iɛbrin 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ah̬iyyam n‑rbbi ġ‑ddunit‑ad

¹ lɛhd amzwaru, llant gis luṣiyat f‑mamnk a‑s‑ra‑tɛbadn mddn, ula mamnk a‑s‑rad‑skrn yan‑udġar ityawẓlayn i‑rbbi ġ‑ddunit‑ad.

² ssġlin ġmkan yan‑uh̬iyyam, tili gis yat‑tḥanut, ar‑as‑ttinin ‹taḥanut tamẓlayt›, lli‑ġ‑tlla lḥska ula ṭṭbla lli‑f‑a‑srasn aġrum ġ‑lgddam n‑rbbi.

³ ġ‑ugʷns n‑tḥanut‑an, ġ‑tġurdin n‑tis snat lh̬wami, aġ‑n‑tlla yat‑tḥanut yaḍni, ar‑as‑ttinin ‹taḥanut ityawqdasn›.

⁴ tlla gis ṭṭbla n‑uwrġ lli‑f‑a‑tbh̬h̬arn, ula ṣṣnduq l‑lɛhd lli‑idln s‑uwrġ zġ‑kraygatt tasga. ġ‑ṣṣnduq‑an a‑ġ‑tlla yat taṭṭast n‑uwrġ tusi aġrum n‑‹manna›, ula aɛmud n‑harun lli‑imġin, ula tilwaḥ n‑uẓru lli‑f‑tyarant luṣiyat l‑lɛhd.

⁵ llan sin ‹karubim› f‑uflla n‑ṣṣnduq, ar‑ssbayyann lmjd n‑rbbi. dln ntni s‑ifrawn‑nsn illi‑zġ‑a‑tittin ddnub n‑mddn. imma tiġawsiwin‑an, ur‑rad‑bahra‑nsawl ġilad f‑mamnk ad‑gant.

⁶ walaynni lliġ kullu ngaddant‑tġawsiwin‑an, ar‑kššmn inmġurn s‑tḥanut tamzwarut ad‑skarn tawuri‑nsn.

⁷ imma taḥanut tis snat, ur‑a‑srs‑ikššm yan. ġir anmġur ihiyyan a‑srs‑ikššmn yat‑twal ġ‑kraygatt asggʷas, ar‑dids‑itawi idammn, ar‑tn‑in‑issakmur i‑rbbi f‑ssibt n‑ddnub‑ns ula ddnub lli‑skrn mddn‑ns bla ssnn is‑tn‑skrn.

⁸ ġmkad a‑s‑aġ‑imla rruḥ lqudus is‑ur‑ta‑yujad‑uġaras lli‑itawin s‑tḥanut ityawqdasn, maḥdd sul tqama‑tḥanut tamzwarut n‑uh̬iyyam.

⁹ lmɛna‑yad tmla‑yaġ mamnk ad‑gan ayt‑yudaya sul s‑ġassad. ar‑n‑ssakmurn tiwafkiw d‑tġrsiw lli‑ur‑ẓḍarnin ad‑ssġusnt ulawn n‑willi‑srsnti‑tɛbadnin.

¹⁰ ašku ur‑gint ġir tin‑umššu d‑tissi d‑isiridn. tiġawsiwin‑an, ġir tin ddat ad‑gant. ur‑rad‑qamant ġir ar akud nna‑ibddl rbbi kullu mayan s‑kra igan ljdid.

idammn l‑lmasiḥ

¹¹ imma lmasiḥ yuška‑d a‑ig anmġur ihiyyan l‑lbarakat lli‑aġ‑illan ġilad. ah̬iyyam lli‑ġ‑iskr tawuri‑ns yuf ġwalli‑sttin‑ikkan, yagʷr‑t bahra. urd ġ‑ddunit‑ad a‑ġ‑illa, ula ityawskar s‑ifassn n‑bnadm.

¹² ġir yat‑twal a‑srs‑ikšm ntta, urd s‑idammn n‑waġaḍn ula win imugayn walaynni s‑idammn n‑ddat‑ns. ġmkad a‑s‑aġ‑ifra zġ‑ddnub‑nnġ s‑ujnjm idumn.

¹³ nssn wanna iskrn kra iḥrmn, ar‑ti‑truššn inmġurn n‑ayt‑yudaya s‑idammn n‑waġaḍn nġd win imugayn nġd s‑iġd n‑tgizt ityawjdarn, baš a‑tġus ddat‑nsn zġ‑lḥram.

