irqqasn 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ wa‑tawfilus, uriġ‑ak‑n ġ‑warra‑nu amzwaru f‑kullu ma‑iskr yasuɛ ula ma‑isslmad zġ‑isizwar

² ar ass lli‑ġ‑ityalal s‑ignna. walaynni lliġ ur‑ta‑ityalal isawl s‑willi isti ad‑gn irqqasn‑ns, yuṣṣa‑tn s‑tḥkimt n‑rruḥ lqudus f‑ma‑rad‑skarn.

³ yuška‑d darsn tiġurdin l‑lmut‑ns, ar‑asn‑imala s‑tmitar ggutnin is‑d‑inkr iddr. ar‑asn‑issbayyan ih̬f‑ns kkuẓ id‑mraw n‑wass, ar‑asn‑isawal f‑tgldit n‑rbbi.

iwaliwn l‑lmasiḥ i‑irqqasn‑ns

⁴ lliġ didsn igawr yasuɛ ġ‑uwssan‑an yini‑asn: «ad‑ur‑tffuġm tamdint n‑urušalim, walaynni qlat s‑lbaraka lli‑f‑inna baba rbbi rad‑awn‑tt‑ifk, sawlġ‑awn fllas.

⁵ ikka‑ttin yuḥanna ar‑issddam mddn ġ‑waman, imma kunni tigira n‑kra n‑uwssan drusnin, ra‑tddmm s‑rruḥ lqudus.»

⁶ ġakudan lliġ dids munn sqsan‑t: «wa‑siditnnġ, is‑ra‑di‑trart tagldit i‑ayt‑rbbi ġ‑uwssan‑ad?»

⁷ yini‑asn: «baba rbbi a‑dar awal a‑iskar ussan d‑izmaz. ur‑ra‑tissanm kunni managu a‑rad‑ilin,

⁸ walaynni ra‑tɛmmrm s‑tḥkimt itjhhdn ġakud nna‑d‑fllawn‑igguz rruḥ lqudus. ra‑flla‑takkam tugga ġ‑urušalim ula kullu tamazirt n‑yudaya ula samira ar timizar aggugnin n‑ddunit.»

ityalal lmasiḥ s‑ignwan

⁹ ġir inna‑yasn mayad s‑a‑ti‑tmnadn ityalal ġ‑lgddam‑nsn aylliġ‑ti‑tssntl yat‑tmdlut.

¹⁰ sul a‑n‑ssmuqquln ġ‑ignwan s‑illis ifta, s‑d‑fllasn‑biddn sin irgazn s‑tmlsa mllulnin

¹¹ inin‑asn: «wa‑irgazn ayt‑jalil, mah̬ aylliġ tbiddm ġid ar‑n‑tssmuqqulm ġ‑ignwan? hati yasuɛ lli‑fllawn‑ityalaln s‑ignna, ra‑d‑iwrri ġmkad ti‑tẓram ifta s‑ignna.»

astay n‑urqqas yaḍni

¹² gguzn ilmma irqqasn zġ‑uwrir lli‑mi‑ttinin awrir n‑zzitun, wrrin s‑urušalim. ur‑taggug ġir s‑yan kilimitr.

¹³ lliġ lkmn tamdint ġlin s‑uḥanu n‑uflla lli‑ġ‑a‑tgawarn. illa bṭrus d‑yuḥanna d‑yaɛqub d‑andraws d‑filibbus d‑tuma d‑bartulamaws d‑matta d‑yaɛqub yus n‑ḥalfa d‑simɛan awaṭani d‑yahuda yus n‑yaɛqub.

¹⁴ ar‑kullu‑tmunun s‑yan‑uwl ad‑tẓallan ar‑tḍalabn rbbi, ntni d‑tmġarin‑nsn d‑aytmas n‑yasuɛ d‑innas maryam.

¹⁵ yan‑wass ġ‑uwssan‑an inkr bṭrus ġ‑wammas n‑aytmatn. illa ġin ma‑itggan miyya d‑sin id‑mraw (120) n‑yan.

¹⁶ yini‑asn: «way‑aytma, iqqan‑d a‑yafu maylli inna rruḥ lqudus ġ‑warratn n‑rbbi f‑imi n‑ugllid dawd, isawl f‑yahuda lli‑izwarn i‑willi umẓnin yasuɛ.

¹⁷ ašku yahuda ikka‑ttin iga zġ‑ginnġ, yasi taġamt‑ns ġ‑twuri‑nnġ.»

¹⁸ isġa yahuda yan‑igr s‑tġrad lli‑yumẓ f‑lbaḍl, iḍr‑n ġ‑igr‑ns immt, ifrsi‑waḥlig‑ns ffin‑d‑wadan‑ns ġ‑wakal.

¹⁹ sfldn fllas kullu ayt‑urušalim, ar‑ttinin i‑igr‑an s‑wawal‑nsn ‹ḥakal‑dama›. tga lmɛna‑ns ‹igr n‑idammn›.

²⁰ izayd bṭrus yini‑asn: «ityara ġ‑warra n‑imurign ‹a‑th̬lu‑tgmmi‑ns. a‑ur‑gis‑izdġ yan.› ityara‑daġ ‹a‑yamẓ yan yaḍni taġamt‑ns ġ‑twuri.›

^21-22 f‑mayan a‑f‑d‑iqqan a‑nsti yan yaḍni a‑didnnġ‑yakka tugga f‑tnkra n‑siditnnġ yasuɛ zġ‑lmut. iqqan‑d a‑ig yan zġ‑willi didnnġ llanin kullu ussan lli‑ġ‑a‑ntmunu d‑siditnnġ yasuɛ, zġ‑ġakud lliġ iddm ġ‑waman f‑ufus n‑yuḥanna ar ass lli‑ġ‑fllannġ‑ityalal.»

²³ awin‑d sin irgazn. yan iga yusf lli‑mi‑ttinin barsaba (tga lknit‑ns yusṭus), d‑wayyaḍ iga mattyas.

²⁴ ẓẓalln ilmma inin: «wa‑siditnnġ, tssnt ulawn n‑kullu mddn. ml‑aġ ġilad manwa ġ‑sin‑ad a‑igan ġwalli tstit

²⁵ a‑yamẓ taġamt ġ‑twuri‑ad ula tarqqast‑ad lli‑zġ‑iḍr yahuda a‑iddu s‑illi‑as‑igan.»

²⁶ grn‑d fllasn asġar, yašk‑id‑usġar ġ‑mattyas. awin‑t ilmma a‑ig arqqas ġ‑gr yan d‑mraw.