iɛbrin 11 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ġwilli umnnin awal n‑rbbi

¹ yan yumnn awal n‑rbbi, hati issn rad‑as‑yili maylli‑n‑itrju. ur‑a‑itškku ġ‑maylli ur‑iẓri.

² mayan a‑s‑irḍa rbbi f‑imzwura‑nnġ lli‑zrinin.

³ ula nkkʷni, f‑ssibt n‑ma‑numn awal n‑rbbi a‑f‑nssn izd nttan a‑ih̬lqn kullu ma‑illan s‑wawal‑ns, iskr kullu ma‑ntmnad zġ‑ma‑ur‑ityawẓrran.

⁴ ula habil, f‑ssibt n‑ma‑yumn awal n‑rbbi a‑f‑n‑isrs ġ‑lgddam n‑rbbi yat‑twafka lli‑yufn tin gʷmas qayn. iml‑as rbbi is‑fllas‑irḍa f‑ssibt l‑liman‑ns, iqbl maylli‑as‑ifka. ar‑isawal habil sul s‑ġilad wah̬h̬a immut, ašku yumn rbbi.

⁵ ula ah̬nuh̬, f‑ssibt n‑ma‑yumn awal n‑rbbi a‑f‑ityalal s‑ignna ur‑immut. ur‑ẓḍarn mddn a‑t‑afn ašku rbbi issitti‑t zġ‑ddunit. lliġ ur‑ta‑ityalal, imla‑yas rbbi is‑fllas‑irḍa.

⁶ walaynni yan ur‑yuminn rbbi, ur‑ra‑yiẓḍar a‑yamẓ rrḍa‑ns. ašku wanna iran a‑n‑yakmur s‑rbbi, iqqan‑t‑id a‑yamn is‑illa rbbi, yujad a‑ibark wanna‑t‑isiggiln.

⁷ ula nuḥ, f‑ssibt n‑ma‑yumn awal n‑rbbi a‑f‑tt‑yiwi bahra ġ‑maylli‑as‑inna rbbi f‑kra n‑tġawsiwin lli‑ur‑ta‑iẓri. inkr ibnu yan‑wanaw, injm gis ntta d‑ayt‑tgmmi‑ns. ifl ddunit a‑ttyawhlak, imma ntta iga‑t rbbi d‑wad f‑irḍa f‑ssibt n‑ma‑t‑yumn.

liman n‑ibrahim

⁸ ula ibrahim, f‑ssibt n‑ma‑yumn awal n‑rbbi a‑f‑iskr s‑maylli‑as‑inna lliġ‑as‑iġra a‑iffuġ s‑tmazirt lli‑ra‑ig tins. inkr iffuġ wah̬h̬a ur‑issin manis a‑ittidu.

⁹ f‑ssibt n‑ma‑yumn rbbi a‑f‑iskr takat ġ‑tmazirt lli‑rad‑as‑ifk rbbi, ig aġrib ġ‑wammas n‑ayt‑tmazirt‑an. izdġ ġ‑ih̬iyyamn, nttan ula isḥaq ula yaɛqub lli‑rad‑kullu‑dids‑iṭṭaf maylli‑s‑as‑inna rbbi rad‑as‑t‑ifk.

¹⁰ ašku ar‑n‑itrju ġ‑tmdint yaḍni, a‑stt‑igan d‑talli iskr rbbi ibnu‑tt f‑llsas idumn.

¹¹ f‑ssibt n‑ma‑yumn rbbi a‑f‑yuru ġ‑tizi lli‑ġ‑ur‑a‑itaru yan, ula tẓḍar‑tmġart‑ns sara a‑trbbu. iwrri iga babas n‑yan‑warraw, ašku yumn is‑izga rbbi ġ‑wawal‑ns.

¹² ġmkad a‑s‑twrri tasut n‑yan‑urgaz lli‑issurfn tizi n‑tudrt, tggut zund itran n‑ignwan nġd amlal n‑tama n‑umda.

