iɛbrin 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ yugʷr musa

¹ way‑aytma imẓlayn lli‑mi‑d‑iġra rbbi ad‑kšmn s‑tamunt‑ad, swingimad‑d yasuɛ lli‑d‑ityazann a‑ig anmġur ihiyyan l‑liman lli‑ġ‑numẓ.

² iskr kullu ma‑gis‑ira rbbi lli‑t‑iẓlin i‑twuri‑ad, ġmklli iskr musa kullu ma‑gis‑ira ġ‑wammas n‑ayt‑tgmmi n‑rbbi.

³ walaynni nssn is‑isthlla yasuɛ luqr uggʷar n‑musa. ašku abnnay, ar‑ti‑tuqqarn mddn uggʷar n‑tgmmi lli‑ibna.

⁴ kraygatt tigmmi ttyawbna f‑ufus n‑kra n‑yan, imma rbbi iga abnnay n‑kullu ma‑illan.

⁵ musa issuwfa kullu ma‑gis‑ira rbbi, ig ah̬ddam ġ‑wammas n‑ayt‑tgmmi n‑rbbi, iml‑asn ma‑ra‑yini rbbi ġ‑maylli‑d‑iftan.

⁶ ula lmasiḥ issuwfa kullu ma‑gis‑ira rbbi, imma ntta iga yus n‑tgmmi, tili‑tgmmi kullutt ġ‑ddu‑ufus‑ns. imma ayt‑tgmmi‑ns, nkkʷni a‑tn‑igan iġ‑nzga nzɛm, namẓ‑bdda ġ‑rrja‑yad darnnġ illan.

ad‑ur‑tssiqarm ih̬f‑nnun

⁷ ġmklli‑s‑inna rruḥ lqudus: «ġassad iġ‑tsfldm i‑wawal‑ns,

⁸ ad‑ur‑tssiqarm ih̬f‑nnun zund imzwura‑nnun lli‑gigi‑rggmnin ġ‑uwssan lli‑ġ‑a‑yyi‑tarmn ġ‑lh̬la.

⁹ kkuẓ id‑mraw n‑usggʷas a‑yyi‑tarmn, ar‑tmnadn kullu mad‑skarġ.

¹⁰ mayan a‑f‑ḥašaġ mddn‑an iniġ fllasn ‹ar‑bdda‑jllun ih̬fawn‑nsn. ur‑jju‑ssinn aġaras‑inu.›

¹¹ s‑lġaḍab a‑s‑nniġ awal‑ad izgan, ‹ntni ur‑sar‑rad‑kšmn s‑usunfu‑nu.›»

¹² way‑aytma, rarat lɛaql a‑ur‑gigun‑yili ma‑mi‑yʷh̬šn‑uwl‑ns yagʷi a‑yamn irar tiġurdin‑ns s‑rbbi lli‑iddrn.

¹³ walaynni zzɛamat i‑ngratun kraygatt ass, maḥdd llan‑uwssan, a‑ur‑gigun‑yili ma‑n‑lddin ddnub ard iqar ih̬f‑ns ijlu.

¹⁴ ašku rad‑bdda‑nqama ġ‑tamunt l‑lmasiḥ iġ‑nzga ġmklli numn zġ‑isizwar ar isiggʷra.

¹⁵ ġmklli inna: «ġassad iġ‑tsfldm i‑wawal‑ns, ad‑ur‑tssiqarm ih̬f‑nnun zund imzwura‑nnun lli‑gigi‑rggmnin.»

¹⁶ walaynni manwi sfldnin i‑wawal n‑rbbi rgmn gis? a‑tn‑igan d‑willi‑d‑issufġ musa zġ‑tmazirt n‑miṣr.

¹⁷ manwi iḥaša rbbi kkuẓ id‑mraw n‑usggʷas? a‑tn‑igan d‑willi skrnin ddnub mmtn ilmma ġ‑lh̬la.

¹⁸ manwi mi inna rbbi s‑wawal izgan ur‑sar‑rad‑kšmn s‑usunfu‑ns? a‑tn‑igan d‑willi ffuġnin zġ‑wawal‑ns.

¹⁹ ġayan ad‑aġ‑imlan izd f‑ssibt n‑mad‑agʷin ad‑amnn a‑f‑ur‑ẓḍarn ad‑d‑kšmn s‑usunfu n‑rbbi.