itɛdal tigʷmma mẓẓinin zġ‑nnuqrt zund tigmmi lli‑ġ‑a‑tɛbadn ilaha ‹arṭamis›. ar‑tamẓn isiyyah̬n ma‑iggutn f‑twuri‑an.

²⁵ issmun‑tn‑d kullu dimitryus yini‑asn: «wa‑irgazn, tssnm is‑a‑ntamẓ lh̬ir f‑twuri‑ad‑nnġ.

²⁶ walaynni tsfldm i‑ġwan mi ttinin bulus tẓrm ġaylli iskar, ar‑ittini ilahat lli‑skrn ifassn n‑bnadm urd ilahat ad‑gan. hati irur mddn ggutnin ijlu‑tn ġid ġ‑afsus ula ġ‑kullu tamazirt n‑asiyya.

²⁷ urd ġir tawuri‑nnġ a‑ra‑ih̬sr, walaynni rad‑wrrin mddn ar‑rggmn ula ġ‑tgmmi n‑ilaha imqqurn arṭamis, inin is‑ur‑tgi yat h̬talli kullu tɛbadn mddn ġ‑asiyya ula ddunit kullutt.»

²⁸ lliġ sfldn i‑iwaliwn‑ad nkrn‑d gisn iriyn ar‑ssġuyyun ar‑ttinin: «tamqqurt a‑tga arṭamis n‑ayt‑afsus.»

²⁹ duyn bahra, aylliġ tqrbl‑tmdint kullutt. nkrn mddn ggutnin ġwin sin ayt‑makiduniyya zġ‑usmun n‑bulus, ismawn‑nsn gayus d‑aristarh̬us, zukrn‑tn s‑usays lli‑ġ‑a‑tmunun ayt‑tmdint‑an.

³⁰ bulus ira a‑iftu s‑wammas n‑mddn‑an a‑srsn‑isawl, walaynni ur‑t‑udjin aytmatn.

³¹ kra n‑imddukkʷal n‑bulus, gan udmawn mqqurnin n‑tmazirt‑an, aznn‑as mad‑as‑ittinin: «a‑ur‑tssbayynt ih̬f‑nnk ġ‑usays n‑tmdint.»

³² mrwin mddn ar‑ssġuyyun, kud yan d‑ma‑ittini. iggut gisn ma‑ur‑issinn ma‑f‑n‑munn.

³³ inkr kra gisn ġakudan inin izd yan‑urgaz iskandr ad‑dar awal, dḥin‑t‑in ayt‑yudaya s‑lgddam n‑mddn a‑srsn‑isawl. yall afus‑ns a‑tn‑issfssa yiri ad‑asn‑iml is‑urd ayt‑yudaya a‑issnkrn uduy.

³⁴ walaynni lliġ ẓran izd gu‑yudaya a‑iga, nkrn‑daġ ar‑ssġuyyun ar‑ttinin: «tamqqurt a‑tga arṭamis n‑ayt‑afsus.» zaydn snat tasaɛin ad‑ssġuyyun s‑wawal‑an.

³⁵ qaman ġmkan aylliġ inkr‑uktatbi l‑lmḥkama. issfssa‑tn yini‑asn: «way‑ayt‑afsus. is‑illa ma‑ur‑issinn tamdint n‑afsus a‑igabln tigmmi n‑arṭamis tamqqurt d‑uẓru n‑ṣṣurt‑ns lli‑d‑iḍrn zġ‑ignna?

³⁶ kullu ddunit tssn tiġawsiwin‑ad. ur‑iẓḍar yan ad‑asnt‑yanf. imma ġilad illa fllawn a‑tfssam, a‑ur‑tskrm kra f‑a‑kʷn‑ttigʷraẓ.

³⁷ ha‑kunni tiwim‑d irgazn‑ad s‑ġid wah̬h̬a ur‑ukirn tigʷmma lli‑ġ‑a‑ntɛbad ula‑da‑rggmn ġ‑ilaha‑nnġ.

³⁸ iġ‑ira dimitryus ula imddukkʷal‑ns ad‑ṣrḍn i‑kra n‑yan, illa fllasn ad‑ddun s‑lmḥkama. ašku skrn imġarn l‑lmḥkama ussan a‑gisn‑sflidn i‑mddn. ra‑tiẓḍarm a‑n‑darsn‑tmṣaraḍm,

³⁹ nġd iġ‑tram kra yaḍni, ih̬ṣṣa‑kʷn a‑ti‑tssnfaṣalm i‑ngratun ġ‑dar imġarn n‑tmdint.

⁴⁰ walaynni ġayd darnnġ ijran ġassad, illa gis ma‑f‑a‑ntiksaḍ, a‑ur‑srnnġ‑aštkkan lḥukkam n‑rruman, inin izd ntni a‑f‑inkr‑uduy‑ad. ur‑darnnġ ma‑nttini f‑imrwayn‑ad, ašku ur‑nẓḍar a‑nini ma‑f‑d‑munn mddn‑ad ggutnin.»

⁴¹ lliġ inna mayad, issmsr‑tn s‑tgʷmma‑nsn.