filibbi 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lfrḥ d‑sslamt

¹ way‑aytma, tɛzzam dari bahra, ar‑iyi‑inqqa‑umarg‑nnun. kunni a‑s‑a‑tfraḥġ, tgm ttaj n‑ih̬f‑inu. way‑aytma ɛzzanin, illa fllawn a‑tzgam ġmkan ġ‑siditnnġ.

² rad‑ḍalbġ zġ‑afudiyya, ḍalbġ ula zġ‑sintih̬a, a‑d‑mšaškant i‑ngratsnt ġ‑tamunt n‑siditnnġ.

³ ḍalbġ‑k ula kiyi ay‑amɛawn‑inu ifulkin, a‑tɛawnt timġarin‑an. h̬dmnt ntnti ġ‑twuri l‑lh̬bar ifulkin ġ‑tama‑nu nkki d‑klimantus d‑imɛawann‑inu yaḍni lli‑mi‑tyaran ismawn‑nsn ġ‑warra n‑willi ṭṭafnin tudrt idumn.

⁴ frḥat‑bdda ġ‑siditnnġ. ra‑t‑daġ‑iniġ, frḥat.

⁵ mlat i‑kullu mddn mnšk a‑illa ṣṣbr‑nnun. hati yakmur‑d siditnnġ.

⁶ a‑ur‑tasim taġuft f‑kra, walaynni tẓẓallat ar‑ttḍalabm rbbi f‑kraygatt kra, ar‑ti‑ttškarm ar‑as‑ttinim f‑aynna‑kʷn‑ih̬ṣṣan.

⁷ ġmkad a‑s‑rad‑awn‑tili sslamt n‑rbbi lli‑yugʷrn iswingimn n‑bnadm, ra‑tgabl ul‑nnun ula lɛaql‑nnun ġ‑tamunt l‑lmasiḥ yasuɛ.

⁸ way‑aytma, awal‑inu iggʷran a‑t‑igan: a‑tswingimm ġ‑ma‑igan lḥqq ula ma‑ġ‑illa ma‑ttuqqarm ula ma‑yʷġẓann ula ma‑iġusn ula ma‑imimn ula ma‑išwan. iġ‑illa kra ifulkin ula kra‑ġ‑illa ma‑ttalġm, swingimat ġ‑tġawsiwin‑ad.

⁹ kullu ma‑zgigi‑tlmdm tamẓm‑t tsfldm‑as tẓrm‑t gigi, skarat srs. ġmkad a‑s‑rad‑bdda‑didun‑yili rbbi n‑sslamt.

kra iɛzzan ilmd‑t bulus

¹⁰ imma ġilad frḥġ bahra ġ‑siditnnġ ašku twrrim ar‑gigi‑tswingimm. ssnġ is‑a‑bdda‑gigi‑tswingimm, walaynni ur‑tẓḍarm a‑tskrm kra ar ġilad.

¹¹ urd f‑ssibt n‑ḥtajjaġ kra a‑f‑nniġ mayan, ašku lmdġ ad‑qnɛuġ s‑aynna‑dari‑illan.

¹² iġ‑dari‑idrus ula iġ‑dari‑iggut, ssnġ ma‑rad‑skrġ. ašku lmdġ kra iɛzzan, issanġ mamnk ad‑tqnaɛġ s‑kullu kra‑yyi‑ijran. zund iġ‑šbɛaġ tirmt zund iġ‑qamaġ s‑laẓ, zund iġ‑dari ma‑iggutn zund iġ‑dari ma‑idrusn.

¹³ ẓḍarġ i‑kraygatt kra s‑tdwast l‑lmasiḥ lli‑yyi‑issdusn.

¹⁴ imma kunni, afulki ayd‑gigi‑tskrm ġilad ġ‑didi‑tbiddm ġ‑tnukmut‑inu.

¹⁵ tssnm kunni n‑filibbi, ġakud lliġ ffuġġ tamazirt n‑makiduniyya ġ‑uwssan zwarnin l‑lh̬bar ifulkin, ur‑didi‑ibidd kra n‑umnaggar ġ‑‹fk‑amẓ› abla kunni waḥdukn.

¹⁶ imma kunni, lliġ‑n‑qamaġ ġ‑tmdint n‑tasaluniki taznm‑iyi‑n lmɛawnt urd ġir yat‑twal ula snat ġakud lliġ ḥtajjaġ.

¹⁷ urd nkkin a‑iran kra i‑ih̬f‑inu, walaynni riġ ad‑darun‑tigat ṣṣabt ġ‑lḥsab‑nnun.

¹⁸ imma ġilad ha‑yyi šbɛaġ, yili dari ma‑yufan zġ‑lh̬ir, ašku issruḥ‑iyi‑d abafruditus maylli‑yyi‑di‑tuznm. iga zund tujjut imimn ula zund yat‑twafka ittrsn ġ‑lgddam n‑rbbi lli‑s‑ifrḥ irḍu srs.

¹⁹ rbbi lli‑mi‑giġ wins rad‑awn‑yakka kullu ma‑tḥtajjam zġ‑tmih̬ar l‑lmjd‑ns f‑uwdm l‑lmasiḥ yasuɛ.

²⁰ rbbi babatnnġ a‑bdda‑ntalġ ġilad ula kullu mayd‑d‑iftan, amin.

²¹ ar‑n‑tsllamġ f‑kullu imẓlayn l‑lmasiḥ yasuɛ. ar‑n‑fllawn‑tsllamn aytmatn lli‑didi‑llanin.

²² ar‑n‑kullu‑fllawn‑tsllamn imẓlayn n‑ġid, bahra ġwid ganin zġ‑tgmmi n‑qayṣr.

²³ a‑gigun‑tili lbaraka n‑siditnnġ yasuɛ lmasiḥ.