iɛbrin 10 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmut l‑lmasiḥ tssġus‑aġ zġ‑ddnub

¹ imma ššrɛ n‑ayt‑yudaya iga ġir zund amalu l‑lbarakat lli‑ra‑yili. ur‑iẓḍar a‑d‑issbayyn lbarakat‑an ġmklli gant. ašku ššrɛ ur‑iẓḍar a‑issġus s‑usġus ikmmln ġwilli‑n‑bdda‑ssakmurnin tiġrsiw i‑rbbi asggʷas ar asggʷas.

² mrad is‑wrrin ġusn ġwilli tɛbadnin ġmkan, ikun ur‑sul‑a‑ssḥssan is‑a‑gisn‑tqaman ddnub ula‑da‑ttirin a‑tzayadn ar‑n‑ssakmurn tiġrsiw yaḍni.

³ walaynni tiġrsiw‑an, ntnti a‑tn‑d‑itraran ad‑swingimn ġ‑ddnub‑nsn asggʷas ar asggʷas,

⁴ ašku ur‑ẓḍarn idammn n‑imugayn d‑waġaḍn ad‑ssittin ddnub.

⁵ mayan a‑f‑inna lmasiḥ ġakud lliġ ra‑d‑yašk s‑ddunit: «tiġrsiw d‑twafkiw, ur‑a‑tnti‑ttirit walaynni tqṣadt gigi yat‑ddat.

⁶ lbhaym tyawjdarnin ula atig n‑ddnub, ur‑a‑srsn‑ttrḍut,

⁷ walaynni nniġ‑ak ‹ha‑yyi uškiġ‑d ad‑skrġ ma‑trit a‑rbbi, ġmklli flla ityaran ġ‑warra‑nnk.›»

⁸ ġmkan a‑s‑imla rbbi is‑ur‑a‑ittiri tiġrsiw ula tiwafkiw ula lbhaym tyawjdarnin ula atig lli‑akkan mddn f‑ddnub‑nsn. ur‑a‑srsn‑itrḍu, wah̬h̬a da‑yas‑tn‑in‑ssakmurn mddn ġmklli ittini ššrɛ.

⁹ izayd ilmma lmasiḥ yini «ha‑yyi uškiġ‑d ad‑skrġ ma‑trit.» ġmkan a‑s‑issunf kullu tiġrsiw timzwura baš a‑izzga tiġrsi yaḍni.

¹⁰ lliġ iskr yasuɛ lmasiḥ maylli gis ira rbbi, isrs‑n yat‑twal ġ‑lgddam‑ns tiġrsi lli‑igan ddat‑ns. ġmkad a‑s‑aġ‑issġus nkkʷni zġ‑ddnub‑nnġ.

¹¹ ass f‑wass ar‑tbddadn inmġurn n‑ayt‑yudaya ar‑skarn tawuri‑nsn, ar‑n‑ssakmurn kigan d‑tġrsiw lli‑ur‑ẓḍarnin ad‑ssittint ddnub.

¹² imma lmasiḥ, yat‑twal a‑n‑isrs yat‑tġrsi f‑ddnub n‑kullu tasutin, iskiws ilmma f‑ufasi n‑rbbi

¹³ ar‑itql ard ig rbbi kullu inuwwašn‑ns ġ‑ddu iḍarn‑ns.

¹⁴ ašku s‑yat‑tġrsi a‑s‑issġus imẓlayn n‑rbbi s‑usġus ikmmln lli‑ur‑sar‑itmmin.

¹⁵ ula rruḥ lqudus ifka‑yaġ tugga f‑mayad inna:

¹⁶ «sidi rbbi a‑innan ‹ġmkad a‑iga lɛhd lli‑rad‑didsn‑skrġ ġ‑uwssan‑an. ra‑n‑araġ tinbaḍin‑inu f‑uwlawn‑nsn, gġ‑tnt ġ‑ih̬fawn‑nsn.›»

¹⁷ izayd ilmma yini: «ur‑sul‑rad‑d‑ktiġ ddnub‑nsn ula lh̬ʷšanat lli‑skrn.»

¹⁸ ġmkad a‑s‑imla is‑fllannġ‑issitti lmasiḥ kullu ddnub lli‑nskr. ur‑aġ‑sul‑ih̬ṣṣa a‑n‑nssakmur kra n‑tġrsiw yaḍni.

akmurat‑n s‑rbbi ar‑tzzɛamm i‑ngratun

¹⁹ f‑mayan a‑f‑rad‑awn‑iniġ ay‑aytma, nẓḍar a‑nkšm ġilad s‑zzɛamt s‑‹tḥanut ityawqdasn› f‑ssibt n‑idammn n‑yasuɛ.

