گالاطيّا 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lmasiḥ irẓm‑aġ zġ‑iskraf

¹ irẓm‑aġ lmasiḥ baš a‑ur‑sul‑ng ismgan i‑yat. biddat ġilad tzgam a‑ur‑twrrim‑daġ s‑iskraf n‑tsmugit.

² sfldat‑iyi nkki bulus, rad‑awn‑iniġ: iġ‑tram a‑ttġusm s‑tẓallit n‑ddat ur‑rad‑awn‑yili yat ġ‑lmasiḥ.

³ ra‑t‑iniġ‑daġ s‑lmɛqul i‑kullu wanna iran a‑iẓẓall i‑ddat‑ns, iġ‑tskrt ġmkan iqqan‑k‑id a‑bdda‑tskart s‑kullu ma‑ityaran ġ‑ššrɛ.

⁴ wa‑kunni lli‑ittirin a‑trḍum rbbi s‑ššrɛ, hati tssngaram ih̬f‑nnun d‑lmasiḥ, twrrim tḍrm zġ‑lbaraka‑ns.

⁵ imma nkkʷni nssn is‑ra‑fllannġ‑irḍu rbbi f‑ssibt n‑ma‑numn s‑lmasiḥ. ġmkad a‑iga rrja iṣḥan lli‑aġ‑ifka rruḥ lqudus.

⁶ ašku yan igan win lmasiḥ, han taẓallit n‑ddat ur‑dars‑tgi yat, zund iġ‑as‑iẓẓulla zund iġ‑as‑ur‑iẓẓulli. ašku illa dars mad‑bahra‑yufn mayan. hati yumn s‑lmasiḥ, iɛmmr s‑lḥnant‑ns.

⁷ tkkam‑ttin ar‑ttzayadm ġ‑uġaras l‑lmasiḥ. imma ġilad ma‑kʷn‑iḥṣarn a‑ur‑sul‑tskarm s‑lḥqq?

⁸ iswingimn‑an ur‑d‑kkin rbbi lli‑awn‑iġran,

⁹ walaynni tah̬mirt idrusn a‑issktayn lɛjin iggutn.

¹⁰ imma nkki umnġ gigun is‑ur‑ra‑tsflidm s‑kra n‑uswingim yaḍni, ašku win siditnnġ a‑tgam. ra‑iḥkam ntta f‑walli‑awn‑tt‑issṭiyyrn, wanna ra‑ig‑iyt.

¹¹ way‑aytma, urd nkkin a‑ittinin i‑mddn «iqqan‑kʷn‑d a‑tẓẓallm i‑ddat‑nnun». mayad a‑f‑a‑yyi‑sul‑ssrfufunn. ašku mrad is‑a‑yasn‑ttiniġ ġmkan, ur‑ra‑yyi‑itẓi yan ġakud nna‑tbrraḥġ f‑uggjdi l‑lmasiḥ.

¹² imma mddn‑an lli‑kʷn‑issndudiyn, amar yufan ad‑bbin igiwal‑nsn kullut.

¹³ way‑aytma, iġra‑yawn rbbi a‑trẓmm zġ‑iskraf. walaynni a‑ur‑ttinim «ntyawrẓam ġilad, nẓḍar a‑nskar aynna ira ih̬f‑nnġ.» ašku illa fllawn a‑ttḥnnum ar‑ttqasam i‑ngratun.

¹⁴ hati tmun‑d lmɛna n‑ššrɛ kullutt ġ‑yan‑wawal ar‑ittini: «a‑ttirit adjar‑nnk zund ih̬f‑nnk.»

¹⁵ walaynni iġ‑a‑ttlbaym i‑ngratun ar‑tšttam tifiyi n‑ingratun, han ra‑thlkm i‑ngratun.

rruḥ n‑rbbi ula ul n‑bnadm

¹⁶ walaynni rad‑awn‑iniġ, skarat‑bdda s‑mad‑awn‑imala rruḥ lqudus bla‑da‑tswingimm ġ‑ma‑ittiri ih̬f‑nnun.

¹⁷ ašku ul n‑bnadm ar‑ittiri ma‑ur‑ittiri rruḥ lqudus, ula rruḥ lqudus ar‑ittiri ma‑ur‑ittiri‑uwl n‑bnadm. hatni ar‑gigun‑tmmaġn aylliġ ur‑a‑tskarm ma‑ttirim.

¹⁸ walaynni iġ‑a‑tskarm mad‑awn‑imala rruḥ lqudus, ur‑ra‑sul‑tqamam ġ‑iskraf n‑ššrɛ.

¹⁹ han iskkirn n‑bnadm, nssn mamnk ad‑gan. ar‑tznun ar‑tfsadn ar‑tšthun i‑ngratsn,

²⁰ ar‑tɛbadn ilahat n‑ddunit‑ad ar‑skarn ssiḥr, ar‑tkrhun ar‑tẓin ar‑tnuwwašn ar‑tbzagn f‑ingratsn, ar‑ttirin ad‑agʷrn wiyyaḍ, ar‑tmmaġn d‑wanna ur‑zgisn‑igin, ar‑rggmn wanna ur‑didsn‑ibiddn,

²¹ ar‑ttirin ad‑amẓn ma‑ur‑igin winsn, ar‑tnufuln s‑tissi ar‑tmunun f‑tillay‑nsn ʷh̬šnnin, kullu iskkirn‑ad d‑ma‑tn‑irwasn. rad‑awn‑iniġ s‑lmɛqul ġmklli‑awn‑nniġ ġayd izrin, ġwilli skarnin ġmkan ur‑rad‑kšmn s‑tgldit n‑rbbi.

lġllt n‑rruḥ lqudus

²² imma lġllt n‑rruḥ tga lḥnant d‑lfrḥ d‑lhna d‑ṣṣbr, ar‑ntɛawan wiyyaḍ ar‑didsn‑ntfulki ar‑didsn‑ntbddad

²³ ar‑didsn‑ntrh̬u ar‑bdda‑nqqʷay ġ‑ih̬f‑nnġ. hati wan tiġawsiwin‑ad, ur‑illi kra n‑ššrɛ tnt‑yagʷin.

²⁴ ašku kullu wanna igan win lmasiḥ yasuɛ, iga ih̬f‑ns d‑wad immutn f‑uggjdi baš a‑gis‑immt kullu ma‑ittiri bnadm i‑ih̬f‑ns ula kullu ma‑yʷh̬šnn.

²⁵ imma ġilad ġ‑nddr s‑tḥkimt n‑rruḥ lqudus, illa fllannġ a‑nskar s‑mad‑aġ‑imala rruḥ lqudus.

²⁶ a‑ur‑nssimġur ih̬f‑nnġ ula‑da‑ntẓi d‑yan ula‑da‑nttiri ma‑igan win wiyyaḍ.