گالاطيّا 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ššrɛ ula lḥukm n‑rbbi

¹ wa‑kunni n‑ayt‑galaṭiyya, izd tffuġm ih̬f‑nnun? is‑kʷn‑issnufl kra n‑yan? nmla‑yawn yadlli mamnk a‑immut yasuɛ lmasiḥ f‑uggjdi, tissanm‑t bahra.

² imma ġilad ra‑kʷn‑sqsaġ, izd f‑ssibt n‑ma‑tskarm s‑ššrɛ n‑musa a‑f‑awn‑in‑yuška rruḥ lqudus, nġd f‑ssibt n‑ma‑tsfldm i‑lh̬bar‑nnġ ifulkin tamnm srs?

³ is‑nnit‑tffuġm ih̬f‑nnun? tgram ġ‑tudrt‑ad l‑ljdid s‑tḥkimt n‑rruḥ lqudus, imma ġilad is‑tram a‑gis‑tzaydm s‑iskkirn n‑bnadm?

⁴ is‑ur‑igi yat, kullu maylli darun ijran ġayd zrinin?

⁵ izd f‑ssibt n‑ma‑tskarm s‑ššrɛ a‑f‑awn‑yakka rbbi rruḥ lqudus ar‑darun‑iskar lmɛjizat, nġd f‑ssibt n‑ma‑tsfldm i‑lh̬bar ifulkin tamnm srs?

⁶ ula ibrahim, ityara fllas: «yumn rbbi, mayan a‑f‑t‑iga rbbi d‑wad f‑irḍa.»

⁷ riġ a‑tissanm mayad. ayt‑ibrahim, a‑tn‑igan d‑willi umnnin.

⁸ ašku ityara ġ‑warra n‑rbbi f‑mamnk a‑ra‑irḍu rbbi ula f‑ayt‑tmizar aggugnin f‑ssibt mad‑umnn. isawl rbbi s‑ibrahim iml‑as lh̬bar ifulkin lli‑ra‑yili yini‑as: «s‑ism‑nnk a‑s‑rad‑barkġ kullu timizar n‑ddunit.»

⁹ ġmkad a‑s‑nssn is‑ra‑ibark rbbi kullu wanna yumnn ġmklli ibark ibrahim lli‑yumnn.

¹⁰ kullu willi ittirin ad‑rḍun rbbi s‑iskkirn n‑ššrɛ, hati ġ‑ddu lḥukm a‑ġ‑sul‑qaman. ašku ityara: «rbbi ra‑yut lḥukm s‑jhnnama f‑kraygatt yan ur‑iskarn s‑kullu ma‑ityaran ġ‑warratn n‑ššrɛ.»

¹¹ imla‑yaġ‑wawal‑ad is‑ur‑iẓḍar yan a‑irḍu rbbi s‑iskkirn n‑ššrɛ, walaynni ityara‑daġ inna rbbi: «wanna yumnn, nttan a‑f‑rad‑rḍuġ fkġ‑as tudrt.»

¹² wanna ibnnun f‑ššrɛ, ur‑a‑itawi rrja s‑ma‑yumn, ašku ġmklli ityaran: «yan iskarn kullu s‑iskkirn‑ad, rad‑as‑ifk rbbi tudrt f‑ssibt‑nsn.»

¹³ imma lmasiḥ ifukka‑yaġ zġ‑lɛqubit lli‑ra‑iḍr f‑willi ibnnun f‑ššrɛ. iwrri iga ntta wad‑f‑tḍr lɛqubit, baš a‑ur‑fllannġ‑tḍr nkkʷni. ašku ityara: «kullu wanna ityaggaln f‑uggjdi, lɛqubit n‑rbbi a‑fllas‑illan.»

¹⁴ immut lmasiḥ yasuɛ baš ad‑kšmn ula ayt‑tmizar aggugnin s‑lbaraka lli‑f‑inna rbbi i‑ibrahim, namẓ kullwaġ rruḥ lqudus lli‑f‑inna rbbi rad‑aġ‑t‑ifk. kullu mayad rad‑aġ‑yili f‑ssibt n‑ma‑numn.

amud n‑ibrahim

¹⁵ way‑aytma, nssn mad‑skarn mddn iġ‑d‑mšaškan f‑kra n‑tġawsa. ar‑akkan lɛhd i‑ngratsn. iġ‑skrn lɛhd, ur‑iẓḍar yan a‑yanf i‑lɛhd‑an ula‑yas‑izayd kra.

¹⁶ ġayd izrin ar‑isawal rbbi s‑ibrahim ar‑as‑ittini f‑ma‑rad‑as‑ifk i‑ibrahim, ntta d‑wamud‑ns. ur‑as‑inni «ra‑t‑fkġ i‑imadn‑nnk» zund iġ‑gan mddn ggutnin, walaynni inna‑yas «ra‑t‑fkġ i‑wamud‑nnk» igan yan ig lmasiḥ.

