iɛbrin 12 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

swangmad‑d yasuɛ

¹ imma ġilad ġ‑aġ‑tlulli‑tmdlut‑ad n‑inagan, illa fllannġ a‑nluḥ kullu mad‑aġ‑iẓẓuẓẓayn, nfl ddnub lli‑bdda‑ttirinin ad‑aġ‑ssmukrusn, baš a‑ntazzal bla‑da‑ntrmay ġ‑uġaras lli‑irẓmn ġ‑lgddam‑nnġ.

² illa fllannġ a‑n‑ntmnad ġ‑yasuɛ lli‑aġ‑iskrn aġaras‑ad s‑numn, rad‑aġ‑gis‑yawi ar ttmi. iṣbr nttan i‑lmut f‑uggjdi, ur‑tt‑yiwi ġ‑tdallit, ašku iẓra‑n lfrḥ lli‑rad‑as‑yili tigira. iskiws ilmma f‑ufasi l‑lɛrš n‑rbbi.

rbbi ar‑itrbba wanna dars iɛzzan

³ swangmad‑d yasuɛ lli‑iṣbrn i‑tnuwwašt iggutn f‑ifassn n‑mddn ʷh̬šnnin, baš a‑ur‑irmi‑uwl‑nnun ihruṣṣi.

⁴ ašku ġ‑imiġ‑ad ġ‑a‑ttmmaġm d‑lh̬ʷšant, ur‑ta‑gis‑tlkimm tizi l‑lmut.

⁵ is‑tettum awal lli‑s‑kʷn‑izzɛam rbbi lliġ‑kʷn‑iga d‑tarwa‑ns? yini: «wa‑iwi, iġ‑k‑iṣlḥ sidi rbbi, ad‑ur‑tinit d‑ih̬f‑nnk ‹ġayad ur‑igi yat.› nġd iġ‑k‑iẓi, ad‑ur‑tinit ‹nkki ur‑giġ yat.›

⁶ ašku sidi rbbi ar‑itrbba wanna dars iɛzzan, ar‑issrwat wanna iga d‑yus.»

⁷ illa fllawn a‑tṣbrm iġ‑a‑kʷn‑itrbba, ašku ar‑didun‑iskar ġmklli iskar‑urgaz d‑tarwa‑ns. is‑illa ma‑ur‑ittrbban f‑ufus n‑babas?

⁸ mrad is‑a‑kʷn‑ur‑itrbba rbbi ġmklli ttrbban kullu mddn, ur‑ra‑tgm tarwa‑ns, walaynni zund tarwa n‑tsukt a‑ra‑tgm.

⁹ nkkʷni kullwaġ darnnġ id‑babatnnġ n‑ddunit‑ad, ar‑aġ‑trbban ar‑tn‑ntuqqar, walaynni is‑ur‑yuf a‑nsflid ula s‑babatnnġ n‑ignna baš a‑nddr?

¹⁰ yat luqt idrusn ad‑aġ‑trbban ntni s‑mklli‑asn‑iban išwa, imma rbbi ar‑aġ‑itrbba s‑mklli rad‑aġ‑iṣlḥ baš a‑nfulki ġmklli ifulki ntta.

¹¹ ur‑illi ma‑itfraḥn ġakud lliġ a‑t‑itrbba babas. ar‑as‑teṭiyyar ġ‑tasaɛt‑an, walaynni rad‑as‑tili lġllt n‑ufulki d‑lhna tigira i‑wanna ittrbban ġmkad.

awiyat‑stt ġ‑ma‑s‑a‑ttrḍum rbbi

¹² f‑mayan a‑f‑rad‑awn‑iniġ, allat ifassn‑nnun alwanin, tzzgam ifaddn‑nnun tġašanin.

¹³ ssngaddat tiġarasin i‑iḍarn‑nnun, a‑ur‑iḍr yan issbiḍirn walaynni a‑ijji.

¹⁴ gat‑n tiqqi‑nnun a‑tgm sslamt i‑kullu mddn, tɛmmrm s‑ufulki ašku yan ġ‑ur‑illi ur‑sar‑ra‑iẓr siditnnġ.

