iɛbrin 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

asunfu lli‑ra‑yili i‑mddn n‑rbbi

¹ isawl rbbi s‑wawal izgan, yini is‑ra‑ifk asunfu i‑mddn‑ns. imma ġilad, illa fllannġ a‑nrar lɛaql a‑ur‑ginnġ‑yili ma‑ur‑ra‑yiẓḍar a‑srs‑ikšm.

² ašku lh̬bar n‑usunfu‑ad lli‑mi‑nsfld, sfldn‑as‑yad imzwura‑nnġ walaynni ur‑uminn awal lli‑mi‑sfldn. mayan a‑f‑ur‑zgis‑umẓn kra l‑lfaytt.

³ imma nkkʷni lli‑t‑yumnn, nkšm ġilad s‑usunfu lli‑f‑asn‑inna: «s‑lġaḍab a‑s‑nniġ awal‑ad izgan ‹ntni ur‑sar‑rad‑kšmn s‑usunfu‑nu.›» iqṣad rbbi asunfu‑ad zġ‑lliġ ih̬lq ddunit.

⁴ ityara ġ‑yan‑ugzzum ġ‑warra‑ns: «wis ssa‑uwssan a‑isunfa rbbi zġ‑kullu ma‑iskr.»

⁵ walaynni ityara‑daġ: «ntni ur‑sar‑rad‑kšmn s‑usunfu‑nu.»

⁶ hati ur‑kšimn ġwilli iruḥ lh̬bar ġ‑uwssan‑an ašku ur‑srs‑skirn. walaynni sul llan wiyyaḍ rad‑kšmn.

⁷ mayad a‑f‑iskr rbbi ass yaḍni lli‑mi‑inna ‹ġassad›, ašku tiġurdin n‑isggʷasn ggutnin isawl‑daġ f‑imi n‑dawd yini iwaliwn‑lli: «ġassad iġ‑tsfldm i‑wawal‑ns, ad‑ur‑tssiqarm ih̬f‑nnun.»

⁸ mrad is‑tn‑išškšm yašuɛ s‑usunfu, ur‑ra‑isawl rbbi tigira f‑yan‑wass yaḍni.

⁹ imma ġilad ra‑sul‑ifk rbbi asunfu ikmmln i‑mddn‑ns, ġmklli isunfa ntta ġ‑wis ssa‑uwssan.

¹⁰ ašku wanna ikšmn s‑usunfu n‑rbbi, nttan a‑isunfan zġ‑kullu ma‑iskr ġmklli isunfa rbbi.

¹¹ imma ġilad illa fllannġ a‑bahra‑nttiri a‑nkšm s‑usunfu‑ad, a‑ur‑iḍr yan ginnġ ġmklli ḍrn ntni, ffuġn zġ‑wawal n‑rbbi.

awal n‑rbbi

¹² hay‑awal n‑rbbi iddr itjhhd, imsad uggʷar n‑taẓẓit lli‑imsadn zġ‑snat‑tsgiw, ar‑itbbi ġ‑ugʷns n‑bnadm ard ibḍu nnfst zġ‑rruḥ, ibḍu adif zġ‑ttmi n‑ih̬san, ar‑issbayyan nniyt n‑uwl ula ma‑iqṣad.

¹³ ur‑irgs yat f‑rbbi ġ‑kullu ma‑ih̬lq. hati ibayyn kullu ġ‑iẓri n‑walli mi‑d‑iqqan a‑nrar lḥsab.

lmasiḥ iga anmġur‑nnġ ihiyyan

¹⁴ illa fllannġ a‑nzga ġ‑liman‑ad ġ‑numẓ, ašku illa‑yaġ yan‑unmġur ihiyyan lli‑ikšmn s‑ignna, a‑t‑igan d‑yasuɛ yus n‑rbbi.

¹⁵ illa‑yaġ yan‑unmġur ihiyyan lli‑iẓḍarn a‑iḥnnu f‑ḍḍɛf‑nnġ, ašku ityaram ula ntta zġ‑kraygatt tasga zund nkkʷni, walaynni ur‑jju‑iskir kra n‑ddnb.

¹⁶ f‑mayad a‑f‑rad‑iniġ: a‑nzɛm ġilad a‑n‑nakmur s‑lɛrš n‑rbbi iḥnnan, ad‑aġ‑irḥm iḥnnu fllannġ iɛawn‑aġ ġ‑tasaɛt lli‑ġ‑nḥtajja.