irqqasn 10 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tawargit n‑bṭrus

¹ illa yan‑urgaz ġ‑tmdint n‑qayṣriyya ism‑ns kurnilyus, iga lqbṭan zġ‑rrbɛt n‑iɛskrin n‑rruman lli‑mi‑ttinin ‹rrbɛt n‑iṭalya›.

² ar‑itɛbad rbbi yiri bdda a‑t‑irḍu, nttan ula kullu ayt‑tgmmi‑ns. ar‑yakka ma‑iggutn i‑imẓlaḍ n‑ayt‑yudaya, ar‑bdda‑itẓalla ar‑itḍalab rbbi.

³ yan‑wass ġ‑tasaɛt tis kraṭṭ n‑tdggʷat iban‑as‑d yal‑lmalak n‑rbbi, yuška‑d dars yini‑as: «wa‑kurnilyus.»

⁴ issmaqql gis kurnilyus yiksaḍ bahra yini: «mad‑dari‑trit a‑sidi?» izayd lmalak yini‑as: «hati iqbl rbbi tiẓulla‑nnk ula maylli takkat i‑imẓlaḍ, irḍu fllak.

⁵ nkr ġilad taznt kra n‑irgazn s‑tmdint n‑yaffa ad‑d‑awin yan‑urgaz lli‑mi ism‑ns simɛan bṭrus.

⁶ hatin igguz ġ‑tgmmi n‑yan‑udbbaġ ism‑ns simɛan ġ‑tama n‑umda.»

⁷ lliġ‑t‑ifl lmalak iġr kurnilyus i‑sin imqasan n‑tgmmi‑ns ula yan‑uɛskri‑ns lli‑itɛbadn rbbi.

⁸ yini‑asn f‑kullu ma‑ijran yazn‑tn ilmma s‑yaffa.

⁹ ndid azkka sul llan ġ‑uġaras akmurn‑in s‑yaffa, iġli bṭrus s‑ukfaf n‑tgmmi a‑iẓẓall. tga tasaɛt tis snat d‑mrawt ġ‑ṭuẓẓunt n‑wass

¹⁰ s‑t‑yaġ laẓ yiri ma‑ištta. sul h̬dmn ġ‑tirmt s‑a‑s‑d‑issbayyn rbbi kra zund tawargit.

¹¹ iẓr ignwan rẓmn, igguz‑d fllas kra irwas i‑lizar imqqurn ityamaẓ zġ‑kkuẓṭ‑tġmrin, ittrs‑d s‑wakal.

¹² ilin gis kigan d‑luḥuš d‑ibnkaln d‑igḍaḍ n‑tagant.

¹³ isawl‑d yan‑wawal yini: «nkr a‑bṭrus, tġrst tššt.»

¹⁴ irar‑as bṭrus: «ḥaša a‑sidi. ur‑jju‑ššiġ ma‑f‑inna ššrɛ n‑musa iḥrm nġd irka.»

¹⁵ isawl‑d‑daġ‑wawal‑an yini‑as: «a‑ur‑tgt ma‑issḥlla rbbi d‑ma‑iḥrmn.»

¹⁶ ijru ġmkan kraṭṭ‑twal, ityalal ilmma lizar s‑ignwan.

¹⁷ sul a‑iswingim bṭrus ġ‑ma‑tga lmɛna n‑twargit‑an s‑d‑ruḥn irgazn lli‑d‑yuzn kurnilyus. ar‑sqsan ġ‑tgmmi n‑simɛan aylliġ‑n‑biddn ġ‑imi‑ns.

¹⁸ ġrn i‑ayt‑tgmmi sqsan‑tn: «is‑darun yan‑urgaz ism‑ns simɛan bṭrus?»

¹⁹ nttan sul a‑iswingim ġ‑lmɛna n‑twargit s‑as‑inna rruḥ lqudus: «ha‑kraḍ irgazn ar‑srk‑siggiln.

²⁰ nkr ġilad tgguzt, tmunt didsn bla tškkat, ašku nkki a‑tn‑d‑yuznn.»

²¹ igguz bṭrus ġakudan yini‑asn: «hati nkki a‑s‑a‑tsiggilm. mad‑dari‑tram?»

²² inin‑as: «yuzn‑aġ‑d lqbṭan kurnilyus. iga argaz ifulkin, ar‑itɛbad rbbi ar‑ti‑tuqqarn kullu ayt‑yudaya. iban‑as‑d yal‑lmalak n‑rbbi, yini‑as ad‑ak‑d‑iġr s‑tgmmi‑ns baš a‑isfld i‑ma‑rad‑as‑tinit.»

²³ išškšm‑tn bṭrus ġakudan s‑tgmmi, ig‑tn d‑inbgiwn‑ns. ndid azkka imun didsn, nttan ula kra n‑aytmatn yaḍni zġ‑tmdint n‑yaffa.

²⁴ ndid azkka iruḥ tamdint n‑qayṣriyya. ar‑srs‑itql kurnilyus, nttan d‑ayt‑dars d‑imddukkʷal‑ns, ašku issmun‑tn‑d kullutn ġ‑tgmmi‑ns.

²⁵ ilkm bṭrus tigmmi s‑t‑id‑imnaggar kurnilyus iknu s‑wakal ġ‑dar iḍarn‑ns.

²⁶ issnkr‑t‑id bṭrus yini‑as: «nkr, nkki bnadm kad‑giġ.»

²⁷ izayd ar‑dids‑isawal, ikšm ilmma s‑tgmmi yaf‑n mddn ggutnin a‑ġin‑imunn.

