irqqasn 12 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tarfufnt f‑ufus n‑hirudus

¹ ġ‑uwssan‑an a‑yumẓ‑ugllid hirudus kra zġ‑aytmatn n‑umnaggar, yiri a‑tn‑issrfufn.

² yamẓ yaɛqub gʷmas n‑yuḥanna inġ‑t s‑taẓẓit.

³ lliġ iẓra mamnk ad‑frḥn ayt‑yudaya s‑ġayan, izayd yamẓ bṭrus ula nttan ġ‑uwssan l‑lɛid n‑urh̬ṣiṣ.

⁴ ig‑t‑in ġ‑lḥbs, ar‑ti‑tgabaln kkuẓṭ rrbayɛ n‑iɛskrin, ilin kkuẓ ġ‑kraygatt rrbɛt. yiri hirudus a‑fllas‑yut lḥukm ġ‑lgddam n‑kullu mddn tigira l‑lɛid n‑usurf.

⁵ iqama bṭrus ġ‑lḥbs, imma ayt‑umnaggar ar‑tẓallan ar‑bahra‑fllas‑tḍalabn rbbi.

ġmklli iffuġ bṭrus zġ‑lḥbs

⁶ iḍ lli‑izwarn ass lli‑ġ‑ra‑t‑in‑issḥaḍr hirudus ġ‑lgddam n‑mddn, iṭṭas bṭrus ġ‑gr sin iɛskrin, iqqn s‑snat ssnasl. ilin ingabaln yaḍni ġwin tiḍaf ġ‑imi l‑lḥbs,

⁷ s‑ibidd yal‑lmalak n‑sidi rbbi ġ‑tḥanut lli‑ġ‑illa bṭrus. tssmrġa s‑tifawt itjhhdn. issmass‑t lmalak zġ‑tġruṭṭ‑ns issfaq‑t‑id yini‑as: «nkr ġil ġil,» s‑ḍrnt ssnasl zġ‑ifassn‑ns.

⁸ yini‑as lmalak: «bkis tqqnt turẓiyin‑nnk.» inkr bṭrus iskr mayan. yini‑as lmalak: «ssmun aslham‑nnk tḍfurt‑iyi.»

⁹ iḍfur‑t bṭrus iffuġ zġ‑tḥanut. ur‑issin kullu mayn iskar lmalak izd ṣṣaḥt a‑iga. iġal izd ġir kra n‑twargit ayan.

¹⁰ zrin f‑ingabaln zwarnin, zrin f‑wis sin, lkmn tiflut n‑uwzzal lli‑iqaman ad‑ffuġn s‑tmdint. trẓm‑tflut i‑ih̬f‑ns, ffuġn. zrin‑in tasukt‑an, s‑fllas‑yitti lmalak ifl‑t ġin.

¹¹ ġakudan a‑ifhm bṭrus mad‑as‑ijran yini: «ssnġ ġilad izd s‑ṣṣaḥt yuzn‑d sidi rbbi lmalak‑ns a‑yyi‑d‑ifukku zġ‑ufus n‑hirudus ula zġ‑kullu mad‑ran mddn‑an n‑ayt‑yudaya a‑t‑flla‑zzrin.»

¹² lliġ ifaq bṭrus i‑mad‑as‑ijran, iftu s‑tgmmi n‑maryam innas n‑yuḥanna lli‑mi‑ttinin marqus. llan ġin mddn ggutnin munn‑d kullu ar‑tẓallan ar‑tḍalabn rbbi.

¹³ issḍuqqr bṭrus ġ‑imi n‑brra. tašk‑id yat‑th̬ddamt ism‑ns ruda, baš a‑tẓr ma‑issḍuqqrn.

¹⁴ ġir tukʷz awal n‑bṭrus tfrḥ bahra aylliġ tettu imi is‑iqqn, twrri s‑tizzla s‑ugʷns tini‑asn: «hati bṭrus ayd ibiddn ġ‑imi.»

¹⁵ rarn‑as‑d: «is‑tffuġt ih̬f‑nnm?» tini‑asn‑daġ: «bṭrus a‑iga.» rarn‑as: «uhu, ḥaqqan lmalak‑ns kayan.»

¹⁶ sul iqama bṭrus ġ‑imi ar‑issḍuqqur. rẓmn‑as afn‑t‑in bṭrus a‑iga, iḍr‑asn lɛjb.

¹⁷ yall afus‑ns a‑tn‑issfssa, yini‑asn ilmma f‑mamnk a‑t‑id‑issufġ siditnnġ zġ‑lḥbs. yuṣṣa‑tn: «iniyat kullu mayad i‑yaɛqub d‑aytmatn.» ifl‑tn ġakudan, iddu s‑mani yaḍni.

¹⁸ lliġ ifaw lḥal, duhdun ingabaln l‑lḥbs bahra, ar‑ssmqsan i‑ngratsn: «ma‑iga ġayad? mani ikka bṭrus?»

¹⁹ yazn hirudus ma‑srs‑isiggiln, walaynni ur‑t‑ufin. isqsa ingabaln bahra, issufġ‑tn ilmma a‑tn‑nġn. iffuġ hirudus tamazirt n‑yudaya iddu s‑qayṣriyya igawr ġin.

lmut n‑hirudus

²⁰ ġ‑uwssan‑an iẓi hirudus d‑imzdġn n‑ṣur d‑ṣayda. aškin‑d ayt‑tmdinin‑an s‑yan‑wawal, irin ad‑dids‑sawln, ašku iqqan‑tn‑d ad‑awin mad‑šttan zġ‑tmazirt n‑ugllid. mšaškan‑d zwar d‑lwazir ism‑ns blastus, baš ad‑ḍalbn zġ‑hirudus sslamt.

²¹ lliġ ilkm‑wass lli‑ġ‑ra‑tn‑iẓr, ilsa hirudus aslham n‑tgldit‑ns, iskiws ġ‑lkursi l‑lḥukm isawl i‑mddn‑an.

²² alln ntni awal‑nsn inin: «awal n‑yan‑ilah ayad, urd awal n‑bnadm.»

²³ ġakudan a‑t‑id‑yut yal‑lmalak n‑sidi rbbi s‑twukka ar‑t‑tštta ġ‑ugʷns‑ns aylliġ immut, ašku yumẓ lmjd lli‑igan win rbbi.

²⁴ ar‑bahra‑itzayad‑wawal n‑rbbi ġ‑uwssan‑an, iggut ma‑srs‑isflidn.

²⁵ imma barnaba d‑šawl, lliġ sslkmn lamant‑nsn s‑urušalim, wrrin s‑anṭakiyya. awin didsn yuḥanna lli‑mi‑ttinin marqus.