¹³ kullu mddn‑an umnn awal n‑rbbi aylliġ mmutn, ur‑ta‑umẓn maylli‑s‑asn‑inna rad‑asn‑t‑ifk. walaynni ẓran‑t‑in ġ‑tuggugt frḥn srs, ur‑a‑tḥšamn a‑ttinin izd ibrraniyn d‑iġribn ad‑gan ġ‑ddunit.

¹⁴ kullu winna ittinin ġmkan, iban gisn is‑a‑ttirin yat‑tmazirt yaḍni a‑tg tinsn.

¹⁵ ašku mrad is‑a‑swingimn ġ‑tmazirt n‑ddunit‑ad lli‑zġ‑d‑uškan, ikun ẓḍarn a‑srs‑wrrin.

¹⁶ walaynni ar‑ttirin yat‑tmazirt lli‑yufn h̬tad, a‑stt‑igan d‑tin‑ignna. ur‑tʷgraẓ rbbi lliġ a‑ttinin is‑iga rbbi‑nsn, ašku ijjujad‑asn yat‑tmdint.

¹⁷ ibrahim, f‑ssibt n‑ma‑yumn awal n‑rbbi a‑f‑n‑isrs isḥaq f‑iggi n‑ukrkur lliġ‑t‑yurm rbbi. yujad a‑iġrs i‑yus lli‑dars‑igan yan

¹⁸ wah̬h̬a‑yas‑inna rbbi s‑wawal‑ns izgan: «zġ‑tarwa n‑yuk isḥaq a‑zġ‑ra‑tili tasut‑nnk.»

¹⁹ walaynni yumn ibrahim is‑iẓḍar rbbi a‑d‑issnkr ula yan immutn. iskr‑nnit rbbi zund mayan, irar‑as‑d isḥaq zġ‑lmut.

ibark rbbi ġwilli umnnin awal‑ns

²⁰ ula isḥaq f‑ssibt n‑ma‑yumn awal n‑rbbi a‑f‑inna i‑yaɛqub d‑ɛisu f‑lbarakat lli‑rad‑asn‑yili.

²¹ ula yaɛqub lliġ ɛlayn a‑immt, f‑ssibt n‑ma‑yumn awal n‑rbbi a‑f‑inna i‑sin tarwa n‑yusf f‑lbarakat lli‑rad‑asn‑yili, iknu f‑ih̬f n‑uɛkkaz‑ns yalġ rbbi.

²² ula yusf lliġ a‑d‑itakmur a‑immt, f‑ssibt n‑ma‑yumn awal n‑rbbi a‑f‑isawl f‑uffuġ lli‑s‑rad‑ffuġn ayt‑rbbi zġ‑miṣr, yuṣṣa‑tn ilmma f‑ih̬san‑ns.

²³ ula babas n‑musa d‑innas, f‑ssibt n‑mad‑umnn awal n‑rbbi a‑f‑t‑ḥḍan kraḍ‑iyrn tiġurdin n‑tlalit‑ns, ašku ẓran is‑iga arraw ifulkin, d‑ntni ur‑ksuḍn lamr n‑ugllid.

liman n‑musa

²⁴ ula musa lliġ‑d‑imqqur, f‑ssibt n‑ma‑yumn awal n‑rbbi a‑f‑ur‑iri ad‑as‑ttinin mddn «yus n‑illis n‑firɛawn.»

²⁵ yuf dars a‑itmunu d‑ayt‑rbbi ġ‑trfufnt, ula‑da‑itfjjij ġ‑ddnub yat tasaɛt idrusn.

²⁶ iḥasb ntta tadallit lli‑ġ‑illa f‑ssibt l‑lmasiḥ is‑tɛzza uggʷar n‑tmih̬ar n‑miṣr, ašku ar‑n‑itrju ġ‑lbaraka lli‑ra‑yili tigira.

