iɛbrin 13 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ḥubbwat ar‑ttfulkim i‑ngratun

¹ zaydat ar‑bdda‑ttḥubbum i‑ngratun ġmklli tmḥubbun aytmatn.

² a‑ur‑tettum a‑tssmrḥbam s‑iġribn, ašku ġayd izrin ssmrḥban kra n‑mddn s‑lmalayka, ur‑ssinn izd lmalayka ad‑gan.

³ swingimat ġ‑aytmatun lli‑n‑llanin ġ‑lḥbs zund iġ‑n‑didsn‑tllam, ar‑tswingimm ġ‑ġwilli trfufunnin zund iġ‑a‑didsn‑ttrfufunm.

⁴ illa f‑kud yan a‑ig littihal d‑tġawsa ifulkin ihiyyan, ula‑da‑išškšam yan ma‑ihršn s‑tisi‑nsn. ašku rbbi ra‑yut lḥukm f‑wanna ifsadn ula wanna iznan.

⁵ zriyat tudrt‑nnun bla‑da‑ttḥubbum iqaridn, tqnɛum s‑unšk nna‑darun‑illan. ašku inna rbbi: «ur‑sar‑k‑in‑flġ ula wrriġ‑d fllak.»

⁶ mayan ad‑aġ‑izzɛamn a‑nttini: «sidi rbbi a‑igan aɛwin‑inu. ur‑ksuḍġ yat. ma‑rad‑iyi‑iskr bnadm?»

⁷ swingimad‑d imġarn lli‑awn‑in‑sslkmnin awal n‑rbbi, ar‑di‑tswingimm lfaytt n‑tudrt‑nsn, tamnm awal n‑rbbi ġmklli umnn ntni.

⁸ imma yasuɛ lmasiḥ, ġmklli iga a‑rad‑bdda‑ig, zund iḍgam zund ġass zund kullu ma‑d‑iftan.

⁹ a‑ur‑tadjm kra n‑ilmmudn iġribn a‑kʷn‑jllun zġ‑uġaras l‑lḥqq. ra‑išwu a‑tssdusm ulawn‑nnun s‑lbaraka n‑rbbi, urd s‑tnbaḍin n‑umššu lli‑ġ‑ur‑tlli kra l‑lfaytt i‑willi srsnt skarnin.

¹⁰ ur‑ẓḍarn ġwilli skarnin tawuri n‑uh̬iyyam n‑rbbi ad‑ššn zġ‑tġrsi lli‑darnnġ‑illan.

¹¹ anmġur‑nsn ihiyyan ar‑itawi idammn l‑lbhaym s‑tḥanut tamẓlayt baš a‑ġin‑issitti ddnub f‑mddn‑ns. imma tifiyi d‑ih̬san n‑tġrsiw‑an ar‑tn‑jddrn mddn ġ‑brra n‑udġar lli‑ġ‑bnan ih̬iyyamn‑nsn.

¹² mayan a‑f‑immut ula yasuɛ ġ‑brra n‑tmdint baš a‑issġus mddn s‑idammn‑ns.

¹³ imma ġilad illa fllannġ a‑dars‑nffuġ s‑brra n‑ih̬iyyamn a‑n‑dids‑nili ġ‑trggam lli‑s‑t‑rgmn.

¹⁴ ašku ur‑darnnġ kra n‑tmdint idumn ġ‑ddunit‑ad, walaynni ar‑n‑ntrju tamdint lli‑rad‑aġ‑yili ġ‑mayd‑d‑iftan.

¹⁵ imma ġilad illa fllannġ a‑n‑bdda‑nssakmur i‑rbbi tawafka n‑ššukr f‑uwdm n‑yasuɛ, a‑stt‑igan d‑lġllt n‑infurn‑nnġ lli‑s‑a‑ntuqqar ism‑ns.

¹⁶ a‑ur‑tettum a‑tskarm afulki ar‑tmɛawanm i‑ngratun, ašku wan tiwafkiw‑an a‑s‑a‑itrḍu rbbi.

¹⁷ sflidat s‑imġarn‑nnun ar‑tskarm s‑wawal‑nsn, ašku ar‑bdda‑srun‑traran lɛaql. iqqan‑tn‑d ad‑fllawn‑fkn lḥsab i‑rbbi. skarat s‑wawal‑nsn baš ad‑frḥn s‑twuri‑nsn, urd a‑tn‑fllas‑tigʷraẓ. ašku iġ‑tn‑tẓẓigʷraẓm ur‑rad‑awn‑tili lfaytt.

¹⁸ ẓẓallat ar‑ttḍalabm rbbi f‑ssibt‑nnġ nkkʷni. nssn is‑iġus‑uwl‑nnġ, niri a‑nskar afulki ġ‑kullu ma‑ntnawal.

¹⁹ ġmkad a‑s‑kʷn‑uṣṣaġ s‑lmɛqul a‑tḍalbm rbbi flla baš a‑yyi‑n‑isswrri s‑darun ġ‑mayd‑d‑yakmurn.

²⁰ imma ġilad, ḍalbġ i‑rbbi n‑sslamt lli‑d‑issnkrn zġ‑lmut amksa imqqurn siditnnġ yasuɛ lli‑itgabaln ulli‑ns, iskr lɛhd‑ad idumn ġ‑gratnnġ d‑rbbi s‑idammn‑ns.

²¹ ḍalbġ‑as ad‑awn‑yakka kullu ma‑igan afulki, baš a‑tskarm ma‑ittiri. ḍalbġ‑as a‑ginnġ‑iskr kullu ma‑t‑itrḍun s‑ism n‑yasuɛ lmasiḥ. nttan a‑bahra‑ntalġ ġilad ula kullu mayd‑d‑iftan. amin.

²² way‑aytma, riġ ad‑awn‑ḍalbġ a‑tqblm iwaliwn‑ad lli‑s‑kʷn‑uṣṣaġ, ašku ur‑bahra‑tġzzif‑tbrat‑ad.

²³ imma ġilad riġ a‑tissanm is‑d‑iffuġ gʷmatnnġ timutaws zġ‑lḥbs. iġ‑d‑dari‑yuška ġ‑mayd‑d‑yakmurn, ra‑n‑didi‑imun s‑darun a‑kʷn‑nẓr.

²⁴ sllmat‑n f‑imġarn‑nnun kullutn ula f‑kullu imẓlayn n‑rbbi. ar‑n‑fllawn‑tsllamn aytmatn n‑iṭalya.

²⁵ ad‑awn‑tili lbaraka n‑rbbi kullukn.