iɛbrin 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ imma ġilad, a‑nzri zġ‑tġawsiwin‑an timzwura n‑ulmmud f‑lmasiḥ, nzayd s‑ma‑igan win imqqurn. a‑ur‑daġ‑nttiri a‑nzzugz llsas lli‑yad‑nzzugz ġayd izrin f‑mamnk a‑s‑ra‑d‑nwrri zġ‑iskkirn h̬wanin n‑bnadm namn s‑ma‑iskr rbbi.

² a‑ur‑daġ‑nsawal ġir f‑isiridn nġd asrus n‑ifassn nġd tankra n‑willi mmutnin nġd lḥukm l‑lih̬rt.

³ ra‑nzri zġ‑tġawsiwin‑an, nzayd s‑kra yaḍni iġ‑ira rbbi.

lmɛna n‑ikalln ula ṣṣabt

⁴ imma ġwilli ẓranin tifawt, mḍin lbaraka n‑ignna, kšmn s‑tamunt n‑rruḥ lqudus,

⁵ frḥn s‑wawal n‑rbbi ula lquwwat n‑uzmz lli‑ra‑d‑yašk,

⁶ iġ‑rurn ntni tiġurdin‑nsn s‑rbbi tigira n‑kullu mayan, ur‑sar‑rad‑iẓḍarn a‑d‑daġ‑wrrin s‑uġaras. ašku mlan i‑kullu mddn is‑ḥgrn yus n‑rbbi, agʷln‑t f‑uggjdi tis snat‑twal.

⁷ ašku akal nna‑issan anẓar lli‑d‑fllas‑iṭṭarn, ar‑yakka ṣṣabt išwan i‑willi‑t‑krznin, ra‑gis‑tili lbaraka n‑rbbi.

⁸ imma akal nna‑ur‑issmġayn abla azggʷar d‑tskra, ur‑infɛa s‑yat. takmur‑d srs nnɛlt, d‑ujddar a‑s‑rad‑as‑tggʷru.

⁹ way‑aytma ɛzzanin, wah̬h̬a srun nsawl ġmkad, nssn is‑gigun‑illa ma‑yufn ġayan, ašku tgam wid ijjnjm rbbi.

¹⁰ nttan, s‑lḥqq a‑s‑a‑itḥkam. ur‑ra‑ittu tawuri lli‑tskrm ula ittu mamnk a‑tusim ism‑ns s‑lfrḥ tɛawanm imẓlayn‑ns, ar‑tn‑sul‑ttɛawanm.

¹¹ imma ġilad nra kud yan gigun a‑itzayad ġmkan s‑zzɛamt ar isiggʷra, baš a‑tkšmm kullukn s‑lbaraka lli‑n‑ntrju.

¹² a‑ur‑ttrmaym tflm ma‑kʷn‑d‑iqqann, walaynni skarat zund kullu willi umnnin ṣbrn aylliġ kšmn s‑tmih̬ar lli‑f‑asn‑inna rbbi.

izzga rbbi awal‑ns s‑ism‑ns

¹³ lliġ isawl rbbi s‑ibrahim f‑ma‑rad‑as‑ifk, yini‑as‑t s‑ism‑ns, ašku ur‑illi kra n‑ism yugʷrn ism n‑rbbi.

¹⁴ yini‑as: «ra‑k‑barkġ fkġ‑ak tarwa ggutnin.»

¹⁵ iql ibrahim iṣbr aylliġ‑as‑ityawfka maylli‑s‑as‑inna rbbi.

¹⁶ hati s‑ism n‑ma‑tn‑yugʷrn a‑s‑aqran mddn, baš ad‑zzgan iwaliwn‑nsn, a‑ur‑sul‑gisn‑tškkun wiyyaḍ.

¹⁷ ġmkan a‑iskr rbbi, yiri a‑issml i‑willi ra‑iwrt timih̬ar‑ns is‑ur‑ra‑iwrri ġ‑wawal lli‑s‑asn‑inna. mayan a‑f‑izuyd ism‑ns i‑wawal‑ns.

¹⁸ ašku sin‑ad, ur‑illi ma‑iẓḍarn a‑tn‑igllb ula iẓḍar rbbi a‑fllasn‑isskarks. ġmkan a‑iskr f‑ssibt‑nnġ nkkʷni lli‑gis‑izawgn, baš a‑bahra‑nzɛm namẓ s‑uggʷar ġ‑rrja lli‑aġ‑ifka.

¹⁹ rrja iṣḥan izgan ayad, ssrṣan gis‑uwlawn‑nnġ ard‑aġ‑išškšm zġ‑lh̬amiya s‑tḥanut ityawqdasn,

²⁰ s‑illis ikšm yasuɛ lli‑aġ‑izwarn a‑bdda‑ig anmġur ihiyyan f‑ssibt‑nnġ ġ‑lgddam n‑rbbi ġmklli iga malkiṣadq.