irqqasn 15 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tamunt n‑irqqasn d‑imġarn ġ‑urušalim

¹ aškin‑d kra n‑mddn zġ‑tmazirt n‑yudaya s‑anṭakiyya, bdun ar‑sslmadn aytmatn ar‑ttinin: «iġ‑ur‑tẓẓullim i‑ddat‑nnun ġmklli ittini ššrɛ n‑musa, ur‑ra‑tiẓḍarm a‑tnjmm.»

² iẓi didsn bulus d‑barnaba f‑wawal‑ad ar‑didsn‑tmjaḥadn, aylliġ skrn aytmatn n‑umnaggar f‑ad‑aznn bulus d‑barnaba d‑kra ġ‑wiyyaḍ s‑urušalim, baš ad‑sqsan irqqasn d‑imġarn f‑tġawsa‑yad.

³ safḍn‑tn ġakudan, zrin ġ‑tmizar n‑finiqiyya d‑samira, awin lh̬bar i‑ayt‑tmizar‑an f‑mamnk ad‑umẓn ibrraniyn aġaras l‑lmasiḥ. frḥn aytmatn kullutn lliġ sfldn i‑lh̬bar‑ad.

⁴ lliġ ruḥn urušalim ssmrḥban srsn ayt‑umnaggar d‑irqqasn d‑imġarn. yini‑asn bulus d‑barnaba f‑kullu ma‑srsn‑iskr rbbi.

⁵ walaynni nkrn kra n‑imumnn l‑lmdhb n‑ifarisin inin‑asn: «iqqan‑kʷn‑d a‑tuṣṣam ibrraniyn ad‑ẓẓalln i‑ddat‑nsn ar‑skarn s‑ššrɛ n‑musa.»

⁶ mnaggarn ilmma irqqasn d‑imġarn baš ad‑mšawarn f‑tġawsa‑yad.

⁷ yigat‑wawal aylliġ inkr bṭrus yini‑asn: «way‑aytma, tssnm ġ‑uwssan zwarnin isti‑yyi rbbi zġ‑gigun baš ad‑sfldn ibrraniyn f‑imi‑nu i‑lh̬bar ifulkin amnn srs.

⁸ rbbi issnn ma‑illan ġ‑uwl n‑kullu mddn, iml‑aġ ġakudan is‑irḍa f‑ibrraniyn, ašku ula ntni ifka‑yasn rruḥ lqudus ġmklli‑aġ‑t‑ifka nkkʷni.

⁹ ur‑tn‑ibḍi didnnġ, ašku issġus ulawn‑nsn ula ntni lliġ umnn s‑yasuɛ.

¹⁰ imma ġilad, mah̬ aylliġ tram a‑tẓim d‑rbbi, tgm taẓayt f‑imḥḍarn‑an lli‑mi‑ur‑nẓḍar a‑stt‑nasi nkkʷni ula imzwura‑nnġ?

¹¹ uhu, numn izd lḥnant n‑siditnnġ yasuɛ a‑s‑nnjm, d‑ġmkad a‑s‑rad‑njmn ula ntni.»

¹² fssan aytmatn‑an kullutn, sfldn ilmma i‑mad‑asn‑ittini barnaba d‑bulus f‑lmɛjizat d‑tmitar tjhhdnin lli‑iskr rbbi f‑ufus‑nsn ġ‑gr ayt‑tmizar yaḍni.

¹³ lliġ kmmln awal‑nsn, inkr yaɛqub yini‑asn: «way‑aytma sfldat‑iyi.

¹⁴ inna‑yaġ simɛan f‑mamnk ad‑aġ‑imla rbbi ġ‑isizwar is‑ira a‑iẓli zġ‑gr ibrraniyn kra n‑mddn ad‑gn wins.

¹⁵ ġmkad ad‑nnan ula lanbiya ġ‑warratn n‑rbbi inna:

¹⁶ ‹tigira n‑mayan rad‑d‑wrriġ, bnuġ tigmmi ih̬ʷlan n‑dawd, bnuġ iġurban‑ns lli‑ḍrnin. ra‑stt‑id‑ssnkrġ

¹⁷ baš ad‑wrrin kullu ayt‑tmizar yaḍni ar‑siggiln s‑sidi rbbi, ula kullu ibrraniyn lli‑mi‑ġriġ ad‑gn winu.

¹⁸ ġmkad a‑s‑inna sidi rbbi lli‑iskarn kullu mayad, ityawssan dars zġ‑isizwar.›»

¹⁹ izayd yaɛqub yini‑asn: «f‑mayad a‑f‑rad‑iniġ nkki: ra‑yaf a‑ur‑ntšqu d‑ayt‑tmizar yaḍni lli‑umẓnin aġaras n‑rbbi,

²⁰ walaynni ad‑asn‑nazn yat‑tbrat nini‑asn ad‑tanfn i‑irkan l‑laṣnam ula lfsad, ula‑da‑šttan tifiyi n‑ma‑iqajjin ula idammn.