¹⁵ awiyat‑stt ġ‑ih̬fawn‑nnun a‑ur‑ijlu yan gigun zġ‑lbaraka n‑rbbi, ula imġi‑d‑wamud n‑wasmmum ġ‑gratun, ard issduy mddn isshrš ma‑iggutn.

¹⁶ a‑ur‑yili yan gigun itfsadn, ula yan itraran tiġurdin‑ns s‑rbbi zund ɛisu lli‑igan ih̬fddi izznz lḥqq‑ns f‑yat tirmt.

¹⁷ tssnm is‑iwrri tigira ira bahra a‑iwrt lbaraka n‑babas, walaynni babas ur‑as‑tt‑ifki. wah̬h̬a‑yas‑tt‑iḍalb bahra s‑imṭṭawn, ur‑as‑isugir yat.

¹⁸ ur‑n‑takmurm kunni s‑kra n‑udrar n‑ddunit‑ad ġmklli‑n‑akmurn imzwura‑nnun, ar‑n‑gis‑ssmuqquln timzliwin l‑lɛafit d‑tillas d‑umalu d‑iggig.

¹⁹ ula tsfldm kunni i‑tijjijt n‑nnffar ula awal lli‑itbrraḥn. ntni, lliġ sfldn i‑wawal‑an, ḍalbn‑t bahra ad‑asn‑ur‑sul‑isawl,

²⁰ ašku ggʷdn f‑luṣit n‑rbbi lli‑s‑asn‑inna: «wanna‑d‑iruḥn adrar‑ad, ig‑iyt lbhimt nġd bnadm, iqqan‑d a‑ti‑tkkatm s‑iẓran ard immt.»

²¹ ula musa iksuḍ bahra zġ‑kullu maylli‑n‑iẓra yini: «ar‑sri‑tkkat tawda.»

²² walaynni takmurm‑d kunni s‑udrar yaḍni, a‑t‑igan d‑urušalim n‑ignna, ig tamdint n‑rbbi lli‑iddrn. takmurm‑d s‑kigan d‑wafḍan l‑lmalayka munn‑d kullu s‑lfrḥ iggutn,

²³ ula s‑umnaggar n‑willi iga rbbi d‑tarwa‑ns ih̬fdditn lli‑mi‑tyaran ismawn‑nsn ġ‑ignna. takmurm‑d s‑rbbi lli‑itḥkamn f‑kullu mddn, ula s‑larwaḥ n‑mddn lli‑f‑irḍa issafu‑asn kullu mad‑asn‑inna.

²⁴ takmurm‑d s‑yasuɛ lli‑iskrn lɛhd l‑ljdid ġ‑gr rbbi d‑bnadm, ula s‑urušš n‑idammn‑ns lli‑ifkan rrja uggʷar n‑idammn n‑habil.

²⁵ awiyat‑stt bahra ġ‑ġwalli srun isawaln. ašku lhalak a‑iḍrn f‑willi agʷinin ad‑sflidn s‑musa lli‑tn‑yumrn ġ‑ddunit‑ad, walaynni uggʷar n‑ġayan a‑rad‑aġ‑yili nkkʷni iġ‑nrur tiġurdin‑nnġ s‑walli‑aġ‑d‑yumrn zġ‑ignna.

²⁶ lliġ isawl rbbi ġ‑uwssan‑an, immussa‑wakal s‑wawal‑ns. imma ġilad inna‑yaġ f‑ma‑ra‑iskr: «rad‑daġ‑ssmassġ akal, ssmassġ ula ignwan.»

²⁷ s‑wawal‑an a‑s‑aġ‑imla is‑ra‑immass kullu ma‑ityawh̬laqn, ityattay baš a‑ur‑iqama ġir ma‑iṭṭafn llsas izgan.

²⁸ imma ġilad ġ‑aġ‑ifka rbbi yat‑tgldit lli‑ur‑sar‑ra‑immass, illa fllannġ a‑t‑ntškar ar‑t‑ntɛbad ġmklli‑zginnġ‑ira, ar‑t‑ntuqqar ar‑tt‑ntawi bahra ġ‑ma‑s‑a‑t‑ntrḍu.

²⁹ ašku rbbi‑nnġ irwas i‑lɛafit ifnnun.