irqqasn 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

amuddu amzwaru i‑tbrraḥt

¹ llan kra n‑mddn ġ‑umnaggar n‑aytmatn ġ‑anṭakiyya, ar‑ttinin iwaliwn nna‑yasn‑imala rbbi ar‑sslmadn. illa barnaba d‑simɛan lli‑mi‑ttinin ‹asggan›, yili lukyus gu‑kurini d‑manayn lli‑imqqurn d‑ugllid hirudus ġ‑yat‑tgmmi, yili šawl.

² yan‑wass aẓumn ar‑tɛbadn siditnnġ, s‑asn‑inna rruḥ lqudus: «fkat‑iyi‑d barnaba d‑šawl ad‑qasan kra n‑twuri, ġriġ‑asn srs.»

³ zaydn ilmma ġ‑uẓum d‑tẓallit, srsn fllasn ifassn‑nsn safḍn‑tn.

asḥḥar d‑lḥakm ġ‑qubrus

⁴ ddun ntni ġmklli‑asn‑imla rruḥ lqudus s‑lmrsa n‑salukiyya, ssudun ġ‑umda s‑igzir n‑qubrus.

⁵ kšmn s‑tmdint n‑salamis ar‑tbrraḥn s‑wawal n‑rbbi ġ‑tgʷmma n‑tẓallit n‑ayt‑yudaya. iwin didsn yuḥanna lli‑mi‑ttinin marqus, ar‑tn‑itɛawan ġ‑twuri.

⁶ ar‑tkkan igzir kullut aylliġ lkmn tamdint n‑bafus, afn‑in gis yan‑usḥḥar gu‑yudaya ism‑ns baryašuɛ, ar‑ittini is‑iga nnabi walaynni ar‑isskirkis.

⁷ nttan ar‑itgawar dar lḥakm n‑igzir ism‑ns sarjyus‑bulus. iga lḥakm‑an bab l‑lɛaql. yazn s‑barnaba d‑šawl iḍalb‑tn ad‑d‑aškin s‑dars, ašku ira a‑zgisn‑isfld i‑wawal n‑rbbi.

⁸ imma asḥḥar‑an, ism‑ns alimas s‑wawal n‑ayt‑yunan, inkr srsn yiri a‑iḥṣar lḥakm a‑ur‑yamẓ aġaras l‑lmasiḥ.

⁹ ġakudan šawl lli‑mi‑nttini bulus iɛmmr s‑rruḥ lqudus, imnad ġ‑usḥḥar

¹⁰ yini‑as: «wa‑yus n‑iblis, tgit amḍaḍḍ i‑kullu ma‑ira rbbi. tɛmmrt s‑tkrkas d‑tillay ʷh̬šnnin. ar‑bdda‑tsslullit iġarasn ʷġẓannin n‑siditnnġ.

¹¹ hati illa‑fllak‑ufus n‑siditnnġ. ra‑tbukḍt ur‑ra‑tisfiwt ar azmz yaḍni.» ġakudan a‑fllas‑iḍr‑umdlu d‑tillas, ar‑itlli s‑mad‑as‑itamẓn afus.

¹² imma lḥakm, lliġ iẓra mayd ijran, itɛjjb bahra. yamn s‑mad‑as‑sslmdn f‑siditnnġ.

tabrraḥt ġ‑anṭakiyya n‑bisidiyya

¹³ iffuġ bulus d‑usmun‑ns zġ‑bafus, ssudun ġ‑umda s‑tmdint n‑barga ġ‑tmazirt n‑bamfiliyya. ibḍu didsn yuḥanna lli‑mi‑ttinin marqus, iwrri s‑urušalim.

¹⁴ zaydn ntni zġ‑barga s‑tmdint n‑anṭakiyya n‑bisidiyya. kšmn s‑tgmmi n‑tẓallit ġ‑wass n‑usunfu, skiwsn gis.

¹⁵ imġarn n‑tgmmi n‑tẓallit, tigira n‑mad‑ġran zġ‑ššrɛ n‑musa d‑warratn l‑lanbiya, ġrn‑asn: «way‑aytmatnnġ, nkrad‑d tsawlm iġ‑darun kra n‑iwaliwn ma‑s‑a‑tssdusm mddn‑nnġ.»

¹⁶ inkr bulus yall afus‑ns yini‑asn: «way‑ayt‑rbbi d‑ibrraniyn lli‑tɛbadnin rbbi, sfldat‑iyi.

