گالاطيّا 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus igan arqqas s‑trqqast lli‑ur‑igin tin bnadm ula ẓlin‑iyi srs mddn, walaynni iẓli‑yyi srs yasuɛ lmasiḥ d‑rbbi babatnnġ lli‑t‑id‑issnkrn zġ‑lmut.

² zġ‑gigi nkki d‑aytmatn lli‑didi‑illan, i‑imnaggarn ġ‑tmazirt n‑galaṭiyya.

³ ad‑awn‑tili lbaraka d‑sslamt zġ‑rbbi babatnnġ d‑siditnnġ yasuɛ lmasiḥ.

⁴ nttan a‑ifkan ih̬f‑ns, immt baš ad‑aġ‑ijjnjm zġ‑ddnub‑nnġ. ifukku‑aġ zġ‑ddunit‑ad yʷh̬šnn ġmklli ira rbbi babatnnġ.

⁵ ar‑t‑bahra‑ntalġ, ġilad ula kullu mayd‑d‑iftan, amin.

lh̬bar ifulkin l‑lmasiḥ

⁶ imma kunni, iḍr‑iyi lɛjb gigun. ašku ġir yat luqt idrusn ayd tzzrim s‑tflm rbbi lli‑awn‑iġran s‑lbaraka l‑lmasiḥ. twrrim s‑yan‑uġaras yaḍni, ar‑as‑ttinin kra n‑mddn ‹lh̬bar ifulkin›

⁷ walaynni urd lh̬bar ifulkin ayan. ssnġ is‑llan kra n‑mddn ġ‑darun ar‑awn‑tt‑ssṭiyyarn, irin a‑tbddaln lh̬bar ifulkin l‑lmasiḥ s‑tkrkas.

⁸ walaynni iġ‑n‑yuška kra n‑yan ar‑awn‑imala kra mi ittini ‹lh̬bar ifulkin› ur‑igin lh̬bar lli‑awn‑in‑niwi ġ‑isizwar, ra‑fllas‑iniġ «a‑t‑ihlk rbbi» wah̬h̬a nkki nġd kra l‑lmalak zġ‑ignwan.

⁹ nenna‑yawn ġayd izrin, iniġ‑awn‑daġ ġilad: iġ‑n‑yuška kra n‑yan ar‑awn‑imala kra mi ittini ‹lh̬bar ifulkin› ur‑igin lh̬bar ifulkin lli‑tumẓm zġ‑isizwar, hati nniġ fllas «a‑t‑ihlk rbbi.»

ġmkad a‑igra bulus ġ‑tbrraḥt s‑lmasiḥ

¹⁰ ma‑tġalm kunni? izd mddn ad‑riġ ad‑flla‑rḍun, nġd rbbi? izd mddn ad‑riġ a‑yyi‑talġn? uhu, mrad is‑riġ a‑yyi‑talġn mddn ur‑rad‑gġ ah̬ddam l‑lmasiḥ.

¹¹ way‑aytma, riġ a‑tissanm mayad. urd zġ‑bnadm a‑zġ‑d‑yuška lh̬bar ifulkin lli‑s‑a‑tbrraḥġ.

¹² ašku ur‑t‑umẓġ dar mddn ula sslmdn‑iyi‑t mddn, walaynni issbayyn‑iyi‑t‑id yasuɛ lmasiḥ.

¹³ tsfldm kunni f‑mamnk a‑sttin‑kkiġ ar‑bahra‑skarġ s‑tnbaḍin n‑ayt‑yudaya, ar‑ssrfufunġ aytmatn n‑umnaggar n‑rbbi s‑trfufnt išqan, ar‑n‑tggaġ tiqqi‑nu ad‑hlkġ amnaggar a‑ur‑sul‑iqama.

¹⁴ ġ‑uwssan‑an zwarġ ma‑iggutn ġ‑inggan‑inu n‑ayt‑yudaya, ašku ɛzzant dari bahra lɛadat n‑imzwura‑nnġ lli‑zrinin.

¹⁵ walaynni rbbi lli‑yyi‑iẓlin lliġ ur‑ta‑lulġ, iḥnna gigi irḍu ad‑iyi‑iġr

¹⁶ issbayyn‑iyi yus, baš ad‑dduġ ar‑fllas‑tbrraḥġ ġ‑dar ayt‑tmizar aggugnin. ur‑sqsaġ kra n‑bnadm

¹⁷ ula ddiġ s‑urušalim ad‑sawlġ d‑irqqasn lli‑yyi‑zwarnin, walaynni ffuġġ mudduġ s‑tmazirt n‑waɛrabn. yan kra wrriġ s‑tmdint n‑dimašq.

¹⁸ zrin kraḍ isggʷasn s‑ddiġ s‑urušalim a‑ġin‑sawlġ d‑bṭrus. gawrġ dids smmus d‑mraw n‑wass.

¹⁹ walaynni ur‑ẓriġ irqqasn yaḍni abla yaɛqub gʷmas n‑siditnnġ.

²⁰ mayd‑awn‑in‑uriġ, rbbi issn is‑ur‑gis‑sskarksġ.

²¹ ffuġġ ilmma ar‑tmudduġ ġ‑tmizar n‑suriyya d‑kilikiyya.

²² ġ‑uwssan‑an ur‑ta‑yyi‑ssinn ayt‑imnaggarn ġ‑tmazirt n‑yudaya.

²³ ġir sfldn flla, ar‑ttinin «ġwalli‑sttin ikkan ar‑aġ‑issrfufun, hati ar‑itbrraḥ ġilad f‑uġaras lli‑f‑iqṣad a‑t‑ihlk.»

²⁴ ar‑bahra‑talġn rbbi f‑ssibt‑inu.