iɛbrin 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

timuġra l‑lmasiḥ

¹ f‑imi l‑lanbiya ggutnin a‑f‑isawl rbbi s‑imzwura‑nnġ ġayd izrin, kraygatt azmz d‑mad‑asn‑imla.

² imma ġ‑uwssan‑ad ggʷranin isawl‑d srnnġ f‑imi n‑yan igan yus. nttan a‑s‑ih̬lq kullu ma‑illan, iẓli‑t a‑iwrt kraygatt kra.

³ iban gis lmjd n‑rbbi, ig ṣṣurt n‑rruḥ‑ns, iḥkam ġ‑kullu ma‑illan s‑tḥkimt n‑wawal‑ns. ġakud lliġ issitti ddnub f‑bnadm iskiws f‑ufasi n‑rbbi l‑lmjd ġ‑tattuyt n‑ignwan.

lmasiḥ yugʷr lmalayka

⁴ iga‑t rbbi d‑wad yugʷrn lmalayka, ifk‑as ism lli‑yugʷrn ismawn‑nsn.

⁵ ašku urd kra n‑yan ġ‑lmalayka a‑mi‑inna rbbi ġ‑warra‑ns: «kiyi tgit iwi. babak ad‑giġ ġassad.» urd kra l‑lmalak a‑f‑inna: «rad‑gġ babas, ig ntta iwi.»

⁶ walaynni rbbi, ġakud lliġ ra‑d‑yazn yus ih̬fddi s‑ddunit inna: «kullu lmalayka n‑rbbi, iqqan‑tn‑d a‑ti‑tɛbadn.»

⁷ hati lmalayka a‑f‑inna: «rbbi iskr lmalayka‑ns zund aḍu, iskr ih̬ddamn‑ns zund timzliwin l‑lɛafit.»

⁸ walaynni lliġ isawl f‑yus inna: «lɛrš‑nnk a‑rbbi a‑rad‑bdda‑idum, ur‑ra‑sar‑itmmu. iga‑uɛmud n‑tgldit‑nnk aɛmud l‑lḥqq.

⁹ ar‑ttrḍut s‑ufulki, ar‑ttkrhut lh̬ʷšant. mayan a‑f‑k‑iẓli rbbi lli‑igan rbbi‑nnk s‑uẓġur l‑lfrḥ issayk‑k nnig inggan‑nnk.»

¹⁰ yini‑daġ fllas: «kiyi a‑sidi rbbi a‑izzugzn llsas n‑ddunit ġ‑isizwar. f‑ufus‑nnk a‑f‑tyawskarn ignwan.

¹¹ ntni ra‑tn‑kullu‑laḥ, imma kiyi rad‑bdda‑tilit. ntni rad‑kullu‑mdun zund timlsit, imma kiyi rad‑bdda‑tqamat.

¹² ra‑tn‑tssmuttlt zund aslham tkkist‑tn, imma kiyi ġmklli tgit a‑rad‑bdda‑tgt. isggʷasn‑nnk ur‑ra‑sar‑tmmun.»

¹³ ur‑jju‑inni rbbi i‑kra l‑lmalak: «skiws f‑ufasiy‑inu ard gġ inuwwašn‑nnk ġ‑ddu iḍarn‑nnk.»

¹⁴ ašku lmalayka ur‑gin ġir larwaḥ lli‑th̬damnin i‑rbbi, ar‑tn‑d‑itazn ad‑qasan ġwilli ra‑injm.