irqqasn 18 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tawuri n‑bulus ġ‑kurintus

¹ tigira n‑mayan iffuġ bulus zġ‑atina iddu s‑tmdint n‑kurintus.

² imnaggar ġin yan‑urgaz gu‑yudaya ism‑ns akila, ig laṣl‑ns zġ‑tmazirt n‑buntus. ikka‑d tamazirt n‑iṭalya ġ‑uwssan‑an, ntta d‑tmġart‑ns briskilla, ašku qayṣr kludyus yumr kullu ayt‑yudaya ad‑ffuġn tamdint n‑ruma. iddu darsn bulus s‑tgmmi,

³ igawr darsn ar‑didsn‑ith̬dam, ašku yat a‑tga‑twuri‑nsn ntni d‑bulus, ar‑gnnun ih̬iyyamn.

⁴ kraygatt ass n‑usunfu ar‑ittidu bulus s‑tgmmi n‑tẓallit, ar‑isawal d‑ayt‑yudaya d‑ibrraniyn, ig‑n tiqqi‑ns a‑tn‑irar ad‑amnn zund ntta.

⁵ lliġ‑d‑ilkm sila d‑timutaws zġ‑tmazirt n‑makiduniyya, afn‑in bulus ilha s‑tbrraḥt n‑wawal n‑rbbi, ar‑isawal s‑ayt‑yudaya s‑lmɛqul yini‑asn: «yasuɛ a‑igan lmasiḥ lli‑s‑a‑ttqlm.»

⁶ walaynni ẓin dids ayt‑yudaya rgmn‑t aylliġ fllasn issus timlsa‑ns yini‑asn: «ddnub‑nnun f‑ih̬f‑nnun. nkki brraġ gigun. hati zġ‑ġilad rad‑dduġ s‑ibrraniyn.»

⁷ iffuġ zġ‑darsn, ikšm s‑tgmmi n‑yan‑ubrrani ism‑ns tityus‑yusṭus. iga yan zġ‑willi tɛbadnin rbbi, tili‑tgmmi‑ns ġ‑tama n‑tgmmi n‑tẓallit.

⁸ imma krisbus amġar n‑tgmmi n‑tẓallit, ntta d‑ayt‑tgmmi‑ns kullutn, wrrin umnn s‑siditnnġ. ggutn wiyyaḍ ġ‑tmdint‑an n‑kurintus wrrin umnn lliġ sfldn i‑mad‑asn‑ittini bulus. ssddmn‑tn ilmma aytmatn ġ‑waman.

⁹ yan‑iyḍ isawl‑d siditnnġ s‑bulus ġ‑twargit yini‑as: «ad‑ur‑tiksaṭṭ. zayd ar‑tsawalt d‑mddn a‑ur‑tfssat.

¹⁰ hati lliġ didk, ur‑illi ma‑ra‑k‑ilkm s‑gar, ašku ggutn mddn‑inu ġ‑tmdint‑ad.»

¹¹ iqama bulus ġin asggʷas d‑mnaṣṣ, ar‑asn‑isslmad awal n‑rbbi.

¹² walaynni ġ‑uwssan lli‑ġ‑iga galyun lḥakm ġ‑tmazirt‑an n‑ah̬aya, nkrn ayt‑yudaya kullutn ġwin bulus awin‑t s‑lmḥkama

¹³ inin fllas: «argaz‑ad ar‑itrara mddn ad‑ffuġn zġ‑ššrɛ n‑musa ar‑tɛbadn rbbi s‑mamnk yaḍni.»

¹⁴ yiri bulus a‑fllasn‑irar awal, s‑inkr galyun ġakudan yini i‑ayt‑yudaya: «mrad is‑tga‑tġawsa‑yad tin kra iffuġn lqanun nġd kra l‑lbaḍl yʷh̬šnn, rad‑awn‑sfldġ.