¹⁷ rbbi n‑ayt‑darnnġ iẓli imzwura‑nnġ, issigat‑tn bahra ġ‑isggʷasn lli‑ġ‑llan ġ‑tmazirt n‑miṣr. issufġ‑tn‑d ilmma zġ‑ġin s‑ufus‑ns itjhhdn.

¹⁸ ibidd didsn kkuẓ id‑mraw n‑usggʷas ġ‑lh̬la.

¹⁹ ihlk ssa n‑tglday ġ‑tmazirt n‑kanɛan, ifk‑asn tamazirt‑an a‑stt‑wrtn.

²⁰ ġmkan a‑s‑izri ma‑itggan kkuẓ id‑miyya d‑smmus id‑mraw (450) n‑usggʷas. ifk‑asn ilmma imġarn tjhhdnin a‑fllasn‑tḥkamn ar ussan n‑nnabi ṣamwil.

²¹ ḍalbn‑t ġakudan a‑zgisn‑iẓli yan ad‑asn‑ig agllid, iml‑asn rbbi šawl yus n‑qiš zġ‑tqbilt n‑bnyamin. izayd nttan ar‑fllasn‑itḥkam kkuẓ id‑mraw n‑usggʷas.

²² issitti‑t ilmma rbbi, ig dawd d‑ugllid‑nsn. nttan a‑f‑ifka rbbi tugga‑ns inna: ‹ufiġ‑n ġ‑dawd yus n‑yassa ma‑n‑yakmurn s‑uwl‑inu. ra‑iskar kullu mad‑riġ.›

²³ imma ġilad, zġ‑tasut n‑dawd a‑zġ‑d‑ifka rbbi yan yaḍni a‑ig anjjam i‑ayt‑rbbi ġmklli‑s‑inna ġayd izrin, a‑t‑igan d‑yasuɛ.

²⁴ lliġ ur‑ta‑igri yasuɛ ġ‑twuri‑ns, ikka‑ttin yuḥanna amsddam ar‑itbrraḥ ar‑ittini i‑kullu ayt‑rbbi ad‑fln mad‑skarn yʷh̬šn ar‑tn‑issddam ġ‑waman.

²⁵ lliġ‑d‑yakmur‑uzmz a‑ikmml yuḥanna tawuri‑ns, isqsa mddn‑an: ‹ma‑ttinim giġ‑t nkki? hati urd nkkin a‑igan ġwalli‑s‑a‑ttqlm, walaynni ra‑d‑yašk tigira‑nu. ur‑sthllaġ nkki ad‑rẓmġ ifalan n‑turẓiyin‑ns.›

²⁶ «way‑aytma zġ‑tasut n‑ibrahim d‑ibrraniyn lli‑tɛbadnin rbbi, nkkʷni kullwaġ a‑mi‑d‑yuzn rbbi awal f‑mamnk a‑rad‑aġ‑ijjnjm.

²⁷ imma imzdġn n‑urušalim d‑inmġurn‑nsn ur‑ssinn izd yasuɛ a‑igan anjjam lli‑s‑a‑tqln. ur‑fhimn iwaliwn l‑lanbiya lli‑aqran kraygatt ass n‑usunfu, walaynni ssuwfan iwaliwn‑an lliġ fllas ḥkamn.

²⁸ wah̬h̬a ur‑gis‑ufin ma‑f‑a‑t‑nqqan, ḍalbn zġ‑bilaṭus a‑t‑inġ.

²⁹ ġakud lliġ skrn ntni kullu maylli fllas ityaran zġ‑isizwar, zzugzn‑t zġ‑uggjdi, srsn‑t‑in ġ‑umḍḍal.

³⁰ «imma rbbi hati issnkr‑t‑id zġ‑lmut,

³¹ ar‑d‑itban kigan d‑uwssan i‑willi dids munnin zġ‑jalil s‑urušalim. gn ntni inagan, ar‑akkan tugga i‑ayt‑rbbi f‑mad‑ẓran.

³² ula nkkʷni nuška‑d nawi‑awn‑d lh̬bar‑ad ifulkin, ašku maylli inna rbbi i‑imzwura‑nnġ f‑ma‑ra‑iskr,

³³ hati iskr‑t ġilad ġ‑darnnġ nkkʷni lli‑igan tarwa‑nsn. ašku issnkr‑d yasuɛ zġ‑lmut ġmklli ityaran ġ‑wis sin imurign, inna rbbi: ‹kiyi tgit iwi. babak ad‑giġ ġassad.›

³⁴ ityara ula f‑mamnk a‑ra‑t‑id‑issnkr zġ‑lmut a‑ur‑sar‑trkm ddat‑ns, yini: ‹hati ra‑kʷn‑barkġ s‑lbarakat ṣfanin zganin lli‑f‑nniġ i‑dawd.›

³⁵ yini‑daġ ġ‑warra yaḍni: ‹ur‑ra‑tadjt amẓlay‑nnk a‑irkm ġ‑umḍḍal.›

³⁶ nssn dawd ġ‑uwssan‑ns is‑iskr ma‑ira rbbi, immt ilmma ityawmḍal ġ‑gr imzwura‑ns, trkm ddat‑ns.

