irqqasn 16 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

bulus yiwi dids timutaws

¹ ar‑itmuddu bulus aylliġ izri zġ‑tmdint n‑darba iruḥ tamdint n‑listra. yili ġin yan‑umḥḍar l‑lmasiḥ ism‑ns timutaws, ig yus n‑yat‑tmumnt ullt‑yudaya imma babas iga gu‑yunan.

² aytmatn ġ‑listra ula ġ‑iquniyya ar‑kullu‑ttinin f‑timutaws is‑iga amumn ifulkin.

³ yiri bulus a‑t‑dids‑yawi. iẓẓall‑as ġakudan i‑ddat‑ns, ašku ayt‑yudaya ġ‑tmdint‑an ssnn is‑iga babas abrrani.

⁴ ddun ilmma ar‑tkkan timdinin, ar‑tawin lh̬bar i‑aytmatn f‑maylli‑f‑d‑mšaškan irqqasn d‑imġarn ġ‑urušalim, ar‑tn‑tuṣṣan ad‑skarn s‑iwaliwn‑an.

⁵ ġmkad a‑s‑a‑tdusn imnaggarn n‑aytmatn ġ‑uġaras l‑lmasiḥ, ar‑ttigatn ass f‑wass.

tawargit n‑bulus ġ‑tmdint n‑truwwas

⁶ ur‑tn‑yudji rruḥ lqudus ad‑tbrraḥn s‑wawal n‑rbbi ġ‑tmazirt n‑asiyya. zaydn ġakudan ar‑tkkan tamazirt n‑frijiyya ula galaṭiyya.

⁷ lliġ lkmn tama n‑misiyya irin ad‑kšmn s‑tmazirt n‑bitiniyya, walaynni ur‑tn‑yudji rruḥ n‑yasuɛ.

⁸ zrin ġakudan f‑misiyya, ddun s‑lmrsa n‑truwwas.

⁹ ġ‑iḍ‑an a‑iwarga bulus yan‑urgaz gu‑makiduniyya ibidd iḍalb‑t bahra yini‑as: «ašk‑id s‑makiduniyya tɛawnt‑aġ.»

¹⁰ lliġ iẓra bulus tawargit‑an, nskr f‑a‑nddu ġakudan s‑tmazirt n‑makiduniyya, ašku nssn is‑aġ‑n‑iġra rbbi ġmkan ad‑asn‑nawi lh̬bar ifulkin.

ġmklli tumn lidiyya

¹¹ namẓ anaw nbbi zġ‑truwwas s‑igzir n‑samutraki. ndid azkka nlkm lmrsa n‑nyabulis.

¹² namẓ ġin aġaras s‑filibbi. tga nttat tamdint imqqurn ġ‑tsga‑yan n‑makiduniyya, bnan‑tt rruman. ngawr ġin kra n‑uwssan.

¹³ ġ‑wass n‑usunfu nffuġ s‑brra n‑tmdint nddu s‑tama n‑wasif, ašku nenna d‑ih̬f‑nnġ ra‑yili ġin kra n‑mani ġ‑a‑tmunun ayt‑yudaya ar‑gis‑tẓallan. nskiws ar‑nsawal d‑tmġarin lli‑n‑munnin ġin.

¹⁴ tili gisnt yat‑tmġart ism‑ns lidiyya, tga ullt‑tayatira ar‑tzznza ttub aẓggʷaġ. tga zġ‑tilli tɛbadnin rbbi. ih̬dm siditnnġ ġ‑uwl‑ns ġ‑tasaɛt‑an aylliġ tumn s‑kullu maylli inna bulus.

¹⁵ nssddm‑tt ilmma ġ‑waman nttat d‑ayt‑tgmmi‑ns. tḍalb zġ‑ginnġ: «iġ‑iyi‑tgam d‑tad yumnn s‑siditnnġ, aškad‑d tgguzm ġ‑tgmmi‑nu.» tamẓ ginnġ.

ġmklli yumn‑ungabal l‑lḥbs

¹⁶ yan‑wass nffuġ niri adġar n‑tẓallit, s‑nmnaggar yat‑tfruh̬t tga tismgt. illa gis yal‑ljnn lli‑dar taḥkimt ad‑as‑imala ma‑ra‑ijru. id‑bab‑ns ar‑fllas‑tamẓn iqaridn ggutnin zġ‑mddn lli‑ranin ad‑issann ma‑rad‑asn‑yili.

¹⁷ imma nttat, tḍfar bulus d‑usmun‑ns ar‑ttġuwwat ar‑fllannġ‑ttini: «mddn‑ad gan ih̬ddamn n‑rbbi amattuy. ar‑awn‑tbrraḥn f‑mamnk a‑ra‑tiẓḍarm a‑tnjmm.»

¹⁸ ar‑bdda‑tskar ġmkan kigan d‑uwssan. ar yan‑wass ṭiyyr‑as i‑bulus bahra, igrawl gis yamr ljnn: «s‑ism n‑yasuɛ lmasiḥ, ffuġ zġ‑gis.» iffuġ ljnn ġakudan.

