گالاطيّا 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ walaynni ġmkad a‑iga kullu wanna iwrtn. lliġ sul imẓẓi, ig zund ismg ġ‑tgmmi n‑babas, wah̬h̬a ra‑iṭṭaf kullu ayda n‑babas tigira.

² ašku illa sul ġ‑ddu‑ufus n‑willi‑t‑igabln d‑willi dar ifl babas lamant l‑lwrt‑ns, ard iruḥ‑uzmz lli‑f‑iqṣad babas a‑t‑gis‑yamẓ.

³ ula nkkʷni nkka‑ttin nga ġmkan. ġakud lliġ sul nmẓẓi, nga zund ismgan ġ‑ddu‑ssulṭa l‑larwaḥ n‑ddunit‑ad.

⁴ walaynni ġakud lliġ‑d‑iruḥ‑uzmz, rbbi yuzn‑d yus s‑ddunit. ilul‑d zġ‑waḥlig n‑yat‑tmġart, iwrri yili ula ntta ġ‑ddu ššrɛ,

⁵ baš a‑ifukku winna llanin ġ‑ddu ššrɛ irar‑aġ a‑ng tarwa n‑rbbi.

⁶ ġmkad ad‑aġ‑imlan is‑nga tarwa n‑rbbi, ašku yuzn‑d rruḥ n‑yus izdġ ġ‑uwlawn‑nnġ, irar‑aġ a‑srs‑naqra: «abba, wa‑baba.»

⁷ hati ur‑sul‑tgim ismgan, walaynni twrrim tgam tarwa n‑rbbi. d‑wanna igan zġ‑tarwa n‑rbbi, ra‑iwrt lbarakat n‑rbbi.

bulus yusi taġuft f‑ayt‑galaṭiyya

⁸ ġayd izrin ur‑tssinm rbbi. tkkam‑ttin tgam ismgan i‑kra l‑lquwwat lli‑ur‑ginin rbbi.

⁹ imma ġilad ġ‑tssnm rbbi (nġd yuf ad‑iniġ, ġilad ġ‑kʷn‑issn rbbi), mah̬ aylliġ tram a‑twrrim‑daġ tgm ismgan i‑larwaḥ‑an lli‑ur‑ginin yat ula ẓḍarn ad‑skrn yat?

¹⁰ han twrrim ġilad ar‑tskarm f‑uwssan l‑lɛid‑nsn d‑iyrn‑nsn d‑izmaz‑nsn d‑isggʷasn‑nsn.

¹¹ ha‑yyi usiġ fllawn taġuft. izd bla lfaytt ad‑h̬dmġ nhatafġ ġ‑gratun?

¹² way‑aytma, ḍalbġ zġ‑gigun a‑didi‑tbiddm ġmklli‑bdda‑didun‑tbddadġ. ġayd izrin ur‑jju‑gigi‑tskirm kra yʷh̬šnn.

¹³ tssnm izd f‑ssibt n‑mad‑uḍnġ a‑f‑n‑darun‑uškiġ ġ‑isizwar, awiġ‑awn‑in lh̬bar ifulkin.

¹⁴ wah̬h̬a fllawn tšqa‑tmaḍunt‑inu, ur‑iyi‑tḥgirm ula trurm‑iyi, walaynni tšškšmm‑iyi‑n s‑darun tfrḥm sri zund iġ‑giġ yal‑lmalak zġ‑dar rbbi, zund‑nnit iġ‑giġ lmasiḥ yasuɛ.

¹⁵ ma‑s‑iggʷra lfrḥ‑nnun lli‑s‑sri‑tfrḥm? ssnġ ġ‑uwssan‑an mrad is‑tẓḍarm a‑tssukfm alln‑nnun ikun tfkam‑iyi‑tnt.

¹⁶ imma ġilad is‑iyi‑tgam d‑unuwwaš‑nnun f‑ssibt n‑mad‑awn‑nniġ lḥqq?

¹⁷ mddn‑an ar‑tt‑gigun‑tawin bahra, walaynni urd f‑kra ifulkin. ur‑rin abla a‑kʷn‑didi‑ssngaran, baš a‑stt‑gisn‑ttawim ġir ntni.

¹⁸ išwa a‑stti‑tawim ġ‑kra, iġ‑iga kra ifulkin. išwa‑bdda, zund iġ‑n‑didun‑lliġ zund iġ‑fllawn‑aggugġ.

¹⁹ wa‑tarwa‑nu ɛzzanin, ha‑yyi ġilad giġ zund tamġart lli‑ra‑yaru, izri‑flla‑ungaẓ n‑tlalit‑nnun ard gigun timġur‑tḥkimt l‑lmasiḥ.

²⁰ amar yufan a‑n‑didun‑iliġ ġilad, sawlġ‑awn f‑wawal yaḍni. hati usiġ fllawn taġuft bahra.

lmɛna n‑hajar ula sara

²¹ wa‑kunni lli‑iran a‑tskarm kullu s‑ššrɛ, ra‑kʷn‑sqsaġ f‑ššrɛ: is‑ur‑tssinm ma‑gis‑ityaran?

²² imla‑yaġ f‑ibrahim is‑dars sin tarwa, yan turu‑t‑tsmgt‑ns d‑yan turu‑t‑tmġart‑ns.

²³ yus n‑tsmgt, turu‑t ġmklli tarunt‑tutmin, imma yus n‑tmġart‑ns, turu‑t f‑ssibt n‑yan‑wawal lli‑inna rbbi i‑ibrahim.

²⁴ mayd ijran, tlla‑yas yat lmɛna intln. ašku snat‑tmġarin‑an rwasnt i‑sin id‑lɛhd. h̬talli yurun ismgan, tga lmɛna‑ns zund lɛhd n‑ššrɛ lli‑ityawskarn ġ‑udrar n‑sina. nttat tga tismgt hajar.

²⁵ tga lmɛna n‑hajar zund adrar n‑sina lli‑illan ġ‑tmazirt n‑waɛrabn, tg zund tamdint n‑urušalim d‑imzdġn‑ns lli‑ganin ismgan.

²⁶ imma tayyaḍ tga zund urušalim yaḍni lli‑igan tin ignna. nttat tga innatnnġ sara, ur‑akkʷ‑tgi tismgt.

²⁷ ašku ityara: «wa‑tamġart lli‑ur‑jju‑yurun, wa‑kmmi lli‑f‑ur‑jju‑izri‑ungaẓ, nkr ġilad tfrḥt ar‑tssġrutt. ašku kmmi lli‑n‑ifl‑urgaz ra‑tarut uggʷar n‑talli iṭṭafn argaz.»

²⁸ kunni ay‑aytma, tgam zund isḥaq, tlulm f‑ssibt n‑wawal n‑rbbi.

²⁹ walaynni ġmklli inkr ġwalli iluln zund kullu mddn ar‑issrfufun ġwalli iluln s‑rruḥ n‑rbbi, ġmkan ad‑skarn mddn ula ġilad.

³⁰ ma‑ittini‑warra n‑rbbi? ar‑ittini: «ssmsr tismgt nttat d‑yus, ašku yus n‑tsmgt ur‑ra‑iṭṭaf taġamt ġ‑lwrt n‑babas. ra‑ig lwrt kullut win yus n‑talli igan tamġart bla iskraf.»

³¹ imma ġilad ay‑aytma, ma‑ra‑nini? urd tarwa n‑tsmgt a‑nga, walaynni nga tarwa n‑tmġart lli‑ur‑jju‑dar iskraf.