³⁷ imma ġwad‑d‑issnkr rbbi, ur‑t‑yudji a‑irkm.

^38-39 «way‑aytma, nra a‑tissanm lh̬bar‑ad ifulkin. ašku f‑ssibt n‑ġwad‑d‑inkrn a‑s‑yujad rbbi a‑fllawn‑issitti ddnub‑nnun. kullu wanna srs yumnn, ra‑t‑issġus zġ‑kullu ġaylli mi ur‑iẓḍar ššrɛ n‑musa a‑t‑zgis‑issġus.

⁴⁰ imma ġilad, rarat lɛaql‑nnun ad‑awn‑ur‑ijru ġmklli nnan lanbiya:

⁴¹ ‹ẓrat a‑iṭnnaẓn, ar‑ttɛjjabm tthlkm. ašku rad‑skrġ kra ihiyyan ġ‑uwssan‑nnun. iġ‑illa mad‑awn‑fllas‑innan, ur‑ra‑ti‑tamnm.›»

⁴² iffuġ ilmma bulus d‑barnaba zġ‑tgmmi n‑tẓallit. ḍalbn‑tn mddn a‑n‑wrrin imal ass‑an n‑usunfu ad‑asn‑sawln s‑uggʷar f‑tġawsiwin‑ad.

⁴³ lliġ kullu ffuġn, iggut gisn ma‑imunn d‑bulus d‑barnaba zġ‑ayt‑yudaya d‑ibrraniyn lli‑umẓnin aġaras n‑ayt‑rbbi. isawl srsn bulus d‑barnaba, zzɛamn‑tn ad‑zgan ġ‑lbaraka n‑rbbi.

⁴⁴ imal ass‑an n‑usunfu munn‑d ayt‑tmdint kullutn, irin ad‑sfldn i‑wawal n‑rbbi.

⁴⁵ imma ayt‑yudaya lli‑zdġnin ġin, lliġ ẓran mddn‑an ggutnin, asin tanuwwašt f‑irqqasn, ẓin d‑bulus f‑wawal‑ns rgmn‑t.

⁴⁶ irar‑asn ilmma bulus d‑barnaba s‑zzɛamt inin‑asn: «niwi‑awn‑d awal n‑rbbi ġmklli‑aġ‑d‑iqqann baš a‑tzwurm kunni. imma ġilad ur‑ti‑trim, tgm ih̬fawn‑nnun d‑willi ur‑isthllan ad‑kšmn s‑tudrt idumn. ra‑kʷn‑nfl ġilad nawi‑tt ġ‑ibrraniyn,

⁴⁷ ašku ġmkad a‑s‑aġ‑yuṣṣa sidi rbbi. inna: ‹giġ‑k d‑tifawt i‑ayt‑tmizar aggugnin, a‑tjjnjmt mddn ar ttmi n‑wakal.›»

⁴⁸ lliġ sfldn ibrraniyn i‑mayad, frḥn bahra alġn awal n‑sidi rbbi. wrrin amnn s‑yasuɛ kullu willi iẓli rbbi ad‑kšmn s‑tudrt idumn.

⁴⁹ sfldn mddn i‑lh̬bar n‑siditnnġ ġ‑kullu tamazirt‑an.

⁵⁰ imma ayt‑yudaya sshiyysn timġarin tibrraniyin ist‑tgʷmma mqqurnin lli‑tɛbadnin rbbi d‑uwdmawn mqqurnin n‑tmdint‑an, aylliġ nkrn mddn ggutnin ar‑ssrfufunn bulus d‑barnaba ssmsrn‑tn zġ‑tmazirt‑an.

⁵¹ issus fllasn bulus d‑barnaba agdrur n‑iḍarn‑nsn ad‑asn‑ig tamatart, ftun s‑tmdint n‑iquniyya.

⁵² imma imḥḍarn lli‑fln ġ‑anṭakiyya, ɛmmrn ntni s‑lfrḥ ula s‑rruḥ lqudus.