²¹ ašku myarn mddn ġ‑kraygatt tamdint a‑fllasn‑aqran ššrɛ n‑musa ġ‑tgʷmma n‑tẓallit, ar‑tn‑tuṣṣan a‑srs‑skarn, kraygatt ass n‑usunfu zġ‑tasut n‑tasutin sul s‑ġilad.»

tabrat i‑imumnn ibrraniyn

²² mšaškan‑d ilmma irqqasn d‑imġarn d‑ayt‑umnaggar kullutn, skrn f‑ad‑stin kra n‑mddn‑nsn ad‑munn d‑bulus d‑barnaba s‑anṭakiyya. stin yahuda lli‑mi‑ttinin barsaba, nttan d‑sila. ntni, ar‑tn‑tuqqarn aytmatn kullutn.

²³ aznn didsn yat‑tbrat, tyaran gis iwaliwn‑ad: «zġ‑aytmatun irqqasn ula imġarn, i‑aytmatnnġ n‑tmizar yaḍni ġ‑anṭakiyya d‑suriyya d‑kilikiyya. ad‑awn‑tili sslamt.

²⁴ nsfld f‑kra n‑mddn uškan‑in zġ‑darnnġ inin‑awn kra‑s‑awn‑t‑ssṭiyyrn aylliġ tusim taġuft f‑iwaliwn‑nsn. walaynni urd nkkʷni a‑tn‑in‑yuznn.

²⁵ mayan a‑f‑d‑nmnaggar ġilad, nmšaška‑d kullwaġ a‑nsti kra n‑mddn nazn‑tn‑in s‑darun, a‑n‑munn d‑aytmatnnġ ɛzzanin barnaba d‑bulus

²⁶ lli‑fkanin ih̬fawn‑nsn f‑ism n‑siditnnġ yasuɛ lmasiḥ.

²⁷ ġmkad a‑f‑n‑nuzn yahuda d‑sila ad‑awn‑inin f‑kullu mayd‑awn‑in‑nura.

²⁸ ašku imla‑yaġ‑d rruḥ lqudus ula ih̬f‑nnġ, a‑ur‑fllawn‑ng kra n‑taẓayt abla tiġawsiwin‑ad hiyyanin:

²⁹ a‑ur‑tšttam ma‑ityawġrasn i‑laṣnam ula idammn ula tifiyi n‑ma‑iqajjin, taggugm zġ‑lfsad. afulki a‑rad‑awn‑yili, iġ‑a‑ttanfm i‑tġawsiwin‑ad. a‑kʷn‑iɛawn rbbi.»

³⁰ safḍn‑tn ilmma s‑anṭakiyya. lliġ‑n‑lkmn tamdint‑an, ssmunn‑d ayt‑umnaggar kullutn fkn‑asn tabrat.

³¹ lliġ‑tt‑ġran ntni, frḥn s‑iwaliwn n‑irqqasn lli‑s‑tn‑zzɛamn.

³² isawl ilmma yahuda d‑sila s‑aytmatn‑an, ar‑tn‑zzɛamn ar‑tn‑ssdusn, ašku gan ula ntni zġ‑willi ittinin iwaliwn nna‑yasn‑imala rbbi.

^33-34 tigira n‑ma‑darsn‑gawrn kra n‑uwssan, safḍn‑tn aytmatn s‑sslamt, wrrin s‑dar ġwilli‑tn‑uznnin.

³⁵ imma bulus d‑barnaba qaman ġ‑anṭakiyya, ar‑sslmadn ar‑tbrraḥn s‑wawal n‑siditnnġ ntni d‑wiyyaḍ ggutnin.

amuddu wis sin n‑bulus i‑tbrraḥt

³⁶ yan‑wass isawl bulus s‑barnaba yini‑as: «a‑nwrri s‑dar aytmatn ġ‑tmdinin kullutnt lli‑ġ‑nbrrḥ s‑wawal n‑siditnnġ, a‑nẓr mamnk ad‑gan.»

³⁷ ira barnaba ad‑didsn‑awin yuḥanna lli‑mi‑ttinin marqus.

³⁸ imma bulus inna‑yas: «ur‑išwi a‑didnnġ‑nawi ġwalli‑aġ‑n‑ifln tawala‑lli ġ‑tmazirt n‑bamfiliyya, ur‑didnnġ‑ikmmil tawuri.»

³⁹ ur‑ẓḍarn ad‑d‑mšaškan f‑tġawsa‑yad, bḍun ifl yan yan. barnaba yiwi dids marqus, issudu ġ‑umda s‑igzir n‑qubrus.

⁴⁰ imma bulus isti sila a‑ig asmun‑ns. fkn‑tn ilmma aytmatn ġ‑ufus n‑siditnnġ a‑gisn‑ibark, ffuġn zġ‑ġin.

⁴¹ ar‑tkkan tamazirt n‑suriyya ula kilikiyya ar‑ssdusn imnaggarn n‑aytmatn.