²⁰ ašku s‑lmut‑ns a‑s‑aġ‑ijjujad yan‑uġaras l‑ljdid lli‑itawin s‑tudrt, a‑srs‑nzri zġ‑lh̬amiya s‑ugʷns.

²¹ lliġ‑aġ‑illa yan‑unmġur ihiyyan lli‑itgabaln mddn n‑rbbi,

²² illa fllannġ a‑n‑nakmur s‑rbbi s‑nniyt ikmmln, namn rad‑aġ‑iqbl, nġus zġ‑kullu ddnub lli‑s‑a‑issḥssa‑uwl n‑bnadm, tarud ula ddat‑nnġ s‑waman ġusnin.

²³ illa fllannġ a‑namẓ ġ‑rrja lli‑s‑numn bla‑yas‑nrẓm, ašku rbbi lli‑ifkan awal‑ns rad‑bdda‑gis‑izga.

²⁴ illa fllannġ a‑stt‑ntawi ġ‑ingratnnġ baš a‑ntmɛawan a‑nissan mamnk a‑ntḥnnu ar‑nskar kullu ma‑ifulkin.

²⁵ a‑ur‑nssikki f‑umnaggar n‑ingratnnġ ġmklli skarn kra n‑mddn, walaynni a‑nzzɛam i‑ngratnnġ, ġilad s‑uggʷar ašku ar‑ttmnadm is‑a‑d‑itakmur‑wass lli‑ġ‑ra‑d‑yašk siditnnġ.

lḥukm lli‑ra‑ittut f‑willi ur‑rinin rbbi

²⁶ walaynni iġ‑nnkr ar‑nskar ddnub tigira n‑ma‑nssn lḥqq, ur‑ra‑sul‑darnnġ‑tili kra n‑tġrsi ma‑fllannġ‑issittin ddnub.

²⁷ han s‑tksaḍ ggutnin a‑s‑rad‑aġ‑d‑iqqan a‑ntql s‑lḥukm n‑rbbi ula lɛafit itjhhdn lli‑s‑ra‑ihlk kullu willi ffuġnin zġ‑wawal‑ns.

²⁸ nssn is‑ur‑irḥim rbbi yan irurn tiġurdin‑ns s‑ššrɛ n‑musa, ašku iqqan‑t‑id a‑immt f‑tugga n‑sin nġd kraḍ inagan.

²⁹ walaynni uggʷar l‑lɛqubit‑an a‑ra‑yili i‑wanna yuḍḍrn yus n‑rbbi s‑iḍarn‑ns, iḥgr idammn l‑lɛhd lli‑t‑issġusn, irgm rruḥ n‑rrḥmt.

³⁰ ašku nssn izd rbbi a‑innan: «nkki a‑rad‑asn‑irar f‑mad‑skrn, fkġ‑asn mad‑asn‑igan.» yini‑daġ: «rbbi siditun ra‑yut lḥukm f‑mddn‑ns.»

³¹ han tiksaḍ iggutn a‑ra‑yili i‑wanna iḍrn ġ‑ufus n‑rbbi lli‑iddrn.

ṣṣbr ula lbaraka

³² swangmad‑d ussan imzwura lli‑ġ‑twrrim tsfawm s‑tifawt l‑lmasiḥ, tṣbrm tzgam ġakud lliġ a‑tkkatm tammara išqan.

³³ kra n‑izmaz ar‑fllawn‑zraynt‑trggam d‑trfufnt ġ‑lgddam n‑mddn. izmaz yaḍni ar‑ttbddadm d‑willi‑f‑a‑zraynt.

³⁴ ar‑ttɛawanm aytmatun lli‑n‑llanin ġ‑lḥbs, tṣbrm d‑willi‑awn‑kkisnin ayda‑nnun, tfrḥm ašku tssnm is‑teṭṭafm kra yufn mayan, a‑t‑igan d‑wayda idumn.

³⁵ imma ġilad, a‑ur‑di‑twrrim f‑zzɛamt‑an gigun illan, ašku rad‑awn‑gis‑tili lbaraka iggutn.

³⁶ ih̬ṣṣa‑kʷn a‑tṣbrm ard tkmmlm kullu ma‑gigun‑ira rbbi, tkšmm tigira s‑maylli‑s‑awn‑inna rad‑awn‑yili.

³⁷ ašku inna: «yan imikk ra‑d‑iruḥ ġwalli ra‑d‑yašk, ur‑ra‑n‑imaṭl.

³⁸ wanna yumnn, nttan a‑f‑rad‑rḍuġ fkġ‑as tudrt. walaynni iġ‑iwrri tiġurdin ur‑rad‑as‑yili rrḍa‑nu.»

³⁹ imma nkkʷni ur‑ngi zġ‑willi wrrinin tiġurdin tyawhlakn, hati nga zġ‑willi umnnin njmn.