¹⁵ walaynni ur‑tgi h̬tad ġir taġawsa n‑iwaliwn d‑ismawn ula ššrɛ‑nnun. zaydat tssnfaṣalm‑t kunni i‑ngratun. ur‑rad‑tḥkamġ nkki f‑wan tiġawsiwin‑ad.»

¹⁶ issmsr‑tn zġ‑lmḥkama.

¹⁷ ffuġn kullu, ġwin sustanis amġar n‑tgmmi n‑tẓallit, ar‑t‑kkatn ġ‑tama l‑lmḥkama. imma lḥakm galyun ur‑tt‑akkʷ‑gisn‑yiwi.

iwrri bulus s‑anṭakiyya

¹⁸ iqama bulus ġ‑dar aytmatn ġ‑kurintus yan mnnaw‑uwssan. lliġ‑didsn‑imsafaḍ, iddu s‑lmrsa n‑kanh̬ariyya. ġin a‑ġ‑issmakkrd agayyu‑ns, ig mayan tamatart n‑kra‑s‑iqawl i‑rbbi. yamẓ ilmma anaw issudu ġ‑umda s‑tmazirt n‑suriyya, yawi dids akila d‑briskilla.

¹⁹ ruḥn tamdint n‑afsus, ifl‑tn. ikšm nttan s‑tgmmi n‑tẓallit ar‑isawal d‑ayt‑yudaya.

²⁰ ḍalbn zġ‑gis a‑didsn‑iqama, walaynni ur‑iri a‑imaṭl ġin.

²¹ imsafaḍ didsn yini‑asn: «iġ‑ira rbbi rad‑d‑wrriġ s‑darun.» iffuġ afsus issudu ġ‑umda,

²² aylliġ ilkm lmrsa n‑qayṣriyya. yamẓ aġaras s‑urušalim, insallam d‑aytmatn n‑umnaggar n‑ġin, ikmml ilmma s‑anṭakiyya.

²³ iqama gis kra n‑uwssan, imuddu ilmma ar‑itkka tamazirt n‑galaṭiyya ula frijiyya ar‑issdus imḥḍarn kullutn.

tabrraḥt n‑umslmd abullus

²⁴ ġ‑uwssan‑an a‑ġ‑d‑yuška yan gu‑yudaya ism‑ns abullus s‑afsus. iga laṣl‑ns zġ‑tmdint n‑iskandariyya. ig wad bahra issnn mamnk a‑isawal, yissan arratn n‑rbbi bahra.

²⁵ isfld f‑ulmmud n‑uġaras n‑siditnnġ, ar‑isawal s‑mddn s‑zzɛamt iggutn. ar‑tn‑isslmad f‑iskkirn n‑yasuɛ d‑iwaliwn‑ns ġmklli gan, walaynni ur‑issin f‑udum abla ġwalli‑s‑a‑issddam yuḥanna.

²⁶ yan‑wass ar‑isawal s‑zzɛamt ġ‑tgmmi n‑tẓallit, tsfld‑as briskilla d‑akila. awin‑t s‑tgmmi, mln‑as uggʷar f‑uġaras n‑rbbi baš a‑t‑yissan ġmklli iga.

²⁷ yiri ilmma a‑ibbi amda s‑tmazirt n‑ah̬aya. zzɛamn‑t aytmatn a‑iskr ġmkan, aran yat‑tbrat i‑imḥḍarn ġ‑ah̬aya, ḍalbn‑tn a‑t‑in‑šškšmn s‑gratsn. lliġ iruḥ nttan ah̬aya, ar‑bahra‑itɛawan ġwilli ibark rbbi umnn s‑lmasiḥ.

²⁸ ašku ar‑isawal s‑ayt‑yudaya ġ‑lgddam n‑kullu mddn, aylliġ ur‑ẓḍarn ntni a‑fllas‑rarn awal. ar‑asn‑imala zġ‑warratn n‑rbbi izd yasuɛ a‑igan lmasiḥ lli‑s‑a‑tqln.