irqqasn 17 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

uduy ġ‑tasaluniki

¹ zrin zġ‑tmdint n‑amfibulis ula abuluniyya, lkmn tamdint n‑tasaluniki. tili ġin yat‑tgmmi n‑tẓallit n‑ayt‑yudaya.

² ikšm srs bulus ġmklli iskar ġ‑tmdinin yaḍni. kraḍ‑uwssan n‑usunfu ar‑ġin‑isawal d‑mddn, ar‑asn‑imala ma‑ityaran ġ‑warratn n‑rbbi

³ ar‑asn‑ittini: «iqqan‑d ġwalli igan lmasiḥ a‑irfufn bahra, inkr‑d ilmma zġ‑lmut.» ar‑asn‑ittini: «yasuɛ lli‑f‑a‑yawn‑tbrraḥġ, nttan a‑igan lmasiḥ lli‑s‑a‑ttqlm.»

⁴ amnn kra n‑ayt‑yudaya s‑maylli‑asn‑ittini, ntni ula yan‑mnnaw zġ‑ibrraniyn lli‑tɛbadnin rbbi, d‑kra n‑tmġarin ist‑tgʷmma mqqurnin ġ‑tmdint‑an, wrrin kullu biddn d‑bulus d‑sila.

⁵ imma wiyyaḍ ġ‑ayt‑yudaya usin fllasn tanuwwašt. awin‑d kra n‑irgazn ʷh̬šnnin zġ‑ssuq, ġrn i‑mddn ggutnin ad‑didsn‑munn, ssduyn‑d tamdint kullutt. azzln s‑tgmmi n‑yasun, ar‑siggiln s‑bulus d‑sila baš a‑tn‑ssufġn s‑wammas n‑mddn.

⁶ lliġ ur‑tn‑ufin, zukrn yasun d‑kra n‑aytmatn yaḍni s‑dar imġarn n‑tmdint, ar‑tġuwwatn ar‑ttinin: «ġwilli ssgrawlnin ddunit kullutt, hatni uškan‑d ula s‑ġid,

⁷ išškšm‑tn yasun s‑tgmmi‑ns. ffuġn ntni zġ‑lqanun n‑qayṣr, ar‑ttinin illa yan‑ugllid yaḍni ism‑ns yasuɛ.»

⁸ lliġ sfldn mddn d‑imġarn‑nsn i‑mayad, mrwin bahra.

⁹ ḍalbn ilmma fllasn ḍḍmant zġ‑yasun d‑aytmatn yaḍni, rẓmn‑asn.

ayt‑biriyya ar‑siggiln ġ‑warratn n‑rbbi

¹⁰ lliġ‑d‑ḍrnt tillas, nkrn aytmatn safḍn bulus d‑sila s‑biriyya. lliġ lkmn tamdint‑an, kšmn s‑tgmmi n‑tẓallit n‑ayt‑yudaya.

¹¹ mddn‑an n‑biriyya, ur‑qqurn ih̬fawn‑nsn zund ayt‑tasaluniki. ar‑ttirin ad‑sflidn i‑wawal n‑siditnnġ ar‑tt‑gis‑tawin bahra, ar‑siggiln ġ‑warratn n‑rbbi ass f‑wass, baš ad‑ẓrn is‑yʷġẓan maylli‑asn‑ittini bulus.

¹² yigat ma‑iwrrin yumn zġ‑ayt‑yudaya ula kra n‑tmġarin tibrraniyin ist‑tgʷmma mqqurnin d‑irgazn ibrraniyn ggutnin.

¹³ imma ayt‑yudaya ġ‑tasaluniki sfldn f‑mamnk a‑itbrraḥ bulus s‑wawal n‑rbbi ġ‑biriyya. ddun sshiyysn mddn ssduyn ula tamdint‑an.

¹⁴ nkrn aytmatn ġakudan, safḍn bulus s‑tama n‑umda. imma sila d‑timutaws qaman ġ‑biriyya.

¹⁵ iddu bulus, awin‑t imddukkʷal‑ns ar tamdint n‑atina, fln‑t‑in ġin wrrin s‑biriyya. yuṣṣa‑tn bulus ad‑inin i‑sila d‑timutaws a‑n‑dars‑aškin ad‑ur‑maṭln.

tabrraḥt n‑bulus ġ‑atina

¹⁶ lliġ a‑srsn‑itql bulus ġ‑atina, iẓr tamdint‑an tɛmmr s‑laṣnam ar‑tn‑tɛbadn mddn. ṭiyyr‑as bahra.

¹⁷ ikšm s‑tgmmi n‑tẓallit ar‑isawal d‑ayt‑yudaya d‑ibrraniyn lli‑tɛbadnin rbbi. ar‑isawal ula ġ‑ssuq ass f‑wass d‑winna gis llanin.

