گالاطيّا 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

amšaška n‑bulus d‑irqqasn yaḍni

¹ zrin kkuẓ d‑mraw n‑usggʷas s‑wrriġ s‑urušalim nkki d‑barnaba, awiġ didi tiṭus.

² imla‑yyi rbbi is‑iyi‑d‑iqqan ad‑dduġ s‑ġin. mnaggarġ ġakudan d‑willi mi ttinin inmġurn. nniġ‑asn ġ‑griyi didsn f‑mamnk a‑iga‑wawal l‑lh̬bar ifulkin lli‑s‑a‑tbrraḥġ ġ‑dar ayt‑tmizar aggugnin, ašku ksuḍġ a‑ur‑ra‑tili lfaytt ġ‑mad‑skrġ ula ġ‑mayd sul skarġ.

³ imma ntni ur‑aġ‑uṣṣan a‑nẓẓall i‑ddat n‑usmun‑inu tiṭus wah̬h̬a iga gu‑yunan.

⁴ walaynni llan ġin kra n‑mddn skrn zund iġ‑gan aytmatnnġ, kšmn darnnġ s‑tntla, irin ad‑ẓrn mamnk a‑nskar ġilad ġ‑aġ‑irẓm lmasiḥ zġ‑iskraf n‑ššrɛ. ar‑ttirin ad‑aġ‑krsn‑daġ zund ismgan.

⁵ imma nkkʷni ur‑akkʷ‑nqbil yat ġ‑maylli‑aġ‑ttinin, baš a‑ur‑fllawn‑kkisn lḥqq l‑lh̬bar ifulkin.

⁶ imma ġwilli‑f‑a‑ttinin mddn zund iġ‑gan kra (wah̬h̬a ur‑iyi‑ihmma mad‑gan ašku rbbi ur‑a‑iskar s‑uwdmawn), ntni ur‑iyi‑nnin kra n‑uswingim yaḍni.

⁷ walaynni ẓran is‑iyi‑ifka rbbi ad‑sslkmġ lh̬bar ifulkin i‑ayt‑tmizar yaḍni, ġmklli ifka i‑bṭrus a‑t‑isslkm i‑ayt‑yudaya.

⁸ ašku rbbi lli‑ith̬damn ġ‑bṭrus baš a‑ig arqqas i‑ayt‑yudaya, ar‑gigi‑ith̬dam ula nkki baš ad‑gġ arqqas i‑ayt‑tmizar yaḍni.

⁹ imma yaɛqub d‑bṭrus d‑yuḥanna lli‑mi‑ttinin mddn inmġurn, lliġ ẓran mayad, mdin‑aġ‑d afus‑nsn afasi nkki d‑barnaba. mšaškan‑d didnnġ a‑ntmɛawan i‑ngratnnġ, ar‑nth̬dam nkkʷni ġ‑tmizar yaḍni ar‑th̬damn ntni ġ‑dar ayt‑yudaya.

¹⁰ ur‑ginnġ‑rin abla yat‑tġawsa. ran ginnġ a‑stt‑ntawi ġ‑imẓlaḍ lli‑darsn‑illan. imma nkki swangmġ yadlli f‑mayan, iriġ bahra a‑t‑skrġ.

bulus ur‑ifrḥ s‑ma‑iskr bṭrus

¹¹ walaynni ġakud lliġ‑d‑yuška bṭrus s‑tmdint n‑anṭakiyya, nkrġ srs ġ‑lgddam n‑aytmatn, ašku ur‑a‑iskar s‑lḥqq.

¹² ntta ġ‑isizwar ar‑ištta d‑aytmatn n‑tmizar yaḍni, walaynni ġakud lliġ‑d‑uškan kra n‑imddukkʷal n‑yaɛqub, iwrri bṭrus ur‑a‑sul‑ištta d‑mddn‑an ula‑da‑didsn‑itmunu, ašku iksuḍ zġ‑willi ur‑itqbaln winna ur‑ẓẓullinin i‑ddat‑nsn.

¹³ ġakudan nkrn wiyyaḍ n‑ayt‑yudaya skrn sin‑uwdmawn ġmklli iskr bṭrus, aylliġ‑tn‑itabɛa ula barnaba.

¹⁴ imma nkki, lliġ ẓriġ ur‑a‑tamẓn ġ‑lḥqq l‑lh̬bar ifulkin, sawlġ s‑bṭrus ġ‑lgddam‑nsn kullutn nniġ‑as: «kiyi gu‑yudaya a‑tgit, walaynni tmyart a‑tskart zund ayt‑tmizar yaḍni urd ayt‑yudaya. mamnk ġilad a‑trit a‑ttinit iqqan‑d ayt‑tmizar yaḍni ad‑skarn s‑ššrɛ n‑ayt‑yudaya?»

tudrt l‑ljdid f‑ssibt l‑lmut l‑lmasiḥ

¹⁵ ha‑nkkʷni laṣl‑nnġ iga zġ‑ayt‑yudaya, urd zġ‑ayt‑tmizar yaḍni lli‑mi‑ttinin ‹ayt‑ddnub›.

¹⁶ walaynni nssn taġawsa‑yad bahra. ra‑irḍu rbbi f‑winna umnnin s‑yasuɛ lmasiḥ, urd f‑willi skarnin s‑ma‑ityaran ġ‑ššrɛ n‑musa. mayad a‑s‑aġ‑d‑iqqan ula nkkʷni n‑ayt‑yudaya a‑namn s‑yasuɛ lmasiḥ. f‑ssibt l‑lmasiḥ a‑f‑fllannġ‑irḍa rbbi, urd f‑ssibt n‑kra nskar igan win ššrɛ. ašku ur‑iẓḍar yan a‑irḍu rbbi s‑iskkirn n‑ššrɛ.

¹⁷ walaynni ġilad ġ‑a‑ntrju a‑fllannġ‑irḍu rbbi f‑ssibt l‑lmasiḥ, ma‑ra‑nini iġ‑a‑sul‑ntafa ddnub ġ‑ih̬f‑nnġ zund ayt‑tmizar‑an yaḍni? is‑a‑yaġ‑ifal lmasiḥ a‑ntzayad ġ‑ddnub? uhu, urd ġmkan a‑nga.

¹⁸ ašku mrad is‑a‑bnnuġ f‑ġaylli h̬ʷliġ, ra‑gigi‑iban izd ddnub ad‑skarġ.

¹⁹ walaynni giġ ġilad zund iġ‑iyi‑inġa ššrɛ mmtġ‑as, baš ad‑d‑nkrġ ddrġ i‑rbbi.

²⁰ ha‑yyi mmutġ d‑lmasiḥ f‑uggjdi‑ns. urd sul nkki a‑iddrn walaynni lmasiḥ a‑gigi‑iddrn. kullu mad‑skarġ ġilad, ar‑t‑skarġ f‑ssibt n‑mad‑umnġ s‑yus n‑rbbi lli‑gigi‑iḥnnan ifk tudrt‑ns flla.

²¹ ur‑rurġ lḥnant‑ad n‑rbbi zund iġ‑ur‑tgi yat. ašku mrad is‑nẓḍar a‑nrḍu rbbi s‑iskkirn n‑ššrɛ, bla lfaytt a‑ra‑tg lmut l‑lmasiḥ.