iɛbrin 7 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

malkiṣadq imnaggar ibrahim

¹ malkiṣadq ikka‑ttin iga agllid n‑tmdint n‑salim, ig anmġur ibiddn ġ‑gr mddn d‑rbbi amattuy. nttan a‑n‑imnaggarn ibrahim ibark‑t lliġ‑d‑iwrri ibrahim zġ‑imiġ lli‑ġ‑inra igldan yaḍni.

² ifk‑as ibrahim tis mrawt zġ‑kullu ma‑d‑ikkis i‑igldan‑lli. malkiṣadq, tga lmɛna n‑ism‑ns ‹agllid lli‑irḍan rbbi›. ig ntta agllid n‑salim, tga lmɛna‑ns ‹agllid n‑sslamt›.

³ ur‑ityara yat f‑babas nġd innas nġd imzwura‑ns, ula ityara yat f‑tlalit‑ns nġd lmut‑ns, walaynni irwas i‑yus n‑rbbi ašku iga‑bdda anmġur ibiddn ġ‑gr mddn d‑rbbi.

inmġurn n‑ayt‑lawi

⁴ ẓrat mnšk a‑s‑imqqur malkiṣadq, ašku nttan a‑mi‑ifka babatnnġ ibrahim tis mrawt zġ‑kullu ma‑d‑ikkis i‑igldan.

⁵ nssn izd ayt‑lawi a‑ityawẓlayn ġ‑ššrɛ n‑musa f‑ad‑skarn tawuri n‑tgmmi n‑rbbi, ar‑asn‑akkan mddn tis mrawt zġ‑kullu ma‑darsn‑illan, wah̬h̬a gan ntni aytmatsn zġ‑tasut n‑ibrahim.

⁶ imma malkiṣadq, wah̬h̬a ur‑igi zġ‑ayt‑lawi, yumẓ zġ‑ibrahim tis mrawt, ifk ilmma lbaraka‑ns i‑ibrahim lli‑isti rbbi a‑iwrt kullu ma‑f‑as‑inna.

⁷ iban is‑yugʷr malkiṣadq ibrahim, ašku ġwalli imqqurn a‑yakkan lbaraka i‑walli ikkan ddawas.

⁸ imma ayt‑lawi lli‑tamẓnin tis mrawt ġilad, ntni bnadm kad‑gan ar‑tmtatn. walaynni ġwalli mi ifka ibrahim tis mrawt, ityara fllas is‑iddr.

⁹ ayt‑lawi lli‑tamẓnin tis mrawt, nẓḍar a‑fllasn‑nini izd ntni a‑ifkan tis mrawt i‑malkiṣadq f‑ufus n‑babatsn ibrahim.

¹⁰ ašku sul‑n‑illa lawi ġ‑ugʷns n‑ddat n‑ibrahim, ur‑ta‑jju‑d‑ilul, a‑imnaggar d‑malkiṣadq.

¹¹ rbbi iskr inmġurn zġ‑ayt‑lawi baš ad‑zzgan ššrɛ. gan ntni zġ‑tasut n‑unmġur harun. walaynni mrad is‑ẓḍarn ad‑šškšmn mddn s‑kullu‑ma‑iqṣad rbbi, ur‑rad‑ḥtajjan mddn ad‑asn‑d‑yašk yan‑unmġur yaḍni igan zund malkiṣadq.

¹² walaynni lliġ ibddl rbbi inmġurn‑an s‑unmġur‑ad yaḍni, iqqan‑d a‑ityawbddal ššrɛ ula ntta.

¹³ ur‑igi‑unmġur‑ad zġ‑tqbilt n‑lawi, walaynni iga zġ‑yat‑tqbilt yaḍni lli‑zġ‑ur‑jju‑ih̬dim kra n‑yan ġ‑twuri n‑uẓru n‑tġrsi.

¹⁴ imma siditnnġ, nssn is‑iga zġ‑tqbilt n‑yahuda. ur‑jju‑iskir musa kra n‑inmġurn zġ‑tqbilt‑an.

¹⁵ imla‑yaġ mayan is‑iga siditnnġ yan‑unmġur zund malkiṣadq, urd zund ayt‑lawi.

¹⁶ iwrri iga anmġur s‑tḥkimt n‑tudrt idumn, urd s‑lwrt n‑tasutin n‑bnadm.

¹⁷ ġmklli ityaran: «ra‑tgt anmġur idumn zund malkiṣadq.»

¹⁸ ur‑sul‑a‑itgga rbbi ayt‑lawi d‑inmġurn‑ns, ašku ur‑ẓḍarn ad‑biddn ġ‑gras d‑mddn ġmklli ira.

¹⁹ han ššrɛ n‑musa ur‑ikmmil yat, walaynni rbbi ifka‑yaġ ġilad yan‑rrja iṣḥan lli‑yufn mayan, ar‑n‑srs‑ntakmur i‑rbbi.

anmġur lli‑nḥtajja

²⁰ lliġ isawl rbbi f‑rrja‑yad, izzga awal‑ns s‑ism‑ns. inmġurn yaḍni, ur‑izzga rbbi aẓlay‑nsn s‑ism‑ns,

²¹ walaynni s‑ism‑ns a‑s‑izzga aẓlay n‑yasuɛ. ġmklli ityaran: «s‑ism‑ns a‑s‑d‑isawl sidi rbbi, ur‑ra‑iwrri ġ‑wawal‑ns, yini‑as ‹ra‑tgt anmġur idumn.›»

²² ġmkan a‑s‑iwrri yasuɛ iga ḍḍamn n‑yal‑lɛhd lli‑bahra‑yufn lɛhd‑an yaḍni.

²³ wrrin ggutn inmġurn n‑ššrɛ bahra, ašku ar‑tmtatn ar‑d‑faln tawuri‑nsn i‑mad‑asn‑iggʷran.

²⁴ imma yasuɛ iga wad ur‑sar‑itmmin, ig anmġur idumn.

²⁵ mayad a‑f‑iẓḍar a‑ijjnjm kullu winna‑n‑issruḥ i‑rbbi ġilad ula kullu mayd‑d‑iftan, ašku iddr‑bdda a‑itḍalab rbbi fllasn.

²⁶ wan anmġur‑ad a‑nḥtajja, iɛmmr s‑ufulki n‑rbbi, iġus‑uwl‑ns, ur‑gis‑illi kra l‑lɛib, ityawẓlay zġ‑kullu ma‑iskarn ddnub, ityalal s‑iggi n‑ignwan.

²⁷ ur‑igi zund inmġurn n‑ššrɛ, ašku ur‑t‑ih̬ṣṣa a‑n‑issakmur tiġrsiw i‑rbbi ass f‑wass f‑ddnub‑ns ntta ula f‑ddnub n‑mddn yaḍni. ašku yasuɛ, yat‑tġrsi a‑n‑issakmur yat‑twal f‑ddnub‑nnġ kullwaġ lliġ ifka ih̬f‑ns immt.

²⁸ ḍɛfn inmġurn n‑ššrɛ ašku bnadm kad‑gan. imma yus n‑rbbi, ityawẓlay s‑ism‑ns tigira n‑ššrɛ, ikmml srs rbbi kullu ma‑srs‑iqṣad.