¹⁷ lmɛna‑yad, riġ ad‑awn‑srs‑mlġ mayad. rbbi ifka yal‑lɛhd i‑ibrahim, yini‑as rad‑as‑t‑izzga. zrin kkuẓ id‑miyya d‑kraḍ id‑mraw (430) n‑usggʷas, ifk ilmma rbbi ššrɛ i‑mddn‑ns. walaynni ur‑iẓḍar ššrɛ n‑musa a‑issanf i‑lɛhd lli‑t‑id‑izwarn, ula iẓḍar a‑ikkis awal lli‑s‑yad‑inna rbbi i‑ibrahim.

¹⁸ ašku rbbi, mrad is‑ifka lwrt‑ns ġir i‑willi skarnin s‑ššrɛ, ikun ur‑akkʷ‑iqama ġ‑wawal lli‑s‑yad‑inna i‑ibrahim. walaynni urd ġmkan a‑iskr rbbi, ašku s‑wawal‑ns izgan a‑s‑ifka lwrt i‑ibrahim.

¹⁹ imma ġilad ma‑ra‑nini f‑ššrɛ? mah̬ aylliġ‑t‑id‑izuyd rbbi i‑mddn‑ns? izuyd‑asn‑t baš ad‑asn‑imala ddnub lli‑skarn. iqama ššrɛ ġir ar akud lliġ‑d‑yuška‑wamud n‑ibrahim lli‑f‑yad‑inna rbbi. f‑ufus l‑lmalayka a‑f‑asn‑ifka ššrɛ, d‑ntni ssbayynn‑t‑id i‑musa, d‑ntta issbayyn‑t‑id i‑wiyyaḍ.

²⁰ walaynni awal lli‑ifka rbbi i‑ibrahim, ifka‑yas‑t ġ‑gras dids, ur‑t‑ih̬ṣṣa yan yaḍni.

lwrt lli‑ityawfkan i‑willi umnnin

²¹ imma ġilad ma‑ra‑nini? is‑issunf ššrɛ iwaliwn n‑rbbi lli‑s‑yad‑inna i‑ibrahim? uhu, ur‑t‑issunf. ašku bnadm, mrad is‑as‑ityawfka kra n‑ššrɛ ma‑s‑a‑iteṭṭaf tudrt, ra‑irḍu rbbi f‑kraygatt yan iskarn s‑ššrɛ.

²² walaynni arratn n‑rbbi ar‑malan mamnk a‑ttyamaẓ ddunit kullutt ġ‑ddu lḥukm n‑ddnub. imma lwrt lli‑f‑inna rbbi i‑ibrahim, ar‑t‑yakka i‑willi umnnin s‑yasuɛ lmasiḥ, ar‑asn‑t‑yakka ġilad f‑ssibt l‑liman‑nsn.

²³ ġ‑uzmz lli‑ġ‑ur‑ta‑d‑yuški lmasiḥ ur‑ta‑srs‑numin, ntyawkrraf sul s‑iskraf n‑ššrɛ. ar‑aġ‑tḥṣarn‑warratn n‑ššrɛ ar kiġ‑d‑ilkm‑uzmz‑ad ġ‑numn s‑lmasiḥ.

²⁴ ikka‑ttin iga ššrɛ angabal fllannġ, ar‑aġ‑itrbba aylliġ‑d‑yuška lmasiḥ iskr sslamt ġ‑gr rbbi d‑willi srs umnnin.

²⁵ imma ġilad ġ‑d‑ilkm‑uzmz l‑liman, ur‑sul‑igi ššrɛ angabal‑nnġ.

²⁶ ha‑kunni kullukn, tarwa n‑rbbi a‑tgam f‑ssibt n‑ma‑tumnm s‑lmasiḥ yasuɛ.

²⁷ ašku kullu wanna gigun iddmn s‑udum n‑waman baš a‑iml is‑iga win lmasiḥ, hati iwrri iddr s‑tudrt l‑lmasiḥ.

²⁸ mayad a‑f‑ur‑a‑sul‑nẓẓmẓlay gu‑yudaya zġ‑gu‑yunan, ula‑da‑nẓẓmẓlay awtm zġ‑tawtmt ula ismg zġ‑wad‑igan win ih̬f‑ns, ašku tgam kullu yan ġ‑lmasiḥ yasuɛ.

²⁹ walaynni lliġ tgam win lmasiḥ, hati ayt‑ibrahim a‑tgam. ra‑tamẓm lwrt lli‑f‑as‑inna rbbi ra‑t‑ifk i‑tarwa‑ns.