²⁷ f‑ssibt n‑ma‑yumn awal n‑rbbi a‑f‑iffuġ zġ‑miṣr, ur‑iksuḍ lġaḍab n‑ugllid. izga ntta ġ‑maylli iqṣad zund iġ‑a‑iẓrra rbbi lli‑ur‑jju‑iẓri yan.

²⁸ f‑ssibt n‑ma‑yumn rbbi a‑f‑yuṣṣa ayt‑rbbi f‑wass n‑usurf, yini‑asn ad‑truššn tigʷmma‑nsn s‑idammn, baš a‑ur‑inġ lmalak l‑lmut iwitsn ih̬fddi zund ih̬fdditn n‑ayt‑miṣr.

wiyyaḍ umnnin awal n‑rbbi

²⁹ ula mddn‑an, f‑ssibt n‑mad‑umnn awal n‑rbbi a‑f‑zrin zġ‑wammas n‑umda iẓggʷaġn zund iġ‑zrin f‑wakal. lliġ ran ayt‑miṣr ad‑skrn zund ntni, ssh̬sin‑tn‑kullu‑waman.

³⁰ f‑ssibt n‑mad‑umnn mddn awal n‑rbbi a‑f‑asn‑d‑ḍrn iġurban n‑tmdint n‑ariḥa tigira n‑mad‑as‑tlullin ssa‑uwssan.

³¹ ula tamggant raḥab, f‑ssibt n‑ma‑tumn a‑f‑tɛawn imazann, ur‑tmmut tigira d‑willi ur‑rinin rbbi.

³² ma‑rad‑awn‑sul‑iniġ? ur‑tumi luqt ma‑ġ‑a‑yawn‑in‑sul‑addrġ ma‑iskr jidɛun ula baraq ula šamšun ula iftaḥ ula dawd ula ṣamwil ula lanbiya.

³³ ntni, f‑ssibt n‑mad‑umnn awal n‑rbbi a‑f‑nran tiglday, zzgan lḥqq, amẓn ma‑f‑asn‑inna rbbi, qqnn imawn n‑izmawn,

³⁴ ssh̬sin lɛafit issdiddin, njmn zġ‑taẓẓit inqqan, wrrin dusn ġ‑ḍḍɛf‑nsn, tjhhdn ġ‑imiġ, nrun iɛskrin n‑ibrraniyn.

³⁵ ula kra n‑tmġarin, nkrn‑asnd‑d ġwilli‑asnt‑mmutnin. imma wiyyaḍ agʷin anurẓm, ṣbrn d‑willi‑tn‑kkatnin ar lmut, baš ad‑d‑nkrn s‑tudrt lli‑yufn tudrt n‑ddunit‑ad.

tarfufnt n‑willi umnnin

³⁶ kra gisn, rgmn‑t. kra gisn, ssġuršn‑t. kra gisn, krfn‑t s‑ssnasl luḥn‑t‑in ġ‑lḥbs.

³⁷ utn‑tn s‑iẓran, bbin‑tn s‑lmnašr, ġrsn‑asn s‑taẓẓit. ar‑tlullin ar‑lssan ilmawn n‑uwlli d‑waġaḍn. ẓlḍn, zaydn‑d tarfufnt i‑tmmara.

³⁸ wan ġwid, ur‑tn‑tsthlla ddunit. ar‑tkkan lh̬la d‑idrarn, ar‑nssan ġ‑ifran d‑igʷḍyan ġ‑ddu‑wakal.

³⁹ kullu mddn‑an, irḍa fllasn rbbi f‑ssibt n‑mad‑umnn awal‑ns, walaynni ur‑umẓn maylli‑s‑asn‑inna rad‑asn‑t‑ifk.

⁴⁰ ašku iqṣad rbbi kra yufn mayan. yiri ad‑didnnġ‑kšmn s‑lbaraka lli‑rad‑aġ‑yili, issafu‑asn ġmkan kullu maylli‑s‑asn‑inna.