¹⁹ lliġ ẓran id‑bab n‑tsmgt is‑ur‑sul‑ra‑fllas‑tamẓn yat, ġwin bulus d‑sila zukrn‑tn s‑ssuq s‑dar ġwilli tḥkamnin.

²⁰ dḥin‑tn‑in s‑lgddam n‑imġarn l‑lmḥkama n‑rruman inin: «ġwid gan ayt‑yudaya, ssmrwin tamdint‑nnġ bahra.

²¹ ar‑tbrraḥn f‑kra n‑tnbaḍin, ur‑fllannġ‑iḥlla a‑tnt‑nqbl ula‑da‑srsnt‑nskar nkkʷni n‑ayt‑ruma.»

²² bzgn fllasn ġwilli‑asn‑sutlnin. nkrn imġarn l‑lmḥkama uṣṣan imh̬zniyn ad‑fllasn‑bbin timlsa ssġuršn‑tn.

²³ lliġ‑tn‑utn bahra, grn‑tn‑in ġ‑lḥbs, uṣṣan angabal l‑lḥbs a‑issdus i‑imi.

²⁴ lliġ isfld‑ungabal i‑luṣit‑ad, ig‑tn‑in ġ‑tḥanut n‑wallaġ, iqqn iḍarn‑nsn ġ‑gr‑tfrsa ẓẓaynin.

²⁵ ġ‑ṭuẓẓunt n‑iḍ‑an ar‑itẓalla bulus d‑sila ar‑ttirirn ar‑talġn rbbi. ar‑asn‑sflidn iḥbbasn yaḍni.

²⁶ s‑immussa‑wakal s‑jjhd, ndudin iġurban zġ‑llsas, rẓmn imawn l‑lḥbs kullutn, fsint ssnasl f‑kraygatt yan.

²⁷ ittfaq‑d‑ungabal, iẓr imawn l‑lḥbs rẓmn, iġal is‑rwln iḥbbasn. ildi‑d taẓẓit a‑inġ ih̬f‑ns.

²⁸ iġr‑as bulus s‑jjhd yini‑as: «ad‑ur‑thlkt ih̬f‑nnk. hati nlla kullwaġ.»

²⁹ iġr‑ungabal i‑mad‑as‑d‑itawin tifawt, yazzl s‑darsn iḍr‑n f‑ifaddn‑ns ġ‑lgddam n‑bulus d‑sila, ar‑srs‑tkkat tawda.

³⁰ yawi‑tn ilmma s‑brra l‑lḥbs yini‑asn: «wa‑id‑sidi, ma‑yyi‑d‑iqqann a‑t‑skrġ baš ad‑njmġ?»

³¹ inin‑as: «amn s‑siditnnġ yasuɛ tnjmt kiyi d‑ayt‑tgmmi‑nnk.»

³² sawln srs s‑wawal n‑siditnnġ nttan d‑ayt‑tgmmi‑ns kullutn.

³³ yawi‑tn ġ‑tasaɛt‑an ġ‑iyḍ, isird‑asn tiggas‑nsn. ssddmn‑t ilmma ġ‑waman, ntta d‑ayt‑tgmmi‑ns kullutn.

³⁴ išškšm‑tn s‑tgmmi isrs‑asn‑in mad‑šttan, ifrḥ bahra ntta d‑kullu ayt‑tgmmi‑ns ašku wrrin umnn s‑rbbi.

³⁵ zikk ṣbaḥ nkrn imġarn l‑lmḥkama n‑rruman, aznn kra n‑imh̬zniyn s‑lḥbs inin: «rẓmat i‑irgazn‑an.»

³⁶ yašk‑id‑ungabal s‑dar bulus yini‑as: «ha‑imġarn uznn‑d awal ad‑awn‑rẓmn. ffuġat ġilad, tddum s‑sslamt.»

³⁷ imma bulus isawl s‑imh̬zniyn yini‑asn: «ha‑ntni ssġuršn‑aġ ġ‑lgddam n‑kullu mddn wah̬h̬a ur‑ginnġ‑ufin kra iffuġn lqanun. dḥin‑aġ‑d s‑lḥbs, d‑nkkʷni nga zġ‑willi ṭṭafnin taġamt ġ‑ayt‑ruma. is‑ran ad‑aġ‑ssufġn ġilad s‑tntla? nkkʷni ur‑ra‑nffuġ. ih̬ṣṣa imġarn‑an ad‑d‑aškin ssufġn‑aġ‑n.»

³⁸ ddun imh̬zniyn inin i‑imġarn f‑mad‑nnan. iksaḍn ntni lliġ sfldn f‑bulus d‑sila is‑darsn lḥqq n‑ayt‑ruma.

³⁹ aškin‑d ḍalbn zġ‑gisn ad‑asn‑ṣamḥn, awin‑tn ilmma s‑brra ḍalbn‑tn ad‑ffuġn tamdint.

⁴⁰ ġmkan a‑s‑ffuġn zġ‑lḥbs, ddun ilmma s‑tgmmi n‑lidiyya. mnaggarn gis d‑aytmatn ar‑tn‑zzɛamn, amẓn ilmma aġaras.