گالاطيّا 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ṣṣabt n‑ufulki

¹ way‑aytma, iġ‑n‑tufam kra n‑yan iḍr ġ‑ma‑yʷh̬šnn, illa fllawn kunni lli‑ġ‑tlla lġllt n‑rruḥ lqudus a‑dids‑tsawlm s‑lḥnant trarm‑t s‑uġaras. walaynni awiyat‑stt ġ‑ih̬f‑nnun, a‑ur‑tḍrm ula kunni.

² tmɛawanat i‑ngratun ġ‑aynna fllawn iẓẓayn. ġmkad a‑s‑ra‑tssafawm luṣit l‑lmasiḥ.

³ walaynni iġ‑illa ma‑iġaln is‑iga kra, hati isskarks f‑ih̬f‑ns, ašku ur‑igi yat.

⁴ illa f‑kud yan a‑iswingim ġ‑ma‑iskar baš a‑iẓr is‑ifulki nġd uhu. iġ‑ifulki rad‑as‑yili ma‑s‑a‑itfraḥ d‑ih̬f‑ns bla‑da‑itmnad ġ‑mad‑skarn wiyyaḍ.

⁵ ašku kud yan ra‑yasi ma‑t‑id‑yuškan.

⁶ kullu wanna itlmadn awal n‑rbbi, illa fllas a‑yaṭṭu lh̬ir nna‑dars‑illan d‑umslmd‑ns.

⁷ ad‑ur‑tjlum ih̬f‑nnun. ur‑iẓḍar yan a‑stt‑izzri f‑rbbi.

⁸ amud nna‑n‑tluḥm, nttan a‑ra‑tmgrm. yan iskarn s‑ma‑ittiri‑uwl n‑bnadm, zġ‑uwl‑ns a‑zġ‑ra‑imgr lmut. imma yan iskarn s‑ma‑ittiri rruḥ lqudus, zġ‑rruḥ a‑zġ‑ra‑imgr tudrt idumn.

⁹ a‑ur‑ntrmay ġ‑ufulki‑ad nskar, ašku ra‑nmgr ṣṣabt ġ‑uzmz‑ns iġ‑ur‑nhruṣṣi.

¹⁰ illa fllannġ a‑nskar afulki ġ‑kullu mddn ġakud nna‑nufa, s‑uggʷar ġ‑aytmatnnġ lli‑umnnin s‑lmasiḥ.

¹¹ ẓrat mnšk ayd‑s‑mqqurnt tirra‑yad‑awn‑in‑uriġ nkki s‑ufus‑inu.

¹² imma ġwilli‑awn‑ittinin a‑tẓẓallm i‑ddat, ran ntni ad‑rḍun mddn s‑ma‑igan win ddat, baš a‑ur‑rfufnn f‑ssibt n‑uggjdi l‑lmasiḥ.

¹³ imma ayt‑tẓallit‑an, ula ntni ur‑a‑skarn kullu ma‑ityaran ġ‑ššrɛ, walaynni ar‑gigun‑ttirin a‑tẓẓallm i‑ddat baš ad‑alġn ih̬f‑nsn f‑ma‑ityawskarn i‑ddat‑nnun.

¹⁴ imma nkki ur‑rad‑alġġ abla aggjdi n‑siditnnġ yasuɛ lmasiḥ. ašku s‑uggjdi l‑lmasiḥ a‑s‑mmutġ i‑ddunit, immt‑iyi ma‑igan win ddunit.

¹⁵ imma taẓallit n‑ddat ur‑tgi yat, zund iġ‑as‑tẓẓullam zund iġ‑as‑ur‑tẓẓullim. walaynni taġawsa ihiyyan a‑stt‑igan tudrt l‑ljdid lli‑darun‑illan.

¹⁶ ad‑awn‑tili sslamt n‑rbbi d‑rrḥmt‑ns i‑kullu winna skarnin s‑tnbaṭṭ‑ad, a‑tn‑igan d‑ayt‑rbbi n‑ṣṣaḥt.

¹⁷ imma ġilad, ḍalbġ‑awn a‑ur‑sul‑izayd yan i‑tkrrayin‑inu. ašku ibrrayn‑ad usiġ ġ‑ddat‑inu, ntni timitar n‑yasuɛ ad‑gan.

¹⁸ a‑gigun‑tili lbaraka n‑siditnnġ yasuɛ lmasiḥ, ay‑aytma. amin.