²⁸ yini‑asn bṭrus: «tssnm ššrɛ n‑musa is‑ur‑yudji yan igan zġ‑ayt‑yudaya a‑ikšm s‑dar ibrraniyn ula imun didsn. walaynni imla‑yyi rbbi a‑ur‑gġ yan d‑ma‑iḥrmn ula ma‑irkan.

²⁹ f‑mayan a‑f‑d‑uškiġ lliġ‑n‑sri‑tuznm, ur‑sul‑mšawarġ d‑ih̬f‑inu. imma ġilad riġ ad‑iyi‑tmlm ma‑f‑iyi‑di‑tġram.»

³⁰ isawl kurnilyus yini‑as: «kraḍ‑uwssan ayad, zund tasaɛt‑ad igan tis kraṭṭ n‑tdggʷat, ar‑tẓallaġ ar‑tḍalabġ rbbi ġ‑tgmmi‑nu, s‑ẓriġ yan‑urgaz ibidd ġ‑lgddam‑inu s‑tmlsa ssmrġanin.

³¹ yini‑yyi: ‹wa‑kurnilyus, isfld rbbi i‑tẓulla‑nnk, ur‑ittu maylli takkat i‑imẓlaḍ.

³² azn ġilad s‑yaffa tsqsat ġ‑yan‑urgaz lli‑mi ism‑ns simɛan, ar‑as‑ttinin bṭrus. igguz ġ‑tgmmi n‑yan‑udbbaġ ism‑ns simɛan ġ‑tama n‑umda.›

³³ aznġ‑n srk ġakudan. hati tskrt gigi ma‑ifulkin lliġ‑d‑tuškit. imma ġilad ha‑nkkʷni kullwaġ ġ‑lgddam n‑rbbi, nra a‑nsfld i‑kullu ma‑f‑k‑yuṣṣa siditnnġ ad‑aġ‑ti‑tmlt.»

awal n‑bṭrus ġ‑tgmmi n‑kurnilyus

³⁴ isawl bṭrus yini: «ssnġ ġilad izd s‑ṣṣaḥt ur‑a‑iskar rbbi s‑uwdmawn.

³⁵ ašku ar‑itqbal kullu wanna‑t‑ituqqarn ar‑iskar ma‑t‑irḍan, kra tga‑tmazirt‑ns.

³⁶ ġmkad a‑iga‑wawal lli‑d‑yuzn rbbi i‑mddn‑ns n‑ayt‑yaɛqub, iml‑asn‑d lh̬bar ifulkin n‑sslamt ġ‑gras didsn f‑uwdm n‑yasuɛ lmasiḥ lli‑igan sidis n‑kullu ma‑illan.

³⁷ tsfldm f‑ma‑ijran ġ‑kullu tamazirt n‑yudaya, ibdu zġ‑jalil tigira n‑ma‑itbrraḥ yuḥanna ar‑issddam mddn ġ‑waman.

³⁸ tissanm f‑yasuɛ gu‑naṣira is‑t‑iɛmmr rbbi s‑rruḥ lqudus d‑tḥkimt itjhhdn, ar‑itkka kraygatt mani ar‑iskar afulki ar‑ijjujji kullu willi tyawkrrafnin s‑iskraf n‑iblis, ašku illa dids rbbi.

³⁹ nkkʷni nga fllas inagan, nẓra kullu ma‑iskar ġ‑tmazirt n‑yudaya ula ġ‑urušalim. nġn‑t ilmma f‑uggjdi,

⁴⁰ walaynni ġ‑wis kraḍ‑uwssan issnkr‑t‑id rbbi zġ‑lmut issbayyn‑t‑id.

⁴¹ ur‑d‑iban i‑kullu mddn walaynni ġir i‑willi isti rbbi ad‑gn inagan, a‑tn‑igan d‑nkkʷni lli‑dids‑iššan nsu dids tigira n‑ma‑d‑inkr zġ‑lmut.

⁴² yuṣṣa‑yaġ a‑ntbrraḥ ar‑nakka tugga‑nnġ n‑izd nttan a‑iẓli rbbi a‑yut lḥukm f‑willi ddrnin ula ġwilli mmutnin.

⁴³ nttan a‑f‑sawln lanbiya kullutn ar‑akkan tugga‑nsn ar‑ttinin: s‑ism‑ns a‑s‑ra‑issitti rbbi ddnub f‑kullu wanna srs yumnn.»

uguz n‑rruḥ lqudus f‑ibrraniyn

⁴⁴ sul a‑isawal bṭrus s‑d‑igguz rruḥ lqudus f‑kullu willi‑as‑sflidnin.

⁴⁵ ar‑tɛjjabn imumnn n‑ayt‑yudaya lli‑d‑munnin d‑bṭrus lliġ ẓran mamnk a‑ifka rbbi lbaraka n‑rruḥ lqudus i‑ibrraniyn ula ntni.

⁴⁶ ašku sfldn‑asn ar‑sawaln s‑iwaliwn iġribn ar‑talġn rbbi. yini ilmma bṭrus:

⁴⁷ «is‑illa ma‑rad‑aġ‑ikkis a‑nssddm mddn‑ad ġ‑waman? ašku ula ntni, ifka‑yasn rbbi rruḥ lqudus ġmklli‑aġ‑t‑ifka nkkʷni.»

⁴⁸ yuṣṣa‑tn ad‑ddmn ġ‑waman s‑ism n‑yasuɛ lmasiḥ. ḍalbn‑t ilmma a‑didsn‑igawr kra n‑uwssan.