¹⁴ walaynni uggʷar n‑ġmkan a‑rad‑aġ‑issġus lmasiḥ s‑idammn‑ns. ašku isrs‑n ih̬f‑ns lli‑kullu‑iṣfan ġ‑lgddam n‑rbbi s‑tḥkimt n‑rruḥ lli‑idumn. issġus ulawn‑nnġ zġ‑iskkirn mmutnin baš a‑nwrri ng ih̬ddamn n‑rbbi lli‑iddrn.

¹⁵ ġmkan a‑iskr lmasiḥ yal‑lɛhd l‑ljdid ġ‑gr rbbi d‑bnadm, išškšm srs ġwilli mi‑d‑iġra rbbi s‑lwrt idumn lli‑f‑asn‑inna rad‑asn‑yili. immut lmasiḥ baš a‑ifru mddn zġ‑ddnub lli‑skrn lliġ sul llan ġ‑lɛhd amzwaru.

lwrt ula arušš s‑idammn

¹⁶ nssn luṣit nna‑illan f‑lwrt is‑ur‑ẓḍarn ad‑srs‑skrn mddn ard issann is‑immut ġwalli yuṣṣan f‑lwrt.

¹⁷ ašku luṣit ur‑tgi yat maḥdd sul iddr bab l‑luṣit. ur‑ra‑srs‑skrn mddn ard immt.

¹⁸ mayan a‑f‑d‑iqqan ula lɛhd n‑rbbi amzwaru a‑izga s‑idammn l‑lmut.

¹⁹ lliġ ikmml musa iwaliwn‑ns lli‑s‑yuṣṣa kullu mddn‑ns f‑luṣiyat n‑ššrɛ, yawi idammn n‑imugayn ula win‑waġaḍn izayd‑asn aman, yasi tiṣṭṭwin n‑uzukkʷni yass‑tnt s‑taḍut iẓggʷaġn, irušš srsn arra n‑ššrɛ ula mddn kullutn

²⁰ yini‑asn: «idammn‑ad a‑izzgan lɛhd lli‑f‑kʷn‑yuṣṣa rbbi a‑srs‑tskarm.»

²¹ izayd ar‑itrušš ah̬iyyam s‑idammn ula kullu irukutn lli‑s‑a‑gis‑tɛbadn mddn.

²² ġmkan a‑iga ššrɛ, iqqan‑d kraygatt kra‑illan a‑itġus s‑urušš n‑idammn. idrus ma‑ur‑itġusn ġmkan. iġ‑ur‑ffin idammn, ur‑ra‑tittin ddnub.

lmasiḥ issitti ddnub f‑bnadm

²³ ġmkan a‑s‑d‑iqqan a‑tġusnt‑tġawsiwin‑an, wah̬h̬a ur‑gint ġir amalu irwasn ma‑illan ġ‑ignna. walaynni iqqan‑d tiġawsiwin n‑ignna ad‑ġusnt s‑kra n‑tġrsi yufn h̬tin.

²⁴ ašku lmasiḥ ur‑ikšim s‑tḥanut tamẓlayt lli‑ityawskarn s‑ifassn n‑bnadm, tg ġir amalu n‑talli illan ġ‑ignna. walaynni s‑ignna a‑s‑ikšm ntta, yili gis ġilad, ibidd f‑ssibt‑nnġ ġ‑lgddam n‑rbbi.

²⁵ nssn is‑a‑ikššm‑unmġur ihiyyan n‑ayt‑yudaya kraygatt asggʷas s‑tḥanut ityawqdasn, ar‑dids‑itawi idammn lli‑ur‑ginin wins. imma lmasiḥ, urd kigan d‑twaliw a‑ikšm s‑ignna a‑n‑isrs ih̬f‑ns.

²⁶ ašku ur‑t‑id‑iqqan a‑immt kigan d‑twaliw zġ‑lliġ ttyawh̬laq ddunit. walaynni yat‑twal a‑d‑yuška ġ‑isiggʷra n‑ddunit, baš a‑immt issitti ddnub f‑bnadm.

²⁷ iqqan‑d kullu mddn ad‑mmtn yat‑twal, lkmn ilmma lḥukm.

²⁸ ġmkan a‑s‑ifka lmasiḥ ula ntta ih̬f‑ns yat‑twal baš a‑yasi ddnub n‑mddn ggutnin. ra‑d‑iwrri tis snat‑twal, urd baš a‑yasi ddnub walaynni baš a‑ijjnjm kullu winna srs tqlnin rjun‑in gis.