iɛbrin 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tawuri n‑unmġur‑nnġ ġ‑ignna

¹ kullu mayad imla‑yaġ is‑darnnġ anmġur ihiyyan lli‑nḥtajja, iskiws f‑ufasi l‑lɛrš n‑rbbi l‑lmjd ġ‑ignna.

² ar‑iskar tawuri n‑tḥanut tamẓlayt ġ‑uh̬iyyam iṣḥan lli‑ibna sidi rbbi, urd ġ‑ġwalli ittbnan s‑ifassn n‑bnadm.

³ anmġur nna‑illan, hati ityawẓlay f‑a‑n‑issakmur tiwafkiw d‑tġrsiw i‑rbbi. mayan a‑f‑d‑iqqan yasuɛ ula ntta a‑n‑issakmur kra.

⁴ mrad is‑ra‑iqama yasuɛ ġ‑ddunit‑ad ur‑ra‑iskar tawuri n‑tgmmi n‑rbbi ġ‑ddunit‑ad, ašku llan gis ġwilli‑n‑ssakmurnin tiwafkiw s‑mklli‑f‑yuṣṣa ššrɛ.

⁵ taḥanut tamẓlayt lli‑ġ‑a‑skarn tawuri‑nsn ur‑tgi abla zund yat‑tmatart ula yan‑umalu n‑ma‑illan ġ‑ignna. mayan a‑f‑yuṣṣa rbbi musa lliġ iskr f‑a‑ibnu ah̬iyyam, yini‑as: «rar lɛaql a‑tskrt kullu zund maylli‑ak‑mliġ f‑iggi n‑udrar.»

⁶ imma tawuri n‑yasuɛ tugʷr tin inmġurn‑an yaḍni, ġmklli yugʷr lɛhd lli‑d‑yiwi yasuɛ lɛhd‑nsn, ašku lbarakat lli‑d‑srs‑ifka rbbi ugʷrnt tin lɛhd‑an aqdim.

lɛhd aqdim ula lɛhd l‑ljdid

⁷ lɛhd aqdim, mrad is‑ikmml kullu ma‑iqṣad rbbi, ikun ur‑ra‑iskr yal‑lɛhd l‑ljdid.

⁸ walaynni sidi rbbi iẓra mddn‑ns ur‑ssuwfin kullu ma‑gisn‑ira. yini ilmma: «rad‑d‑aškin‑uwssan lli‑ġ‑rad‑skrġ yal‑lɛhd l‑ljdid d‑mddn‑inu n‑ayt‑yaɛqub d‑ayt‑yudaya.

⁹ ur‑ra‑ig zund lɛhd lli‑skrġ d‑imzwura‑nsn lliġ‑asn‑umẓġ afus ssufġġ‑tn‑d zġ‑miṣr. ašku ntni ur‑sul‑qaman f‑lɛhd‑an. f‑mayan a‑f‑wrriġ flġ‑tn.

¹⁰ walaynni ġmkad a‑ra‑ig lɛhd lli‑rad‑skrġ d‑mddn‑inu ġ‑uwssan‑an. ra‑n‑gġ tinbaḍin‑inu ġ‑ih̬fawn‑nsn, araġ‑tnt f‑uwlawn‑nsn. rad‑gġ rbbi‑nsn, gn ntni mddn‑inu.

¹¹ ur‑ra‑yini yan i‑gu‑tmazirt‑ns ula i‑gu‑tgmmi‑ns ‹ih̬ṣṣa‑k a‑tissant sidi rbbi,› ašku ra‑yyi‑issann kullutn, zġ‑imẓẓiyn ar imqqurn.

¹² ra‑fllasn‑ssittiġ ddnub‑nsn, ur‑sar‑rad‑d‑swangmġ lh̬ʷšanat lli‑skrn.»

¹³ imma lɛhd‑ad, lliġ‑t‑iga rbbi d‑ljdid, iban‑umzwaru is‑iga aqdim. aynna igan aqdim, hati imda. ġir imikk ra‑t‑laḥ.