irqqasn 14 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tabrraḥt n‑bulus d‑barnaba ġ‑iquniyya

¹ ikšm bulus d‑barnaba s‑tgmmi n‑tẓallit n‑ayt‑yudaya ġ‑iquniyya ġmklli skarn ġ‑tmdinin yaḍni, sawln i‑mddn aylliġ iwrri iggut ma‑yumnn s‑yasuɛ, gan zġ‑ayt‑yudaya ula ibrraniyn.

² imma ayt‑yudaya lli‑ur‑rinin ad‑amnn, nkrn ar‑sshiyyasn ibrraniyn baš ad‑asin tanuwwašt f‑aytmatn.

³ iqama ġin bulus d‑barnaba kigan d‑uwssan, ar‑sawaln f‑siditnnġ s‑zzɛamt. ifk‑asn siditnnġ taḥkimt ad‑skarn lmɛjizat d‑tmitar tjhhdnin ġ‑lgddam n‑mddn‑an, baš ad‑issann izd lḥqq a‑iga‑wawal l‑lbaraka lli‑s‑a‑tbrraḥn.

⁴ ayt‑tmdint‑an bḍan f‑sin. kra ibidd d‑ayt‑yudaya, kra ibidd d‑irqqasn.

⁵ mšawarn ilmma kra n‑mddn zġ‑ibrraniyn d‑ayt‑yudaya d‑imġarn‑nsn, skrn f‑ad‑ssrfufnn bulus d‑barnaba, irin a‑tn‑kkatn s‑iẓran nġn‑tn.

⁶ imma ntni sfldn f‑ġaylli fllasn nuwwan, rwln s‑tmdinin n‑listra d‑darba ġ‑tmazirt n‑likuniyya ula s‑tsgiw yaḍni n‑tmazirt‑an,

⁷ ar‑ġin‑tbrraḥn s‑lh̬bar ifulkin.

tabrraḥt ġ‑listra ula darba

⁸ illa yan‑urgaz ġ‑listra, kušmn‑as iḍarn zġ‑lliġ ilul, ur‑jju‑ifti.

⁹ iskiws ar‑isflid i‑maylli ittini bulus i‑mddn. issmaqql gis bulus, iẓr‑t yumn aylliġ iẓḍar a‑ijji.

¹⁰ yini‑as s‑wawal itjhhdn: «nkr‑d, tbiddt f‑iḍarn‑nnk,» s‑yukʷi ibidd f‑iḍarn‑ns iftu.

¹¹ lliġ ẓran mddn ma‑iskr bulus, alln awal‑nsn inin s‑wawal n‑ayt‑likuniyya: «hati gguzn‑d ilahat‑nnġ s‑darnnġ, wrrin s‑ssift n‑bnadm.»

¹² ġaln is‑iga barnaba ‹zafs›, ig bulus ‹harmas› ašku nttan a‑isawaln s‑uggʷar.

¹³ tlla‑tgmmi n‑‹zafs› ġ‑brra n‑tmdint. yašk‑id‑unmġur n‑willi tɛbadnin ilah‑an, yawi‑d izgarn s‑imi n‑tmdint, agʷln‑asn taggʷatin n‑ijddign. yiri nttan ula kullu wiyyaḍ a‑n‑srsn tiġrsiw ġ‑lgddam n‑barnaba d‑bulus ar‑tn‑tɛbadn.

¹⁴ lliġ sfldn irqqasn i‑mayan, bbin timlsa‑nsn azzln s‑wammas‑nsn inin‑asn s‑jjhd:

¹⁵ «mayd ra‑tnawlm? hati bnadm ka‑nga zund kunni. nuška‑d nawi‑awn‑d lh̬bar ifulkin baš a‑tflm tiġawsiwin‑ad h̬wanin lli‑tskarm, twrrim tissanm rbbi lli‑iddrn. nttan a‑iskrn ignwan d‑wakal d‑imdwan ula kullu ma‑gisn‑illan.

¹⁶ kullu mayd izrin yudja mddn ġ‑kraygatt tamazirt ad‑zaydn ġ‑uġaras nna‑ran.

¹⁷ walaynni ur‑kʷn‑ifil bla tamatart n‑is‑illa nttan, ašku imla‑yawn‑d mnšk a‑bahra‑ifulki. ar‑awn‑d‑yakka anẓar zġ‑ignwan ula tamgra ġ‑uzmz‑ns. ar‑iššbaɛ adis‑nnun s‑umššu iɛmmr ul‑nnun s‑lfrḥ.»

¹⁸ ġmkad a‑inna barnaba d‑bulus, walaynni bḥra ur‑ḥṣarn mddn‑an kullutn ad‑ur‑ġrsn ġ‑lgddam‑nsn.

¹⁹ aškin‑d ilmma kra n‑ayt‑yudaya zġ‑anṭakiyya n‑bisidiyya d‑iquniyya. sshiyysn mddn‑an ggutnin, aylliġ nkrn ar‑kkatn bulus s‑iẓran. zukrn‑t s‑brra n‑tmdint, ġaln is‑immut.

²⁰ munn‑d ilmma imḥḍarn lullin‑as, s‑inkr bulus iwrri s‑tmdint. ndid azkka iffuġ nttan d‑barnaba ddun s‑tmdint n‑darba.

iwrri bulus d‑barnaba s‑anṭakiyya

²¹ ar‑itbrraḥ bulus d‑barnaba s‑lh̬bar ifulkin ġ‑darba, aylliġ iggut ma‑iwrrin gan imḥḍarn i‑lmasiḥ. wrrin ilmma ntni s‑tmdinin n‑listra d‑iquniyya d‑anṭakiyya n‑bisidiyya,

²² ar‑ssdusn ulawn n‑imḥḍarn ar‑tn‑zzɛamn ad‑zgan ġ‑uġaras l‑lmasiḥ, ar‑asn‑ttinin: «s‑trfufnt iggutn a‑s‑d‑iqqan a‑nkšm s‑tgldit n‑rbbi.»

²³ isti bulus d‑barnaba ġ‑kraygatt amnaggar mad‑asn‑itggan imġarn. ar‑tẓallan ar‑taẓumn ar‑tn‑faln ġ‑ufus n‑siditnnġ lli‑s‑umnn.

²⁴ zrin zġ‑tmazirt n‑bisidiyya s‑tmazirt n‑bamfiliyya.

²⁵ ar‑tbrraḥn s‑wawal n‑rbbi ġ‑tmdint n‑barga, zaydn ilmma s‑lmrsa n‑attaliyya.

²⁶ amẓn anaw ssudun ġ‑umda aylliġ ruḥn anṭakiyya. tamdint‑an a‑zġ‑tn‑safḍn aytmatn ġ‑isizwar lliġ‑tn‑fkan ġ‑ufus n‑rbbi a‑ibark ġ‑twuri‑nsn. ġmkan a‑s‑kmmln tawuri‑an.

²⁷ lliġ kšmn s‑anṭakiyya, ssmunn‑d ayt‑umnaggar. inin‑asn f‑kullu ma‑srsn‑iskr rbbi, ula mamnk a‑irẓm imi i‑ayt‑tmizar yaḍni ad‑amẓn aġaras l‑lmasiḥ.

²⁸ qaman d‑imḥḍarn n‑ġin kra n‑iyrn.