¹⁸ imnaggar kra n‑imslmdn l‑lfalsafa, gan ‹ibikuriyn› ula ‹rwaqiyn›. kra gisn inna fllas: «ġwad ijrubbujn, ma‑ira a‑yini?» inin wiyyaḍ: «irwas is‑a‑isawal f‑kra n‑ilahat ar‑tn‑tɛbadn mddn ġ‑tmizar yaḍni.» ġaln ntni is‑a‑isawal f‑sin ilahat ašku ar‑yaddr ‹yasuɛ› ula ‹tankra›.

¹⁹ awin‑t ilmma s‑usgawr n‑imġarn n‑tmdint‑an, iga asgawr lli‑mi‑ttinin ‹aryus‑bagus›. inin i‑bulus: «is‑trit ad‑aġ‑tmlt ma‑iɛna‑ulmmud‑ad l‑ljdid lli‑s‑a‑ttbrraḥt?

²⁰ ašku ar‑tsawalt f‑kra n‑tġawsiwin ur‑jju‑nsfld i‑zund ntnti. nra a‑nissan ma‑tga lmɛna‑nsnt.»

²¹ ġmkad ad‑gan ayt‑atina ula kullu willi zdġnin ġ‑tmdint‑an, ur‑a‑sslhawn ih̬f‑nsn abla ad‑sflidn ar‑sawaln f‑aynna igan taġawsa l‑ljdid.

²² ibidd bulus ġ‑wammas n‑usgawr yini‑asn: «way‑ayt‑atina, ẓriġ‑kʷn ar‑bahra‑ttuqqarm ilahat mknna gan.

²³ lliġ a‑tfjjijġ ġ‑tmdint‑nnun ar‑tmnadġ idġarn lli‑ġ‑a‑ttɛbadm. afġ‑n yan ġ‑iẓran lli‑dar ttẓallam, tyaran gis iwaliwn‑ad ‹ilah ur‑ityawssann›. han ġwalli ttɛbadm bla‑ti‑tssnm, nttan a‑f‑rad‑awn‑sawlġ.

²⁴ ašku rbbi lli‑iskrn ddunit ula kullu ma‑gis‑illan, nttan a‑igan sidis n‑ignna ula win‑wakal. ur‑a‑izddġ ġ‑tgʷmma tyawskarnin s‑ifassn n‑bnadm.

²⁵ ur‑t‑ih̬ṣṣa kra nskr nkkʷni, ašku ur‑iḥtajja yat. nttan a‑yakkan i‑kullu mddn tudrt d‑unfus ula kraygatt kra.

²⁶ iskr zġ‑tarwa n‑yan‑urgaz kullu tasutin n‑bnadm ad‑zdġn ġ‑tmizar n‑ddunit kullutt. iḥudda‑yasn isggʷasn n‑tudrt, igli‑asn iwtta n‑imzdġn‑nsn.

²⁷ iskr‑asn ġmkan baš ad‑siggiln s‑rbbi a‑ur‑imil mnaggarn dids issann‑t. walaynni rad‑awn‑iniġ, han ntta ur‑n‑yaggug f‑yan ginnġ

²⁸ ašku ‹nttan a‑ġ‑nddr nftu nili.› ġmklli nnan kra n‑ayt‑umarg‑nnun: ‹ula nkkʷni nga tarwa‑ns.›

²⁹ «lliġ nga nkkʷni tarwa n‑rbbi, illa fllannġ a‑ur‑nġal is‑iga nttan zund kra ityawskarn zġ‑uwrġ nġd nnuqrt nġd aẓru s‑ifassn ula lɛaql n‑bnadm.

³⁰ ġayd izrin iṣbr rbbi d‑willi ur‑ssinnin mayan. imma ġilad yumr kullu mddn ġ‑kraygatt mani ad‑fln kullu mad‑skarn yʷh̬šn.

³¹ ašku iqṣad yan‑wass lli‑ġ‑ra‑yut lḥukm s‑lḥqq f‑kullu ddunit f‑ufus n‑yan‑urgaz lli‑iẓli, iml srs tamatart i‑kullu mddn lliġ‑t‑id‑issnkr zġ‑lmut.»

³² lliġ sfldn i‑mayd inna bulus f‑yan‑d‑inkrn zġ‑lmut, kra gisn ar‑iḍṣṣa. imma wiyyaḍ nnan: «ar tawala yaḍni tsawlt‑aġ f‑tġawsa‑yad.»

³³ iffuġ ilmma bulus zġ‑darsn.

³⁴ kra gisn yumn s‑ma‑s‑asn‑inna, munn dids. illa gisn yan zġ‑imġarn n‑usgawr‑an ism‑ns dyunisyus. tili yat‑tmġart ism‑ns damaris, ilin kra n‑mddn yaḍni.